Read Uab Meto HOSEA 5 Bible Online

HOSEA 5 - Uab Meto bible

HOSEA 5

¹UISNENO nakua a'an nak, “Amnen nai, hoi Ana' fuat knino ki! Ampanat nai hoi atoni Israel! Amnen nai hoi kesel in sufan ki! Kasat nasanut nalali neu ki. Natuin, he namneo so him lefi lasi nok amneot, mes him fani onle habi anbi Mizpa, ma onle kleo anbi Tubu Tabor,

²ma amfani bola mnanu anbi Sitim. Es nane te of Au kas ki oke!

³Au uhin ulali ale lasi le anmatalu nok ho aom, hoi Israel! Sa' es anbi ko of ka natolo' fa anbi Kau. Ho mululi mubes neu fatu le'u ma hau le'u ma ka mu'ki fa meu Kau. Es nane te, ho atoni sin kais nabes anteni neu Kau.”

⁴Maufinu le atoni Israel sin anmo'e nalali na'lob sin es nane te sin kan fani fa neu sin Uisneno. Luli besa neu fatu le'u ma hau le'u ankuas sin nekan, es nane te sin kan filoli fa UISNENO.

⁵Atoni Israel sin nek anaeb nane natonon mat-mat, nane anfani sanat le naklil'on na'ko sin. Sin sanat es anmo'e sin talantia nastun ma natsel, ma to Yehuda natsel nok sin.

⁶Sin nao ma nami UISNENO neki bibi kase ma bijae anfani on fuat, mes lasi nane ka maota fa. Natuin UISNENO nasaitan nalali sin, ma sin ka naeku nok fa In.

⁷Sin ka na'ki fa neu UISNENO; sin anah ka In anah fa. Es nane te ka lo fa anteni In of nale'un sin nok ale sin lene.

⁸Ampu to'is nai anbi Gibea! Muhanab ataka anfani boin neu makenat anbi Rama! Amhunun ma mi'ba makenat anbi Betel! Atoni Benyamin, so amnao mat nai anbi makenat!

⁹Israel of namle'u, natuin in neno antia nalali he nati' ankas in. Amnen nai, hoi to Israel, namneo lasi nane of anbol.

¹⁰UISNENO nakua a'an nak, “Au nekak nato' natuin atopus-atopus Yehuda anmaken nalali nok Israel ma nasik nani sin pah. Esle' nane of Au usanut kasat neu sin onle noe sako.

¹¹Israel mahamu'it; in kan mu'i fa hak neu in pah natuin in nek manu hen toti tuntakus neu le namneo kan lomi fa hen tuntaku in.

¹²Esle' nane of Au uskuku to Israel, ma umate atoni-atoni Yehuda.

¹³To Israel ma to Yehuda of sin nekan anbe' neu sin monin namle'u, es nane te Israel in nao neu Asyur ma antoti kesel afinit hen bab sin. Mes kesel nane of kan tuntaku fa sin ai ka naleko fa sin monin.

¹⁴Onle meo asu anlomi hen pisu, of Au maken ok atoni Israel ma Yehuda. Of Au eknok a'pisu sin nalali te Au usaitan ani sin. Leka Au ma nao, of kan mu'i fa atoni mese he nabe'i nafetin sin.

¹⁵Of Au usaitan ani Au to talantia sin nanukbok natuin ale sin sanat, nalali te sin nem ma nami Kau. Oni of anbi sin nukat nanan sin of nami ma naeku nok Kau.”