Read Uab Meto AMOS 6 Bible Online

AMOS 6 - Uab Meto bible

AMOS 6

¹Amle'ut neu ki le hi moni nok alekot anbi Sion, ma hi le amoni nok tainine anbi Samaria — hi hoi mnasi-mnasi anesit na'ko pah Israel, to nem neu ki he nati' antoti babat ma tuntakus!

²Amnao nai ma amkiso anbi Kalne, ma amnao mat piut neu kot Hamat le anaek nane, namuni te neu kot Gad anbi Filistin. Oni anbi ho tenab kot-kot nane naleko nesi na'ko plenat Yehuda ma Israel? Ai sin pah anaek anesin ho pah ka?

³Hi nek men fe namanun ma snama nane fe na'lo, mes hi mo'et-mo'et nane of na'napa neno amle'ut nane.

⁴Amle'ut neu ki le him tup anbi hala amasat ma mo'e buat meki sisi bijae ma bibi kase le fe tipu!

⁵Hi malin he nati' maiti sit, onle Nai Daud anmo'e nani, ma him si sit nane nok bae heo ma leku.

⁶Hi minu tua min kase na'ko klas le nahenu, ma him pake min fomeni alekot, mes hi nekam kan tu' fa neu Israel nane naskuku nani.

⁷Es nane te ahun-hunut of Au aiti uhunun ki neu bale mapolin. Hi buat-buat ma hi ekut sin of namsopu.

⁸Nok amneot UISNENO Akuasat ma Anesit Afinit namnaub sin nak, “Au uto'an to Israel natuin sin nanaebok; Au ka malin fa neu sin sonaf-sonaf amasat sin. Sin kot ainaf nok ale sa' le anbi in nanan of Au una'at ani neu musu.”

⁹Leka fe anmu'i atoni bo'mese le natolo' anbi ume mese in nanan, sin of anmaten amsa.

¹⁰Na'ko sin es of naiti ma ansub sin of nem ma neki sin nitun anpoi. In of namolok neu atoni le anbi ume nane in kotin nak, “Oni fe anmu'i anteni atoni le anmoni naik na'ko ko? Ma of in nen han taes nak, “Kahaf!” Atoni le ansub nitun le nane of namolok nak, “Kais mumolok amteni! Hit ka nabe'i fa he tek ateni UISNENO In kanan.”

¹¹Leka UISNENO In anfe In aplenat, ume-ume naek ma abaut of naskuku.

¹²Bikase nabe'i ka he naen anbi tubu fatu? Anmu'i ka atoni le anbet tasi nok bijae? Mes hi mi'klelo milali amneot nane anfani laso le neki maten ma amneot nane anfani sanat.

¹³Hi mipoibom mak him li'u miaenab milali Lodebar. Ma hi mimolok amsa mak, “Hai mu'i be'it ma matani he nati' misik man Karnaim.”

¹⁴UISNENO Anesit ma Akuasat Afinit In nakua a'an kun nak, “Of Au sonu solalus na'ko pah mata teme neu to Israel he nati' nale'un hi pah. Sin of nasusu' ki na'ko lanan nao neu Hamat anbi bian a'li antia Nonof Araba anbi bian a'ne'u.”