Read Uab Meto HOSEA 2 Bible Online

HOSEA 2 - Uab Meto bible

HOSEA 2

¹Es nane te amboin ho aom bian meki kanaf “To Uisneno” ma “UISNENO In nek nani”.

²UISNENO nakua a'an nak, “Hoi Au anah-anah ki, hi aina nane ka Au fenai fa anteni, ma Au ka in mone fa. Es nane te anmo'e lasi mok in he nati' kais in anmapaisa anteni.

³Leka in mapaisa nabalah, of Au kaus ani in blua pake sin he nati' in monas on anbi neno nahonis in. Of Au mo'e in anfani afu mo'es ma meto he nati' in anmeto natuin meno.

⁴Hi, in anah ki, le of Au ka nek ani fa; natuin in nahonis ki anbi mapaisa in nanan.

⁵Hi aina nane amapaisa le kan mae nahin fa. In namolok nak, ‘Of au nao neu sin le au nek ani sin le anfe neu Kau mnahat ma mninut, blua pake mafaun ma pilu muti manula, min fomeni Saitun ma tua min kase.’

⁶Es nane te, of Au uklab in eki kisan, ma Au eka in eki baki lape.

⁷In of anli'u natuin sin le in anek nani sin, ma of in ka napeni fa sin. In of nami sin, mes in of ka naeku fa nok sin. Es nane te of in namolok nak, ‘Of Au nao fani neu au mone ahunut; nahunut au monik naleko nesin tabu le i.’

⁸Ho aina nane in kan au nit fa in nekan nak Au es a'fe neune aen kase, tua min kase, min fomeni saitun, mnatu ma noni muti le in anpake ma nabes neu Baal nane.

⁹Esle' nane, anbi tabu sekit of Au hel ufani sa' le Au fe ani, esle' aen kase ma tua min kase, ma pilu mafaun ma pilu muti malule le Au fe neu in hen fani in blua pake.

¹⁰Of Au u'monas in anbi atoni le sin nek nani sin matan. Of kan mu'i fa es amsa he nabe'i nafetin in na'ko Au kuasat.

¹¹Of Au usanab ale in buat sin, leko buat anbi ton mese in nanan, ai buat anbi funan mese ma buat anbi neno-neno Snasat; le buat ale neno naek matalu nok palsait.

¹²Of Au uklati tua min kase ma hau bubuk le anbi in tenab nane anfani upab natuin in antuthae in le in nek nani. Of Au ubaina in lene tua min kase ma lene hau bubuk anfani nasi, ma mu'i fui of nale'un nani.

¹³Of Au kas in natuin anbi neno-neno in anpake he notu klali fomeni neu Baal, ma namasbon neki blua pake he nati' anli'u natuin in le in anek nani, ma in naikoti Kau. Au, UISNENO, es umolok ulali onane.”

¹⁴UISNENO nakua a'an nak, “Es nane te of Au eki in neu mnela pah asnaen; anbi nane of au hanoe in eki uab maliaba.

¹⁵Of Au fe ufani in lene tua min kase sin neu in, ma Nonof Susal ma nukat of Au ubaina anfani eno afnekat. Anbi nane in of ansimo Kau onle tabu in fe munif, leka in fe anpoi na'ko Mesir.

¹⁶Ma of in antek nani Kau anfani in mone, ma kan tek anteni fa In Baal.

¹⁷Of Au ka ufetin fa in hen tek anteni Baal in kanan, talantia atoni anikan kanaf nane.

¹⁸Anbi tabu nane of Au mo'e ani fef bela nok ale kanan mu'it he nati' sin kais na'koke Au to. Of Au usnasab ale makenat ma polin uneku ale blua makenat na'ko Au to sin pah nane, ma of sin anmoni nok nek tainine.

¹⁹Israel, of Au mo'e ko amfani Au fenai, Au fenai amneot talantia nabal-bal. Of Au nek ko ma maliaba ko piut; of Au moni nek muti ma a'ki neu ko.

²⁰Natuin Au lasi manta'en, of Au nek ko. Of ho muteb neu Kau on ho UISNENO kun.

²¹Anbi tabu nane, leka Au to Israel sin an onen, of Au nen ma utnin sin. Es nane te of Au usanut ulan na'ko neno tunan talantia pah pinan napoitan aen kase, tua min kase, ma min fomeni saitun.

²³Au to of anmoni nok athoes ma of sin namaika nabal anbi sin pah. Neu sin le mateka nak, ‘Le ka nek nani fa’ of Au uton Au manekak neu sin, ma neu sin le mateka nak ‘Hi ka Au to fa’ of Au tek sin ak, ‘Hi Au to ki’. Ma sin of natae nak on i, ‘Ho le nane hai Uisneno.’ ”