Read Uab Meto BILANGAN 10 Bible Online

BILANGAN 10 - Uab Meto bible

BILANGAN 10

¹UISNENO nakua a'an neu Nai Musa nak,

²“Amtao ma anmo'e to'is nua na'ko noni muti matutu he mo'en ai amboin to he nabua ai hem lenu sin hen fen he nao.

³Kalu nua sin amfu sin hanan amnanu, in otan nak nonot ok-oke mes he nabuabon neu ko anbi Au Um-ume eno matan.

⁴Mes kalu al amfu mese, in otan nak al atomatas sin es mes nabuabon neu ko.

⁵Kalu to'is nane amfu sin han tuk-tuka, nane ataka neu uf-uf anbi neno saen mes hen fen he nao.

⁶Kalu amfu sin han tuk-tuka anbi hae nua, nane ataka neu uf-uf anbi bian a'ne'u mes hen fen he nao,

⁷mes kalu hanaf le amnanu nane in otan nak nonot mes he nabuabon.

⁸To'is-to'is nane mes Ana' fuat knino sin es anfu, Nai Harun in anah-anah sin. Nane lekat lulut le mes hi mituin talante nabal-bal.

⁹Leka hi maken bi hi pah so him panat hi aom na'ko musu le anlaban ki, amfu ale to'is-to'is nane. Onane te Au, hi UISNENO, of Au tuntaku ma ufetin ki na'ko hi musu-musu sin.

¹⁰Onane amsa anbi neno-neno hi mimlil ma mimoek, esle' anbi fesat-fesat Funan Fe'u ma fesat-fesat bian, to'is nane mes amfu sin anbi tabu hi mitulu fua tulu halan neu Kau. Ma of Au tuntaku ma a bab ki. Hi UISNENO es Au.”

¹¹Anbi ton nua leka nonot Israel nasaitan nalali Mesir, anbi neno bo'nua fun nua, nope ansae na'ko Um-ume UISNENO fafon.

¹²Oke te atoni Israel sin maakatuin sin anfen ma anao nasaitan mnela snaen Sinai, ma nope nane nasnas anbi tabu sin nem antia mnela snaen Paran.

¹³Nane hae ahunut sin anfen ma anao natuin UISNENO In aplenat nao nok Nai Musa.

¹⁴Le anfen ma nao nahunu esle' to pukan le nahaofton anbi pen-pene uf Yehuda, sin maakatuin: Nai Nahason, Nai Aminadab anah in es anfani nakaf neu to pukan of Yehuda,

¹⁵Nai Netaneel Nai Zuar anah in es anfani nakaf neu to pukan uf Isakhar,

¹⁶ma Nai Eliab Nai Helon anah in es anfani nakaf neu to pukan uf Zebulon.

¹⁷Oke te anpukai Um-ume UISNENO, ma nonot Nai Gerson ma Nai Merari sin anfen ma anao ma sin es anloi Um-ume nane.

¹⁸Nalali te to pukan le nahaofton anbi pen-pene uf Ruben sin anfen ma anao, sin maakatuin: Nai Elizur Nai Syedeur anah in es anfani nakaf neu to pukan uf Ruben.

¹⁹Nai Selumiel Nai Zurisyadai anah in es anfani nakaf neu to pukan uf Simeon,

²⁰ma Nai Elyasaf Nai Rehuel anah in es anfani nakaf neu to pukan uf Gad.

²¹Oke te atoni-atoni Kehat sin anfen ma anao fun sin es anloi bale-bale knino. Leka sin nem antia um-ume bian, Um-ume UISNENO nahakeb anteni.

²²Oke te pen-pene to pukan uf Efraim natuin, maakatuin es nok es: Nai Elisama Nai Amihud anah in es anfani nakaf neu uf Efraim.

²³Nai Gamaliel Nai Pedazur anah in es anfani nakaf neu to pukan uf Manasye,

²⁴ma Nai Abidan Nai Gideoni anah in es anfani nakaf neu to pukan uf Benyamin.

²⁵Namuni te to pukan le anfen ma anao es pen-pene uf Nai Dan. Sin anfani apanat antom kotin neu to pukan ok-oke. Sin maakatuin on i: Nai Ahiezer Nai Amisyadai anah in es anfani nakaf neu to pukan uf Nai Dan.

²⁶Nai Pagiel Nai Okhran anah in es anfani nakaf neu to pukan uf Nai Asyer,

²⁷ma Nai Ahira Nai Enan anah in es anfani nakaf neu to pukan uf Naftali.

²⁸Le nane atoni Israel sin nao maakatuin, es nok es leka sin anfen ma sin anao he natnani.

²⁹Nai Musa nak neu in baef, Nai Hibab Nai Rehuel anah nak, “Hai of amfen ma amnao meu bale le natuin a'an UISNENO In of anfe nani neu kai. UISNENO anba'an nalali lasi alekot neu atoni Israel. Es nane te mutuin kai nai, of hai amtao ma mo'e alekot neu ko.”

³⁰Nai Hobab natae nak, “Terima kasih, mes au sinmak he fani eu au kuan.”

³¹“Kais musaitan kai,” Nai Musa namolok onane, “ho nabe'i amfani ahel lanan neu kai, natuin ho muhin anbi bale me nabe'i tahakeb um-ume anbi pah asnaen.

³²Kalu ho mok, ale sa' alekot le UISNENO anmo'e neu kai, of hai mo'e amsa neu ko.”

³³Oke te to Israel anfen nasaitan Sinai, tubu bale UISNENO, sin nao neno tenu in a'lon. Peti Fef Bela UISNENO sin neki nao nahunun sin he nami bale snasat neu sin.

³⁴Leka sin anfem na anao na'ko bale snasat nope UISNENO anbi sin fafon piut anbi ne-neno.

³⁵Leka sin naiti Peti Fef Bela nane Nai Musa in nak, “Amfen nai, koi UISNENO, musiteb ma musana Ho musu sin he nati' atoni le nato'an Ko sin naen na'ko Ho humam.”

³⁶Ma leka Peti Fef Bela nane antia bale snasat, Nai Musa in nak, “Amfani aum nai, koi UISNENO, neu Ho to nifun ume Israel.”