Read Uab Meto BILANGAN 18 Bible Online

BILANGAN 18 - Uab Meto bible

BILANGAN 18

¹UISNENO nakua a'an neu Nai Harun nak, “Ho, ma ho anah-anah sin ma atoni-atoni Lewi mes amsutai ale sanat in amnekin le anbol anbi Au Um-ume in nanan, mes al ho ma ho anah-anah sin le mes ansutai ale sanat anbi mepu Ana' fuat knino sin.

²Ho bia ma ho benu, uf Lewi amhel mutam sin nok, on atuntakus anbi ho munaoba mepu ma ho anah-anah sin mepu.

³Uf Lewi sin mes nanaoba mepu ma sutais neu ki ma anmepu sin mepu anbi Au Um-ume, mes sin ka nabe'i fa anhaumak baki tulu ai anle'o ale bale le aknino anbi Ke'an Knino. Leka sin antanhai lekat lulut nane, leko sin ma hi amsa of amate.

⁴Sin mes anmepu bua'-bua' nok ki ma nanaoba mepu-mepu le anmu'i malutas nok ale tuthaes anbi Au Um-ume nanan, mes le ho kam fe fa kuasat neu sin mepu nane, mukain sin he kais anmepu bua'-bua' nok ki.

⁵Al ho, Nai Harun ma ho anah-anah sin le mes minaoba mepu anbi Ke'an Knino ma baki tulu, he nati' kais Au uto'an to Israel.

⁶Namneo-namneo, Au beti ulali ho bia ma ho benu sin atoni-atoni Lewi na'ko to Israel on sa' alekot mese le Au fe ani neu ki. Au beti uteta ulali sin neu Kau, hen tuthae anbi Au Um-ume.

⁷Mes al ho ma ho anah-anah sin le nabe'i minaoba mepu on Ana' fuat knino, anbi ale mepu le anmalutnok baki tulu ma sa' le anbi Ke'an Knino Le'uf. Nane hi sutais, natuin Au fe ulali ki toko' on Ana' fuat knino. Sekau am sekau le kan mu'i fa kuasat nane mes namate nani leka anhaumak ale bale knino nane.”

⁸UISNENO nakua a'an neu Nai Harun nak, “Mumnau nai! Ale fua tulu le anbeti nateta ma anfe neu Kau le ka notu nani fa, nane neu ko. Nane ho pa' ma ho nama' le natetab nalali talante nabal-bal. Nane Au fe ani neu ko ma neu ho sanut mofut sin.

⁹Na'ko ale fua tulu le aknino le'uf le ka notu nani fa anbi baki tulu, le i sin neu ko: Fua tulu bukae, fua tulu sakot sanat ma fua tulu ma fua tulu seka amnekut. Ale nane fua tulu aknino le anfani ho pa' ma ho nama' ma neu ho anah-anah sin.

¹⁰Nane knino neu ko, es nane te hi mes ambukae mani anbi bale le aknino amsa. Al naimone es nabe'i hen bukae nani.

¹¹Ale fua tulu bian le anbeti nateta nani le atoni Israel natulu neu Kau, nane neu ko amsa. Au fe ani neu ko ma neu ho anah-anah sin anmone ma anbife. Lekat lulu nane nanaobon talante nabal-bal. Ale ho ume nanan sin le ka nale'un fa sin aokenu nabe'i sin anbukae amsa.

¹²Au fe neu ki ale alekot anesit le leok le'uf na'ko abul ahunut le atoni Israel natulu neu Kau anbi ton-ton, esle' mina bub fua mina, tua mina mtasa ma ane kase.

¹³Ale nane neu ko. Ale ho ume nanan sin le ka nale'un fa sin aokenu nabe'i sin anbukae amsa.

¹⁴Ale sa' le anbi pah Israel la anbeti nateta nani neu Kau, nane neu ki.

¹⁵Ale atoni ai mu'it le nahonis nahunun le atoni Israel natulu neu Kau, nane neu ki. Mes hi of amsoi hi an-ahunut sin, mu'it alahit an-unu of hi amsoi amsa.

¹⁶Ale hi anah sin mes hi amsoi sin leka uan funan mese. Osaf le natetab neu lasi nane esle' noni muti nim, natuin osaf le nanaobon anbi Au Um-ume.

¹⁷Mes an-unu na'ko bijae, bibi kase ma bibi, ka nabe'i fa he him soi. Mu'it nane al neu Kau ma mes natulu nani. Ampofin in na' nane neu baki tulu ma motu in balun on fua tulu. In fon anhalin Au nekak.

¹⁸In sisi nane neu ko, onle abasan ma pusun a ne'u na'ko tulu le natnat nani neu Kau.

¹⁹Of ante nabal-bal, ale fua tulu le anbeti nateta nani le atoni Israel neki neu Kau, Au fe ani neu ki ma neu hi anah-anah sin anmone ma anfeto. Lekat lulut nane nanaobon talante nabal-bal ma anfani lasi mafutus manta'en le ka nabe'i fa he natfek anbi Au ma ho sufam sin.”

²⁰UISNENO nakua a'an neu Nai Harun nak, “Hi ka mipeni fa pa' ma nama' sa'-sa'. Anbi pah le Au ba'an neu ki nane katit fa nain pisa mese le anfani ho ini. Au, UISNENO, nane Au fani hi pa' ma hi nama'.”

²¹UISNENO nakua a'an neu Nai Harun nak, “Ale fua tulu batis bo' mese na'ko atoni Israel au fe ani neu atoni-atoni Lewi. Nane sin pa' ma sin nama' neu sin mepu anbi Au Um-ume.

²²Atoni-atoni Israel bian ka nabe'i fa anteni anhaumak Um-ume nane he nati' sin kais ansutai sanat ma lasi kasat amaten neu sin.

²³Naubon na'ko tabu le i al atoni Lewi esle' nabe'i anmepu anbi Au Um-ume ma anloi lasi sutais ok-oke neu mepu nane. Lekat lulut nane nanaobon amsa neu ho sufam talante nabal-bal. Atoni Lewi kan mu'i fa pa' ma nama anbi Israel,

²⁴natuin sin pa' ma sin nama' Au fe ulali neu sin ale fua tulu batis bo' mese le atoni Israel natulu neu Kau on fua tulu le anbeti nateta nani neu Kau. Es nane te antom atoni Lewi Au ukua Au a'ak neu sin nak sin of ka napeni fa pa' ma nama' anbi Israel.”

²⁵UISNENO anlenu Nai Musa

²⁶he natiaba plenat i neu atoni Lewi: Leka him simo na'ko atoni Israel fua tulu batis bo' mese le UISNENO nana'at nani neu ki neu hi pa' ma hi nama', hi mes mitulu in batis bo' mese neu UISNENO neu hi fua tulu le anbeti nateta nani.

²⁷Fua tulu le anbeti nateta nane anso'i nani papmese nok fua tulu ane kase fe'u ma tua mina mtasa fe'u.

²⁸Nok nane te hi amsa mes mitulu neu fua tulu le anbeti nateta nani neu UISNENO pa' mese na'ko fua tulu batis bo' mese na'ko atoni Israel. Fua tulu le anbeti nateta nane hi mes mina'at mani neu Ana' fuat knino Nai Harun.

²⁹Amfe nai pa' le leok le'uf na'ko sa' le him simo.

³⁰Leka hi mina'at milali, nabe'i hi maiti in nesin, on atoni amepu lene mese amsa naiti sa' le anesi leka in neki nalali in fua tulu.

³¹Le nesif nane nabe'i hi miah anbi me amsa bua'-bua' mok hi ume nanan sin, anfani on seunbanit neu hi mepu anbi Um-ume UISNENO.

³²Hi ka misanab fa leka hi miah mani, al nahunu na'ko nane pa' le leok le'uf nane hi mitulu milali neu UISNENO. Kais mile'un fua tulu knino atoni Israel nok hi miah sa' es na'ko fua tulu nane na'ko pa' le leok le'uf nane anbeti nateta nani neu UISNENO. Leka him tanhai plenat nane, of hi mate.