Read Uab Meto HOSEA 8 Bible Online

HOSEA 8 - Uab Meto bible

HOSEA 8

¹UISNENO nakua a'an nak, “Muhanab ataka le naton nak anmu'i maten. Musu sin nale'un Au pah onle kaka tasi anheke in musu! Au to an ele ma antahai Au fef bela ok sin, ma sin anlaban Au noina-noina sin.

²Maski nak sin antek Kau nak sin Uisneno, ma sin namolok nak sin le nane Au to le sin nahin Kau,

³mes sin kan lomi fa hen simo sa' alekot. Es nane te of musu-musu nane anli'u natuin sin.

⁴Au to sin anbeti kesel mes sin ka natoti fa Au salit. Sin naiti ameput ma atopus mes ka natuin fa Au lomit. Sin naiti mnatu ma noni muti ma anmo'e fatu mamasa ma anbi amsoput sin naskuku sin aon anmes kun.

⁵Au un Au to'ak neu bijae le sin anmo'e na'ko mnatu le atokos kot Samaria sin nabes neune. Au uto'an sin anaek. Of sin he nalahi sin aonkun antia anteni leka nok naluli nabes neu fatu le'u ma hau le'u ka?

⁶Bijae le anmo'e na'ko mnatu le atoni Samaria sin nabes neune nane apakaet Israel sin es anmo'e nani! Nane ka Uisneno fa, ma mes nale'un nani!

⁷Au to sin ankifun anin es nane te sin of anhetu nautus! Sin lene aen kase kan molok fa, es nane te of ka napoitan fa ut hen fani sin amnahat. Mes leka sin lene aen kase anmolok amsa, uf bian es of anhetu sin aen kase nane.

⁸Onle nai le anpe', onane amsa atoni-atoni Israel sin ka maota fa anteni, ma sin namnes nok ate uf-uf bian amsa.

⁹Onle bikase luke mnanu fui le nakfatu kun, onane amsa atoni-atoni Israel sin natuin sin lomin kun. Sin nami atuntakus na'ko pah Asyur, ma sin ansos matalus nok ale uf-uf bian.

¹⁰Maski nak onane of Au nibun sin ma Au kas sin. Ka lo fa anteni of sin nanoi anbi menas in nanan, leka kesel na'ko Asyur an aten sin.

¹¹Atoni Israel sin nahakeb baki tulu ma ansato anteni neu he nati' ansako sanat, neu sin sanat nane ansato ma nao piut amsa.

¹²Au tuis ulali noina namfau neu sin, mes ale nane sin antite nani natuin sin nak lasi nane kan mu'i fa matalus nok piut amsa!

¹³Sin anlomi ma natulu fuat neu Kau, ma sin nah sisi fuat nane, mes Au UISNENO Au ka lomi fa fuat-fuat nane. Tabu le i of Au umnau ufani sin sanat ma of Au kas sin natuin sanat-sanat nane; ma of Au sonu ufani sin neu pah Mesir!

¹⁴Atoni-atoni Israel nafena ale sonaf, mes sin nikan sin apakaet. Atoni-atoni Yehuda ansato anteni sin baki lape, mes of Au usanut ai he nati' notu nani sonaf-sonaf nane ma kot-kot nane.”