Read Uab Meto AMOS 4 Bible Online

AMOS 4 - Uab Meto bible

AMOS 4

¹Amnen nai hoi fenai-fenai apokat Samaria onle bijae apokat anbi Basan! Hi misusu' atoni aolet, hi minisi atoni amamu'it sin, ma him toti hi mone sin he naloitan tua amafut neu ki piut!

²Au, UISNENO Anesit Afinit, UISNENO knino kun, ma Au manta'en ulali ak anbi tabu mese of Au hel eki ki eki kai besi; hi alki of onle ika anbi tanu.

³Of Au tite ki neu lanan Hermon ma polin upoitan ki, mese-mese of anpoi natuin baki lape le anhaumak in. Au UISNENO ukua ulali Au a'ak onane.”

⁴UISNENO Anesit Afinit nakua a'an nak, “Hoi to Israel! Amnao nai meu bale luli besa anbi Betel, ma mo'e nai sanat anbi nane. Amnao nai meu Gilgal, ma mo'e nai sanat nok sa' le him lomi! Mitulu fua tulu nai anbi nok-noka, ma meki batis bo'mese na'ko ale hi mepu in nesan anbi neno tenu in nanan!

⁵Mitulu nai u'tunu anfani on seun banit neu Kau, ma mimolok nai mak him sato milali hi fua tulu! Namneo lasi nane of hi malin he mo'e mani!

⁶Au es usanut snama amnahas neu ale hi kot sin, mes hi kam mbaina aum fa meu Kau.

⁷Of Au ka usanut fa ulan leka hau sena sin anlomi oe. Of Au usanut ulan neu kot mese ma kot bian of kahaf. Lene mese of napeni ulan, mes lene bian of meto.

⁸Anbi kot fauk-fauk in atokos sin le anmeno anmate oel, of nami oel anbi kot bian, mes oel nane ka naleko fa neu sin. Maski nak onane, hi of ka mibainaom fa meu Kau.

⁹Of Au usanut anin maputu ma of Au sonu kauna le nale'un hau sena ma hi lene tua min kase sin. Hau bubuk ma hi hau bub fua mina Saitun sin lamat of nah nani sin. Maski nak onane amsa, hi kam mo'e baniom fa meu Kau.

¹⁰Au usanut snama menas neu ko onle afi Au sonu ulali neu Mesir. Au umate hi li'an munif sin anbi makenat, ma nasik nan hi bikase sin. Au utua hi um-ume sin eki nuif-nuif afot. Maski nak onane amsa, hi kam fani aim fa meu Kau.

¹¹Bian na'ko ki of Au ule'un onle Au ule'un Sodom ma Gomora. Le fa anmoni anbi hi atnanam onle hau nuta le naiti na'ko ai. Maski nak onane amsa, hi kam fani aim fa meu Kau.

¹²Es nane te, hoi to Israel, of Au kas ki. Es nane te miloitan nai hem tam anbi kasat le of Au usanut neu ki!”

¹³Tubu ma anin, UISNENO es anlek sin; In naton In salit ma In tenab nane neu mansian. In alek manas ma fai, In nao natuin tubu-tubu sin tunan. UISNENO Akuasat Afinit, In kanan esle' nane.