Read Uab Meto BILANGAN 11 Bible Online

BILANGAN 11 - Uab Meto bible

BILANGAN 11

¹Anbi neno mese to nane ansakoi neu UISNENO antom ale sin lasi mafena sin. Leka UISNENO In a nen ale lasi sakoit nane, UISNENO nato' ma anfe ai nem neu sin. Ai nane anpin anbi sin atnanan ma notu nani ale bale snasat sin aon bian.

²Atoni-atoni nane sin anhunun ma ankoa antoti Nai Musa hen tuntaku sin. Nai Musa in onen toti neu UISNENO, oke te ai nane namnai.

³Fun natuin lasi nane, onane te bale nane nakanab nak Tabera, natuin anbi bale nane ai UISNENO anpin anbi sin atnanan.

⁴Anbi lanan atoni-atoni Israel nane anmu'i maselo nok atoni anao amnemat le sin nok amsa. Sin le nane ansinmak nae le'uf he nah sisi, ma atoni Israel sin amsa ansakoi. Sin nak, “Ah, bati anmu'i sisi neu kit!

⁵Hit tamnau ika le hit tah nok lum-luman anbi Mesir, fun timun, okam, utan, pania, peo me' ma peo muti!

⁶Katit fa be'it ma matani anbi kit natuin kan mu'i fa mnahat al mak-muti le hit tit.”

⁷Mak-muti nane in masan onle hau fua an-ana, in masan muti hum mol-molo.

⁸Anbi fai mak-muti nane anmofu bua'-bua' nok akun anbi bale um-ume. Nok-noka fa te atoni Israel sin nao am nem he nabuab nani, oke te sin anfole ai napau anfani ut, ma sin anmo'e anfani kokis le akbubu. In minan onle kokis le anse'i nok mina bub fua mina.

¹⁰Nai Musa in nen atoni-atoni Israel nane sin namunu, ma sin anhake pukan-pukan anbi sin um-ume enon. Oke te UISNENO In to'as ansae talante Nai Musa nekan nasusbon.

¹¹Oke te in nak neu UISNENO nak, “Nansa' Ho mususab kau onle i? Ai Ho kam lomi kau fa ka? Nansa' Ho muna'at kau sutais neu ale atoni nane ka?

¹²Au es u apus ai u honis ka? Nansa' Hom lenu kau au fani onle apanotes le au uskau li'an-ana, talante au mes he panat sin piut-piut anbi lanan i in a'lon neu pah le Hom ba'an neu sin am uf sin?

¹³Amkiso, sin nakbit'on piut antoti sisi. Anbi bale me ka au mes he ami sisi neu atoni amfaun nane ka?

¹⁴Au ka ube'i fa he sutai neu sutais mafena nane; sutais nane ma'fen le'uf neu kau!

¹⁵Leka UISNENO Ho mo'e kau piut onle i, amnek ma mumnau kau fa; leko nesi mumate kau nok laba he nati' kais au sutai teni nukat le i.”

¹⁶Oke te UISNENO nakua a'an neu Nai Musa nak, “Amnibun mubuab na'ko atoni Israel mnasi bo'hitu le ansimo sin on anakaf neu to. Meki sin nem neu Au humak ma Au matak anbi Au Um-ume, oke te amlenu sin anhake anbi ho aom bian.

¹⁷Of Au sanu ma Au umolok ok ko anbi bale nane, ma kuasat bian le Au fe ulali neu ko, of Au fe ani neu sin. Nok nane te sin anbab ko anloi sutais na'ko nonot i, ma ka nabe'i fa he hom loi mes-mese kum.

¹⁸Muton nai lasi i neu nonot nane mak: Miknino hi aom neu neno noka; hi of miah sisi. UISNENO In nen nalali ki him kae ma amsakoi he miah sisi, ma hi mak hi monim naleko nesi tabu him bi Mesir. Es nane te UISNENO of anfe neu ki sisi, ma nabe'i hi miah.

¹⁹Hi of miah ka al fa neno mese ai neno nua, ai neno nim, ai neno bo'mese, ai ka al fa neno bo'nua,

²⁰mes of hi miah anbi funan mese in a'lon talante hi mimen ma amlo natuin sisi nane. Lasi nane anbol natuin him tite milali UISNENO le anbi hi atnanam. Ma natuin amsa him kae milali anbi In human In matan ma amsakoi neu hi misaitan milali pah Mesir.”

²¹Oke te Nai Musa nak neu UISNENO nak, “To le au na' sin le i sin amfauken atoni 600.000. Ho mukua Ho a'am onme fun Ho mak of Hom fe neu sin sisi nok athoes anbi funan mese in nanan?

²²Bijae ma bibi kase amfaune onle nane es me ka le mes malolo he nati' namsenab sin? Ai ale ika anbi tasi nanan nanokbon hem fe neu sin he nati' sin nah?”

²³UISNENO natae nak, “Ai Au kuasat nane antu' ma anheu ka? Of ho mit nok manoe sa' le Au umolok le i of namneo hen bol ai kahaf!”

²⁴Fun Nai Musa anpoi ma natiaba neu to nane sa' le UISNENO naton nalali. Nai Musa nabuab mnasi bo'hitu nane ma anlenu sin anhake anfun natef Um-ume UISNENO.

²⁵Oke te UISNENO ansanu anbi nope nanan ma nakua a'an neu Nai Musa. UISNENO naiti kuasat bian na'ko le In anfe nalali neu Nai Musa ma In anfe neu mnasi bo'hitu nane. Leka Smanan UISNENO ansanu neu sin, sin al-al sin anhunun ma ankakan on mafefa knino, mes ka lo fa.

²⁶Sin nua na'ko mnasi bo'hitu le nane, Nai Eldad ma Nai Medad, sin nabala anbi sin um-ume ma ka nao nabua fa nok bian neu Um-ume UISNENO. Anbi sin um-ume nane Smanan Knino ansanu neu sin, ma sin nua sin amsa nabeno on mafefa knino.

²⁷Oke te atoni munif mese in naen anpoi ma natonan Nai Musa sa' le anbol neu Nai Eldad ma Nai Medad.

²⁸Nai Yosua Nai Nun anmone, le antuntaku Nai Musa na'ko in fe munif, in nak neu Nai Musa nak, “Amlenu sin he sin nasnasan, Ama!”

²⁹Nai Musa natae nak, “Nansa' ho mutenab neu kau? Au upane ma ufnek he nati' UISNENO anfe In Smanan neu In to ok-oke, ma anmo'e sin al sin ok-oke anfani mafefa knino!”

³⁰Oke te Nai Musa anfani neu um-ume bale snasat nok mnasi bo'hitu nane.

³¹Nok askeken UISNENO anfe anin nem na'ko tasi; anin nane neki kol pui le naplel pal-pola oni meter mese amnanun na'ko nain. Kol pui sin naplel anbi um-ume bale snasat fafon kilo fauk-fauk a'lon anhaumak bale nane.

³²Anbi neno nane in a'lon, ma fai nane in a'lon talante noka fa anfani in a'lon, ale atoni sin nahelnok ma sin anheke kol pui. Atoni mese oni anheke nan kol pui kilo nifun mese. Ale kol pui nane sin anhoi funam natef um-ume bale snasat he nati' anmeto.

³³Leka fe anmu'i sisi anaek he sin anbukae, UISNENO In nato'an to nane ma anfe menas anaek mese nem neu sin.

³⁴Es nane te bale nane nakanab nak “Nitu nate Apalu ai Akomat”, natuin anbi bale nane ansub ale atoni le anmate natuin palu ai komat.

³⁵Na'ko bale nane sin natnani neu bale Hazerot, oke te sin nahakeb um-ume bale snasat anbi bale nane.