Read Uab Meto HOSEA 7 Bible Online

HOSEA 7 - Uab Meto bible

HOSEA 7

¹UISNENO nakua a'an nak, “Anbi tabu he uloitan Au to Israel ma uleko ufani sin monin, lasi le Au it anbi sin alkun maufinu ma sanat. Sin napoiba es neu es, sin antam neu atoni ume he nabak, ma sin anfani atoni asikat anbi lanan-lanan.

²Sin ka natenab nit fa nak of Au umnau sin maufinu nane piut. Mes sin sanat-sanat nane nahenu sin nekan talantia natonon neu Kau.”

³UISNENO nakua a'an nak, “Nok poi ma mo'et-mo'et maufinu to nami he nati' anhalin kesel ma ana' plenat sin nekan.

⁴Sin alsin abulalut ma atoni-atoni le sin nekan ka na'ki fa. Sin manek nanan nane onle ai anbi tunaf le anmo'e utunu' kan pese fa nahunun na'ko lalu haef nane maloitan he namnotu.

⁵Anbi neno buat na'ko kesel, sin nainut kesel ma ana' plenat sin talantia sin mafu ma anmo'e lasi-lasi mono. Anbi amsoput kesel in namlil nok ale abulalut nane.

⁶Onle ai anbi tunaf sin nanan amsa tenab maufinu ma nek to'as le anpin anbi sin nekan anbi fai teme, nok-noka anpese napina onle ai le nahaka'taun.

⁷Anbi in to'as ma in maufinu in nanan, sin namate ale atopus-atopus sin. Sin namate kesel sin es nok es. Mes maski mo'et namle'u onane, kan mu'i fa es hen onen neu Kau ma antoti tuntakus.”

⁸UISNENO nakua a'an nak, “To Israel namesbok nok ale uf-uf le anfeun natef sin, talantia sin anfani onle utunu' namtas an aobia.

⁹Sin nekan kan be' fa neu namesbok nok uf-uf nane, sin be'it matani nane namneku. Sin monin nane he namsopu, mes sin ka nahin fa.

¹⁰Atoni Israel sin nek anaeb nane natonon anfani elet ma tanhais. Maski nak ale lasi nane anbol nalali, sin ka nami Kau fa ai kan fani nem fa neu Kau, sin UISNENO.

¹¹Israel sin oinsok neu am nem onle kot kase amonot. Anbi ahunut atoni-atoni nane antoti babat ma tuntakus na'ko Mesir, anbi amunit sin naen neu Asyur!

¹²Mes leka sin nao, anfin Au tao kleo ma Au heke sin onle atoni anheke kolo. Of Au kas sin natuin sin maufinu le Au uhin ulali.

¹³Amle'ut neu sin, natuin sin nasaitan nalali Kau. Au sali he nati' ufetin sin, mes sin luli besa nane luman kun.

¹⁴Sin kan onen fa nok amneot neu Kau. Leka sin an onen, sin antup anbi hala in tunan ma sin ankae onle atoni-atoni le ka nafnek neu Kau. Leka sin an onen ma antoti aen kase ma tua min kase sin napapa' sin aon onle afi atoni-atoni le nabes neu hau le'u ma fatu le'u. Namneo sin al-al sin anlaban Kau!

¹⁵Maski nak Au es u'naeb sin ma Au es afe neu sin be'it ma matani, mes sin nabuan ma anlaban Kau.

¹⁶Sin natuin smanaf-smanaf le kan mu'i fa kuasat sa'-sa'. Sin le nane ka tafnek fa neu sin natuin sin onle klaot apenut. Ale sin atopus sin namolok nok nek amoko, natuin of namate sin neki suni, ma atoni-atoni Mesir of anmanis sin.”