Read Uab Meto BILANGAN 23 Bible Online

BILANGAN 23 - Uab Meto bible

BILANGAN 23

¹Nai Bileam nak neu Nai Balak nak, “Muhakeb anbi bale' i baki fuat hitu neu kau, ma muloitan anbi i bijae keso hitu, ma bibi panis keso hitu.”

²Nai Balak anmo'e natuin onle Nai Bileam nak neune. Anbi baki fuat mese-mese nane sin natulu bijae keso mese ma bibi kase keso mese.

³Oke te Nai Bileam nak neu Nai Balak nak, “Amhake amhaumak fua tulu mnotu na'ko au Usif. Ma au fe anao he kiso ai UISNENO anlomi he naeku nok kau ai kahaf. Mes au uton neu ko ale sa' ok-oke le UISNENO naton neu kau.” Ma Nai Bileam in anao anmes neu tubu fatu mese in tunan,

⁴ma anbi nane Uisneno nem neu in. Nai Bileam nak neu Uisneno nak, “Au uhakeb ulali baki fuat hitu ma au utulu bijae keso mese ma bibi kase keso mese anbi baki fuat mese-mese nane in tunan.”

⁵Oke te UISNENO natonan Nai Bileam sa' le mes in naton, ma anlenu in anfani neu Nai Balak he natiaba neune a'an UISNENO.

⁶Nai Bileam anfani ma napeni Nai Balak fe anhake anhaumak in fua tulu mnotu, bua'-bua' nok ale anakaf Moab.

⁷Oke te Nai Bileam antek beno i nak, “Na'ko Aram, bale nuaf anbi neno saen nane, Nai Balak, kesel Moab in no'en kau, ma in nak, ‘Aum nai, mumolok nai antom kau. Amsukat to Israel nane!’

⁸Oni au he sukat ka, leka Uisneno In kan sukat fa ka? Oni au he kas ka, leka UISNENO In kan kas fa ka?

⁹Na'ko nuaf-nuaf sin tunan au it sin; na'ko neten-neten sin tunan au kiso sin. Kiso, uf mese le anmeskun uf-uf bian kan maselo fa nok sin.

¹⁰Nai Yakub in sufan onle afu skuku le kat so'i tabe'i fa; to Israel in amfaune matain le'uf. So nati' au mate on atoni amneot so nati' au uak au nalak on atoni-atoni sin uan sin nalan.”

¹¹Oke te Nai Balak nak neu Nai Bileam nak, “Hom tao ma mo'e sa' neu kau ka? Au eki ko aum meu i hem sukat au musu-musu sin. Mes hom fe kum tetus neu sin.”

¹²Nai Bileam natae nak, “Au al nabe'i u'uab sa' le UISNENO anlenu kau he au umolok.”

¹³Oke te Nai Balak nak neu Nai Bileam nak, “Aum he hit atnao bua'-bua' neu bale bian; na'ko nane nabe'i ho mit al bian na'ko to Israel. Amsukat sin na'ko nane.”

¹⁴Nai Balak neki Nai Bileam neu mnela Zofim, anbi Tubu Pisga in tunan. Anbi bale nane amsa in nahakeb baki fuat hitu ma natulu bijae keso mese ma bibi kase keso mese anbi baki fuat mese-mese fafon.

¹⁵Nai Bileam nak neu Nai Balak nak, “Ho mumaika ambi i, amhaumak au Usif ho fua tulu mnotu, ma au nao fe he utef UISNENO anbi nane.”

¹⁶UISNENO natef nok Nai Bileam ma naton neune sa' le mes in he na'uab, oke te anlenu in anfani neu Nai Balak he natiaba a'an UISNENO nane.

¹⁷Nai Bileam in anfani ma napeni Nai Balak fe anhake anhaumak in fua tulu mnotu, bua'-bua' nok ale anakaf Moab. Nai Balak in natoti sa' ka es le UISNENO naton nalali,

¹⁸oke te Nai Bileam antek beno i nak, “Hoi, Balak, Nai Zipor anmone, aum nai, amnen nai sa' le au he u'uab.

¹⁹Uisneno ka onfa atoni pah pinan le antofon nok manoe ma anlomi he namo'e. Leka Uisneno In anmanta'en, In mes nanokab nani! Leka In nakua In a'an, lasi nane mes nanokab nani!

²⁰Anlenu kau he nati' au fe tetus; ma leka Uisneno In anfe tetus, ka nabe'i fa he nati' au hel ufani.

²¹Anbi Nai Yakub katit fa amle'ut; anbi Israel kat kius tan fa mafena. ‘UISNENO sin, In nok sin. Sin antek abaf: In Kesel kun!

²²Uisneno le neki sin anpoi na'ko Mesir; onle bijae fui In anmabe'u neu sin.

²³Katit fa el amle'ut le hen toman Nai Yakub katit fa el amnitas le he nabe'i Israel. Antom nonot nane atoni of namolok nak, ‘Amkiso nai lasi mkakan le Uisneno anmo'e!’

²⁴Uf nane anfen on meo asu ainaf, ma anfen anhake nok matani on meo asu keso. In kan tup fa fe leka in fe ka neku fa in osaf ma ka ninu fa na' na'ko osaf le in anheke ma anpisu.”

²⁵Oke te Nai Balak nak neu Nai Bileam nak, “Maut nai, kalu ho kam lomi fa hem sukat to Israel, mes kais hom fe tetus neu sin!”

²⁶Nai Bileam natae nak, “Ait au ka uton ulali fa neu ko Usif neu au of anmo'e ale sa' le UISNENO naplenat?”

²⁷Nai Balak nak, “Aum he hit atnao teu bale bian. Sekau nahin nak Uisneno nafetin ko hem sukat Israel neu kau anbi bale nane.”

²⁸In neki Nai Bileam neu Tubu Peor in tunan le anbaina neu mnela snaen.

²⁹Nai Bileam nak neu Nai Balak nak, “Muhakeb baki fuat hitu anbi bale i ma muloitan anbi i bijae keso hitu ma bibi kase keso hitu.”

³⁰Nai Balak antao ma anmo'e onle Nai Bileam nak neune. In natulu bijae keso mese ma bibi kase keso mese anbi baki fuat mese-mese fafon nane.