Read Uab Meto BILANGAN 17 Bible Online

BILANGAN 17 - Uab Meto bible

BILANGAN 17

¹UISNENO nakua a'an neu Nai Musa nak,

²“Amlenu atoni Israel anfe neu ko tias bo'es am nua, uf mese te tias mese, le nakaf uf nane es mes nana'at nani. Amtui kanaf anakaf uf mese-mese neu in tias,

³ma Nai Harun in kanan neu tias uf Lewi. Neu nakaf uf mese-mese mes anmu'i kun in tias.

⁴Meki tias-tias nane neu Au Um-ume ma amtao sin anbi Peti Fef Bela in matan bale le Au u eku ma utef ok ki.

⁵Tias atoni le Au beti ani of nasuf. Nok lasi nane te of Au usnasab han sakoit le piut-piut sin na'munu ma naakan ki.”

⁶Lasi nane Nai Musa nanaoba neu atoni Israel. Oke te ale sin anakaf nana'at neu Nai Musa tias mese na'ko uf mese-mese. Bua'-bua' ok-oke tasi bo'es am nua ma Nai Harun in tias anbi ale tias-tias nane.

⁷Oke te Nai Musa antao tias-tias nane anbi Um-ume UISNENO in nanan anbi Peti Fef Bela.

⁸Noka fa onane te, leka Nai Musa antam neu Um-ume UISNENO in nanan, in nit neu Nai Harun in tias nane tias na'ko uf Lewi, in nasuf nalali. Tias nane sufa teme, sufan natbo ma napoitan fuan le namnasi ma namnatu!

⁹Nai Musa naiti ale tias nane ok-oke nalali te nalile ma naton sin neu atoni Israel. Sin nit sa' le anbol nalali, oke te anakaf mese-mese naiti nafani in tias.

¹⁰Nalali te UISNENO nakua a'an neu Nai Musa nak, “Mubela mufani Nai Harun in tias anbi Peti Fef Bela in matan. Tias nane mes mubela anfani on lasi amnaut ma ataka neu atoni Israel alaban nane sin of anmate kalu sin ka nasnas fa na'munu ma naakan.”

¹¹Nai Musa nanaoba sa' le UISNENO naplenat.

¹²Oke te atoni Israel nak neu Nai Musa nak, “Kalu onane, hai mimle'u! Hai of amate!

¹³Kalu atoni le anhaumak Um-ume UISNENO mes anmate, onane te katit fa panet ma fnekat anteni neu kai!”