Read Uab Meto AMOS 2 Bible Online

AMOS 2 - Uab Meto bible

AMOS 2

¹UISNENO nakua a'an nak, “Amaika abit Moab nasanab tenim-teni, es nane te namneo of Au kas sin. Sin nakle'at Kesel Edom le anmate nalali ma anpukai nani in naukel ma naiti in nuifen ma notu sin anfani afu.

²Es nane te Au usanut ai neu pah Moab ma otu ani kot-kot Keriot. Atoni Moab of anmate anbi makenat in nanan, leka to'is nahan ma hunun neu makenat nane anbol.

³Ana' aplenat Moab nok in anaet sin of Au umate sin.”

⁴UISNENO nakua a'an nak, “Atoni Yehuda nasanab tenim-teni, es nane te namneo of Au kas sin. Sin an ele ma antanhai Au aplenat sin ma kan panat fa Au noina. Sin anseke ma anbeo natuin nabes neu uisneno teta le sin na'if sin nabes neune.

⁵Es nane te of Au usanut ai neu Yehuda ma otu ani kot-kot Yerusalem.”

⁶UISNENO nakua a'an nak, “Atoni Israel nasanab tenim-teni, es nane te of Au kas sin. Atoni nek amnonot le fe kan fe nafani fa sa' le in antoti, sin nasosa nalali anfani on ate. Onane amsa mo'et neu atoni amamu'it le ka nabe'i fa hen baen in tusa, maski nak tusa nane esle' ani haef pasan mese le in upan.

⁷Sin nasusu' atoni anukat le ka nane'o fa leko, nalali te ma na'loba atoni amamu'it. Amaf ma anah antup nabua nok ate bife mese, talante nalahib Au kanak le aknino.

⁸Anbi bale luli besa mese-mese, atoni-atoni sin antup neki sobalu le sin naiti anfani soi tusa na'ko atoni amamu'it. Anbi Ume Uisneno sin ninu tua min kase le sin naiti na'ko atoni le natus nok sin.

⁹Maski nak onane, hoi Au to, natuin hi Au ule'un atoni Amori le amnanun onle aijo ma le in matanin nane onle hau no' naek.

¹⁰Au upoitan ulali ki na'ko pah Mesir, ma Au topu ki amnao mituin mnela snaen ton bo'ha in a'lon. Atoni Amori sin afu Au fe ulali neu ki anfani on hi pah.

¹¹Au beti ulali fauk-fauk na'ko hi anah-anah sin he nati' anfani Mafefa knino, ma munif fauk-fauk na'ko ki hen fani atoni Nazir. Lasi nane ai kan tom fa, hoi atoni-atoni Israel? Au, UISNENO, es ukua ulali Au a'ak onane.

¹²Mes hi miunit atoni Nazir sin tua min kase, talante sin antahai sin manta'en. Ma him eka Mafefa knino sin hen kakan ma naton Au han ba'an.

¹³Tabu le i of Au tamni' ki antia afu, talantia hi minoi onle aklet he nasaeb ane kase naek.

¹⁴Amnaenat le ankeo amsa ka nafetnon fa; atoni amatanit nane in be'in of namneku, ma meo pa'e mese of ka nafetin fa in aon.

¹⁵Aklaot mese of kan hake na'ki fa, amnaenat le ankeo of ka nafetnon fa, ma asae bikase of sin naenan amsa.

¹⁶Anbi neno le nane meo pa'e abalanit of nafetin in kenat ma in naen. Au, UISNENO, ukua ulali Au a'ak onane.”