Read Uab Meto YOEL 2 Bible Online

YOEL 2 - Uab Meto bible

YOEL 2

¹Ampu to'is, ma mihanab takaf amnaut anbi Tubu Sion le aknino, Uisneno In bale. Amlilitai nai, hoi ale amaika anbi Yehuda! Natuin Neno UISNENO In tabu anhaumak ma of anbol lab-lab.

²Neno nane metan ma names'ok, nahenu nope ma nipu. Lamat onle meo pukan anteli nem onle nope anamunan tubu. Lasi onle nane kan mu'i nit fa, ma of kan bol anteni fa talantia nabal-bal.

³Onle ai le notu ma anputu, sin nale'un ale hau sena onane. Anbi ahun-hunut pah le i onle Eden, etu UISNENO, mes anbi amsopun onle mnela snaen le anmonas. Kan mu'i fa esle' nabalah, kan mu'i fa esle' nafetnon na'ko sin.

⁴Sin human onle bikase, sin naenan onle bikase hopu.

⁵Sin elen anbi tubu in tunan, onle aklet ma benat a'kilon, ma onle ai le notu ane ta'u. Sin makatuin onle pukan meo abe'it, le naloitan ma antam neu bale makenat.

⁶Anbi tabu makenat anbol, onle atoni na'tai', ma ale sin human anmutik ma anmofu.

⁷Sin anmaken onle meo pa'e ma ansae natuin baki lape onle abe'ut anbi makenat. Sin maakatuin amneo neu matan ma ka nok fa penu ai nabain'on fa.

⁸Sin kan mabe'un fa mes es-es, nao natuin kun in lanan. Sin alsin nao ma naskuku ale kot, ma kan mu'i fa es he nas-nasab sin.

⁹Sin anbe'u ale kot-kot, ma naen antom in baki lape in tunan. Sin ansae ma antam neu ale ume-ume, ma antam natuin eno ana onle abakat.

¹⁰Leka sin anao mat pah pinan na'tai' ma neno anlilitai. Es nane te manas ma funan names'ok, ma ale afkun in pinan namneku.

¹¹UISNENO In hanan onle lotos na'lu' ma anfe hanaf neu ale meo pa'e amakenat in solalus sin nane namfau! Solalus le nanaob in aplenat nane abe'it kun! Namneo amkakat kun, ma Neno UISNENO nane matani kun! Kan mu'i fa es hen hake na'ki anbine.

¹²UISNENO nakua a'an nak, “Mes tabu le i, amli' ma mo'e baniom meu Kau meki hi nekam oke, ma minahom, amkul ma amkae nai.

¹³Muskuku ho nekam ma kais ho bale pake.” Amli' ma mo'e baniom neu ho Uisneno. In nek meunuan ma nek mamun, In nek mahoe ma nahenu nok manekat. In anlomi ansako sanat ma kan lomi fa he nanaoba kasat.

¹⁴Oni ai ho UISNENO nane of nabaina In salit, ma of anfe ki In athoen neno nok athoes. Talantia nabe'i he mitulu fuat tua min kase ma ane kase neu UISNENO, le hi Uisneno.

¹⁵Ampu to'is nai anbi Tubu Sion, Tubu Uisneno, amkakan nai neno hi minahom, ma mo'e nai buat-buat anaet.

¹⁶Mibuab ale to, ma amnibun ale to pukan-pukan. Amlenu ale mnasi nem, ale li'ana ma ale li'ansusu sin amsa. Ma ale akabin fe'u nem nok amsa. Amlenu sin he nasaitan sin ke'an.

¹⁷Amlenu ale ana' fuat sin antuthae UISNENO, ma amkul ma amkae anbi baki fuat ma po'an abit matan sin atnanan, ma namolok nak, “Amnek Ho to kai koi UISNENO, kais mufetin Ho ini he namle'u,” talantia ale uf-uf bian naslaet ma namolok nak, “Sin Uisneno nane esme ka?”

¹⁸Es nane te UISNENO anpanat In afu, ma In nek nani In to.

¹⁹In natae sin nak on i, “Tabu le i Au fe neu ki: ane kase, tua min kase, ma min fomeni saitun he hi miah, he nati' hi alki mimsen. Of Au ka ufetin ki fa he nati' nakle'ut ki ai uf-uf anmanis ki.

²⁰Meo pukan lamat na'ko neno kaben ne'u of Au li'u ani, bian of Au li'u ani neu mnela snaen. Lolok abit matan of Au tite neu Tasi Maten ma lolok amunit of Au tite neu Tasi Tnanan. In nuif sin of nafo, of Au umate sin natuin sin anhamu'i ki.

²¹Kais mimtau, hoi lene-lene, amhalin ho nekam; mumnau lasi naek le UISNENO anmepu nani neu ko!

²²Hoi ale mu'it, kais mioelbom. Ale mnela nahenu nok hun le no mate. Ale hau-hau nafua nok alekot, tua min kase in fuan nok bubuk in fuan nane nathoe.

²³Hoi to abit Sion, mimlil nai! Mimlil ma mi'ba' nai! Natuin ale alekot na'ko ho UISNENO. Anbi tabu oe tene In nasanut ulan, ma tuna anbo anbi in tabu on afi ahunut.

²⁴Es nanet pana of nahenu anfani neki ane kase, tua min kase ma mina fomeni saitun of ansai anbi bale nabit.

²⁵Of Au seka ufani ho mnekut anbi ton-ton lamat nah nani ho hau sena in fuan. Natuin Au es asonu ani pukan lamat nane neu ko.

²⁶Of hi miah nok athoes talantia hi mimsen, of hi minaeb hi UISNENO, natuin In anmo'e lasi amkakat namfau neu ki. Au to nane of ka napeni anteni fa kle'at!

²⁷Es nane te Israel, of hi mihin mak Au, ok ki anbi hi atnanam, ma Au UISNENO, fani ho Uisneno. Kau mu'i anteni fa Uisneno alkun Au. Au to nane of ka nanaobon fa anteni.”

²⁸“Nalali onane te of Au usanut Au Smanan Knino neu ale atoni. Es nanet ho anfeto ma ho anmone sin of nabeno Au han manta'en sin; ale mnasi-mnasi anbi ho atnanam of napeni nanait ma of Au fe ani mnitas neu atoni ma bife munif.

²⁹Anbi tabu le nane amsa of Au usanut Au Smanan Knino amsa neu atuthaes sin atoni ma bife.”

³⁰Of Au mo'e lasi amkakat namfau anbi neno tunan ma pah pinan. Of anmu'i maopan na', ai pina ma masu naek.

³¹Manas of namesok' ma funan of amtasa onle na'. Ale lasi nane of anbol nahun na'ko Neno UISNENO nane anbol, neno le neki amtaus ma hakataus!

³²Mes neu sekau le antoti tuntakus na'ko UISNENO, in of napeni honis. UISNENO nakua a'an nak, “Anbi Yerusalem atoni-atoni le Au beti sin of napeni honis.”