Read Uab Meto YOEL 1 Bible Online

YOEL 1 - Uab Meto bible

YOEL 1

¹Le i han ba'an UISNENO neu Nai Yoel, Nai Petuel in anah.

²Amnen hoi ale mnasi-mnasi; ampanat nai, ale atoni anbi Yehuda. Lasi onle i anbol kan bi hi tabu monit, ai anbi hi be'i hi na'i sin monin?

³Amkakan lasi le i neu hi anhenu, he nati' sin natiab anteni pi'ot le i neu sin anhenu. Hi sufam so sin nen nani amsa, ma nanaob nani anteni neu sin sufan ma sin ka'un.

⁴Pukan lamat le in ani ka maso'ik fa antok anbi lene-lene ma nah nani lene in nesan. So le lamat le i nami lamat bian of nah nani anteni.

⁵Hoi ale amafu tua sin, amfen nai! Hoi ale amninu tua sin, so him kae nai! Natuin tua min kase fe'u nane nasik nani na'ko hi fefam!

⁶Pukan lamat nane antoman hit pah, sin abe'it kun ma sin amfaun kat so'i fa, in nisin nane naaik onle meo asu ainaf in konin.

⁷Sin nale'un hit tua min kase in ta'un, ma hit hau bubuk in tukluan. Sin nanisi in po'an, talantia in tlaen sin nane muti.

⁸Amkae nai hoi ale to, onle fenai akulut le ankae natuin naimone le in anah nane anmate.

⁹Ane kase ma tua min kase nane namneku nalali na'ko Ume UISNENO. Es nanet ale Ana' fuat knino le na'kian tuthaes neu UISNENO nane sin ankulun.

¹⁰Tabu le i ale lene luman, es nanet afu ankul nok, natuin ane kase nane amsa namneuk, ma ale tua min kase amneot, ma min fomeni saitun nane namneuk.

¹¹Hoi ale atof lene, amkae nai! Hoi ale amafu tua min kase amkul nai! Natuin ane kase, sai me' ma ale luat namle'u.

¹²Ale hau mafua anbi lene-lene alsin anmeto: leko tua min kase, koi kase, bub kase, pet kase ma lin kase. Es nanet to ka namlil anteni fa.

¹³Hoi ale Ana' fuat knino le antuthae anbi baki fuat, ampake kalo nai ma amkae nai. Amtam nai meu Ume UISNENO hem kae ma amkul fai teme mese, natuin kan mu'i fa fuat tua min kase ma ane kase anteni neu Uisneno.

¹⁴Muplenat ho to he nati' nanahok, anmo'e nai ekut buat le anaek! Amhone ale atopus ma ale mnasi ma ale atokos Yehuda, he nati' nem neu Ume Uisneno, he nati' amsakoi ma amtoti tuntakus ma babat na'kone.

¹⁵Neno UISNENO In anhaumak nalali, neno le neki hakataus; tabu Akuasat Afin-finit nasanut snama amle'ut.

¹⁶Ale mnahat namneku ankon kun na'ko hit matak, ma anbi hit Uisneno In Ume kan mu'i anteni fa a'baf malinat.

¹⁷Fini anmate anbi afu skuku. Kan mu'i anteni fa ane kase le mabela, es nanet lopo-lopo nane luman ma anfani baki atkua.

¹⁸Ale mu'it sin anbai ma nas'unu, kan mu'i anteni fa mnela hun neune. Pukan bib kase amsa anbel.

¹⁹Au toti babat ma tuntakus neu Ko, koi UISNENO, natuin ale hun anmeto ma anmoi, ale hau anmeto onle ai es notu nani.

²⁰Ma ale mu'i fui anbi nasi ansakoi neu Ko ma antoti babat. Sin ka naleko fa sin meno, natuin ale noe anmeti.