Read Uab Meto BILANGAN 21 Bible Online

BILANGAN 21 - Uab Meto bible

BILANGAN 21

¹Arad nane kot mese anbi neno kabenan a ne'u pah Kanaan. Leka kesel kot nane in nen nak atoni Israel sin nem ma sin he nao nok lanan Atarim, in nao ma anlaban sin ma anheke nan atoni fauk-fauk na'ko sin.

²Oke te atoni Israel sin anmanba'an on i neu UISNENO nak, “Leka Hom fe kai mnisat anaek neu kai antom uf nane, sin ma sin kot of hai mile'un mani sin ok-oke.”

³UISNENO ansimo han totis atoni Israel ma anbab sin ma sin nis ma anbe'u atoni Kanaan. Atoni Israel nale'un atoni-atoni Kanaan nane ma ale sin kot-kot sin, oke te bale nane sin nakanab nok Horma.

⁴Namuni te atoni Israel sin nasaitan Tubu Hor, ma sin anao natuin lanan neu Tasi Akaba, hen funam natef pah Edom. Mes anbi lanan atnanan, to nane sin lasi neka none oke,

⁵ma sin na'munu ma naakan UISNENO ma Nai Musa. Sin na'uab nak, “Nansa' ho meki kai ampoi mi'ko Mesir? Ai Ho hem lolo kai anbi mnela snaen le i? Anbi i katit fa mnahat, ma oe amsa katit fa. Haim len nok maka nim oe le i!”

⁶Oke te UISNENO anfe kaun koko malaso nem neu to nane sin atnankenu. Atoni Israel namfau anmate natuin kaun koko nane ansau sin.

⁷Oke te to nane nem neu Nai Musa ma sin nak, “Hai misanab milali natuin hai mi'munu ma miaakan UISNENO ma ho amsa. Amonen toti nai neu UISNENO he nati' ale kaun koko i na'lo na'ko kai.” Oke te Nai Musa in onen toti namnau to nane.

⁸Oke te UISNENO anlenu Nai Musa anmo'e kaun koko mese na'ko noni molo ma antao neu ni mese in tunan. Sekau le kaun koko ansau in, of in naleko leka in ankiso neu kaun koko noni molo nane.

⁹Ma Nai Musa anmo'e kaun koko na'ko noni molo ma antao neu ni mese in tunan. Ma sekau le kaun koko ansau in, nabe'i in naleko leka in ankiso neu kaun koko noni molo nane.

¹⁰Atoni Israel sin anfen ma sin anao anteni, oke te sin nahakeb um-ume snasat anbi kot Obot.

¹¹Leka sin nasaitan bale nane, sin nahakeb um-ume anbi fatu tutnae Abarim anbi mnela snaen neno saen pah Moab.

¹²Nalali te sin nahakeb um-ume anbi Anonof Zered.

¹³Na'ko nane sin anfen ma anao anteni ma nahakeb um-ume anbi Noe Arnon aon bian, anbi mnela snaen nakat nok pah atoni Amori. Noe Arnon nane anfani nakat nok pah atoni Amori.

¹⁴Es nane te anbi ‘Sulat Makenat UISNENO’ matui nak, “... Kuan Waheb, anbi pah Sufa ma in anonof sin; Noe Arnon

¹⁵ma anonof-anonof un le menuan talantia kuan Ar ma an ali nao neu nakat pah atoni Moab.”

¹⁶Na'ko nane sin anao neu bale le antek nak Beer, in otan nak oe mata-oe mata. Anbi bale nane afi UISNENO nakua a'an neu Nai Musa nak, “Amlenu to sin he nabua; of Au fe oe neu sin.”

¹⁷Anbi tabu nane to Israel sin ansi sit i, “Koi, oe mata-oe mata, ambobok ho oe, ansae nai, of haim simo nok sit pules.

¹⁸Oe mata le hai mnasi-mnasi sin anhani ma ale hai nakaf-kaf to sin anhani neki tias ana' aplenat ma neki tias ataka ana' kuasat.” Na'ko mnela snaen sin natnani neu Matana,

¹⁹ma na'ko nane sin anao neu Nahaliel, oke te sin anao neu Bamot,

²⁰oke te sin anfani neu nonof anbi pah atoni Moab, anbi Tubu Pisga tunan le antae ansanu anbaina neu mnela snaen.

²¹Oke te to Israel ansonu haef neu Nai Sihon, kesel Amori, he natiaba uab i nak,

²²“Mufetin kai he haim nao mituin hai Usif ko ho pah. Hai ma hai mu'it of kam beo fa mi'ko lanan ma of hai kam tam fa meu ale ho mnuke ma ho lene tua min kase sin ai hai minu oe na'ko ho oe mata sin. Hai of kam beo fa mi'ko lan opat talantia haim poi mi'ko hai Usif ho pah.”

²³Mes Kesel Sihon ka nafetin fa atoni-atoni Israel he sin anfini nao nok in pah. In nibun nabuab in to meo ok-oke nalali te sin anao neu Yahas anbi mnela snaen ma sin anlaban atoni Israel anbi nane.

²⁴Mes anbi makenat nane atoni Israel sin namate solalus atoni Amori namfau. Oke te atoni Israel sin antoko sin pah na'ko Noe Arnon talantia Noe Yabok, nakat pah atoni Amon, natuin sin pah nakat nane sin anpao nok matani.

²⁵Nok nane te atoni Israel sin antet nan ale atoni Amori sin kot anso'i nok Hesybon ma ale kot ana sin oke te sin nabala anbi nane.

²⁶Hesybon nane kot ainaf Kesel Sihon. In afi anmaken ma anlaban kesel Moab ma antet nan in pah talantia Noe Arnon.

²⁷Es nane te amanaiti nel sin nak, “Aim nai meu Hesybon, meu kot Kesel Sihon. Hai amsinmak hem kiso kot i nafena ma naleko nafani.

²⁸Fun hae mese na'ko kot i Nai Sihon in to meo sin anfen ma anao mat on ai. Le sin nale'un kot Ar anbi Moab, ma sin naplenat tubu-tubu anbi Arnon.

²⁹Amle'ut neu to Moab, ho mumle'u! Apules Kamos, ho mumle'u! Ho uisneno nafetin ko amfani atnanis, ho to bifenu kesel Amori aheke natau sin.

³⁰Mes muni i ho sufam sin namle'u, anbi lanan na'ko Hesybon neu Dibon, na'ko Nasyim neu Nofah anhaumak Medeba.”

³¹Nok nane te Israel nabala anbi pah atoni Amori.

³²Nalali te Nai Musa anlenu atoni-atoni sin anao nami lanan le leok le'uf he sin anlak neu kot Yaezer. Oke te atoni Israel sin antet nan kot nane ma kot-kot ana' bian anteni ma anli'u atoni Amori le natua anbi nane.

³³Nalali te atoni Israel sin nabain'on ma sin anao natuin lanan le an ali nao neu Basan. Kesel Og na'ko Basan in anao nok in to meo ok-oke ma sin anlaban atoni Israel anbi kot Edrei.

³⁴UISNENO nakua a'an neu Nai Musa nak, “Kais mumtausan in. Of Au fe ko lasi mnisat. Ho mes mis ambe'u in, in to ok-oke ma in pah amsa. Amtao ma mo'e sin onle hom tao ma anmo'e mulali Kesel Sihon le naplenat anbi Hesybon.”

³⁵Atoni Israel sin nis ma anbe'u, ma anlolo namate Kesel Og, in anah-anah sin ma in to ok-oke; katit fa le he nahena mese amsa. Ma sin antoko anbi pah nane.