Read Uab Meto BILANGAN 16 Bible Online

BILANGAN 16 - Uab Meto bible

BILANGAN 16

¹Nai Korah Nai Yizhar na'ko nonot Nai Kehat, uf Lewi, in anlaban Nai Musa. In napeni tuntakus na'ko atoni tenu na'ko uf Ruben, es kanan Nao Dotan ma Nai Abiram Nai Eliab in anah sin, ma Nai On Nai Pelet anah, ma atoni 250 nakaf atomatas le to anbeti sin.

³Sin nabua ma nao neu Nai Musa ma Nai Harun ma sin nak, “Namautu nai, Musa! To Israel ok-oke anbeti nateta sin neu UISNENO, ma UISNENO anbi hit sonak hit tananak ok-oke. Mes nansa' es ho maiti kum ho aom namnanu nesi na'ko to UISNENO?”

⁴Leka Nai Musa in anen lasi nane, in naluli nabes ante nain ma in onen toti neu UISNENO.

⁵Oke te in nak neu Nai Kotah ma in atuin-atuin sin nak, “Noka fa UISNENO of nalile neu kit sekau In-ini kun ma sekau es anbeti nateta nani neu In. Atoni le In anbeti nateta nani In of ankolan atoni nane hen haumak In.

⁶Nati' noka fa ho ma ale ho atuin le natuin ko mes hi maiti bale-bale ai ma amtao ai flae ma atu fomeni, ma meki neu baki tulu. Leko hit atkiso neu sekau ka na'ko hit le i esle' UISNENO anbeti. Namautu nai onane, hoi atoni-atoni Lewi!”

⁷

⁸Anesi na'ko nane te Nai Musa nak neu Nai Korah nak, “Amnen nai atoni-atoni Lewi!

⁹Ai hi mitenab i lasi an-ana nak Uisneno Israel anbeti ki na'ko atoni-atoni Israel he nati' hi nabe'i amhaumak In, ma ma hi mepu anbi In Um-ume, ma hi mepu neu to Israel ma amtuthae sin?

¹⁰Ho, Nai Korah, ma atoni Lewi ok-oke hi mipeni milali lasi tola nane na'ko UISNENO — ma tabu i him toti nok matani hem fani Ana' fuat knino amsa!

¹¹Kalu ho mok ho atuin-atuin sin hi mi'munu ma miakan Nai Harun, namneo-namneo him laban UISNENO!”

¹²Oke te Nai Musa anlenu no'en Nai Datan ma Nai Abiram, mes sin nak, “Hai kam lomi fa he met!

¹³Fe ka nanokbon fa ka ho meki kai ampoi mi'ko pah Mesir le maafa nane neu hem lolo kai anbi mnela snaen le i? Ho mes he muplenat kai amsa ka?

¹⁴Namneo-namneo ho ka meki kai fa neu pah maafa, ai amfe neu kai mnuke ma lene tua min kase hen fani hai bale bela. Tabu le i hom lomi he mu'kake kai! Kahaf, hai kam lomi fa he met!”

¹⁵Nai Musa in nato' nae le'uf kun ma in nak neu UISNENO nak, “Koi, UISNENO, kais amsimo sin fua tulu nane. Au ka uneku it fa sa' es amsa na'ko sin; ai sin bikase luke mnanu mese amsa au ka aiti itfa amsa na'ko sin.”

¹⁶Oke te Nai Musa nak neu Nai Korah nak, “Noka fa te ho aum nai meu Um-ume UISNENO mok ho atuin sin 250. Nai Harun amsa in of nem anbi nane. Hi mes meki hi bale ai mese-mese. Amtao atu fomeni anbi in nanan, oke te mitulu neu UISNENO.”

¹⁷

¹⁸Onane te atoni mese-mese naiti in bale ai, ma antao ai flae ma atu fomeni oke te anhake anbi Um-ume UISNENO in enon nok Nai Musa ma Nai Harun.

¹⁹Nalali te Nai Korah in nibun to ok-oke, ma sin anhake anbaina neu Nai Musa ma Nai Harun anbi Um-ume UISNENO in enon.

²⁰Oke te UISNENO nakua a'an neu Nai Musa ma Nai Harun nak,

²¹“Mi'lo nai mi'ko atoni-atoni nane; Au lomi he ule'un sin anbi tabu le i amsa.”

²²Mes Nai Musa ma Nai Harun sin naluli nabes ma sin nak, “Koi Uisneno, Ho es amfe monit neu ale amonit. Kalu al atoni mese es nasanab, nansa' Ho muto'an ale to ok-oke?”

²³UISNENO nakua a'an neu Nai Musa nak,

²⁴“Amlenu atoni-atoni nane he sin na'lo na'ko um-ume Nai Korah, Nai Datan ma Nai Abiram.”

²⁵Oke te ale nakaf Israel sin anao nabua nok Nai Musa neu bale Nai Datan ma Nai Abiram.

²⁶Nai Musa nak neu atoni Israel nak, “Mi'lo mi'ko um-ume atoni-atoni amle'ut le i ma kais amle'o sa' amsa na'ko sin ini. Kalu hi ka mituin fa, of nale'un ki al ki mok sin natuin sin sanat-sanat nane.”

²⁷Oke te atoni-atoni Israel nane sin na'lo na'ko um-ume Nai Korah, Nai Datan ma Nai Abiram. Nai Datan ma Nai Abiram sin anpoi nalali na'ko sin um-ume ma sin anhake anbi sin um-ume mese-mese enon nok sin anah ma sin fe.

²⁸Oke te Nai Musa nak, “Nok lasi i of hi mihin nak UISNENO ansonu nalali kau he mo'e ale lasi i ma ale lasi nane ka natuin fa Au lomik anmes.

²⁹Kalu atoni-atoni nane anmate natuin in lanan kun, ka nok fa kasat sa'-sa' na'ko Uisneno, nane anfani ataka nak UISNENO kan sonu kau fa.

³⁰Mes kalu UISNENO anmo'e sa'-sa' es le hi fe kan nen mite fa, ma kalu nain in natfai hen olo nan sin nok ale sin amu'in, talante sin antam nok a honis anbi pah atoni amates, hi mihin nai nak atoni-atoni nane sin anlaban UISNENO.”

³¹Fe' Nai Musa na'uab nasopu onane te, nain anbi sin haek enu le sin anhake anbine natfai,

³²ma an olo nan sin nok sin ume nanan sin ma ale atuin Nai Korah, ma ale sin amu'in.

³³Sin anmofu antam nok a honis neu pah atoni amates ma ale sin amaus ok-oke. Nain le natfai antobe nafani on, ma pah an olo naneku sin.

³⁴Ale atoni Israel le anbi le nane sin naen na'ko bale nane leka sin nen sin ankoa nak, “Maen! Nain of an olo nan kit!”

³⁵Oke te UISNENO anfe ai nem ma notu nani atoni 250 le natulu fua tulu atu fomeni nane.

³⁶Oke te UISNENO nakua a'an neu Nai Musa nak,

³⁷“Amlenu Nai Eleazar Nai Harun Ana' fuat knino in anah he nati' in naiti bale-bale ai flae nesif na'ko ai mnotu nane ma ampolin sin atu afu nane neu bale teta, natuin bale ai nane in aknino kun. Ale bale nane esle' fua tulu atoni-atoni le ankas sin ma anmate nalali natuin sin sanat. Ale bale nane knino natuin natulu nalali sin anbi UISNENO In human, es nane te mes amtutu sin anfani bale manihis hen fani amut baki tulu in kotin. Lasi nane of anfani mnaut ai ataka neu to Israel.”

³⁸

³⁹Onane te Ana' fuat knino Nai Eleazar in naiti ale bale ai flae nane ma anlenu atoni ma antutu sin anfani manihis neu amut baki tulu in kotin.

⁴⁰Nane anfani mnaut ai ataka neu to Israel nak al Nai Harun in sufan, ka nabe'i fa atoni mese amsa he nem neu baki tulu he notu atu fomeni neu UISNENO. Atoni le antanhai lekat lulut nane of nale'un nani on Nai Korah ma in atuin-atuin sin. Ale nane ok-oke nanaoba nani onle UISNENO anfe plenat neu Nai Eleazar nao nok Nai Musa.

⁴¹Noka fa onane te to Israel ok-oke na'munu ma naakan Nai Musa ma Nai Harun. Sin nak, “Hi mimate milali UISNENO In to.”

⁴²Fe' sin nibun nabuabon anlaban Nai Musa ma Nai Harun, sin anik neu Um-ume UISNENO, ma sin nit nope an amu nan Um-ume nane, oke te sin ankiso nit UISNENO In pinan anbi nane.

⁴³Nai Musa ma Nai Harun sin anao neu Um-ume UISNENO matan,

⁴⁴oke te UISNENO nak neu sin nak,

⁴⁵“Mi'lo nai mi'ko atoni-atoni nane. Au of ule'un sin anbi bale le i amsa!” Sin nua sin naluli nabes,

⁴⁶oke te Nai Musa nak neu Nai Harun nak, “Maiti ho bale ai flae, amtao ai flae na'ko baki tulu ma amtao atu fomeni anbi in fafon. Meki amnao nai nok manoe amtao ma anmo'e luli besa sako sanat neu sin. Labah nai! To'as UISNENO anpin nalali ma menas anfatan nalalien.”

⁴⁷Nai Harun antao ma anmo'e sa' le Nai Musa anlek nane. In naen antam neu to sin atnanan le fe sin nibun nabuabon ma le menas antoman nalali sin. Nai Harun antao atu fomeni neu ai flae, ma nanaoba luli besa sako sanat neu to.

⁴⁸Menas nane nasnas, ma Nai Harun in anbi atoni-atoni le fe anmoni ma le anmate nalali sin atnankenu.

⁴⁹Amates anbi tabu nane atoni 14.700, kan so'i fa sin le anmate natuin Nai Korah.

⁵⁰Leka menas nane nasnas, Nai Harun anfani neu Nai Musa anbi Um-ume UISNENO in eno matan.