Read Uab Meto BILANGAN 24 Bible Online

BILANGAN 24 - Uab Meto bible

BILANGAN 24

¹Nai Bileam in nahin nalalien nak Uisneno anlomi he nati' in anfe tetus neu to Israel. Es nane te in ka nao fa he nami ataka onle in anmo'e anbi ahunut. Nai Bileam ankiso an ali neu mnela snaen,

²ma in nit to Israel nasnasbon anbi um-ume pukan-pukan natuin uf-uf in to. Oke te Smanan Uisneno ansanu neu Nai Bileam,

³ma in antek beno i nak, “I a'at Nai Bileam, Nai Beor anmone, uab molok atoni mamata mese,

⁴le an nen nalali Uisneno a'an ma in nit amnitas na'ko Akuasat Afin-finit, fun in antup, mes nok mataf le natfai.

⁵Lo leok le'uf kun ho um-ume sin hoi Yakub, ma ho bale-bale maika sin, hoi Israel!

⁶Onle nonof menuan le in naufon, ai on etu anbi noe in ninen; on ekam le UISNENO ansenan, ai on aijob anbi noe in ninen.

⁷Sin napeni oe ulan nok athoes; fini le ansenan napeni oe naek. In Kesel of nis ma anbe'u nesin Nai Agag, ma in aplenat of maliaba.

⁸Uisneno es neki sin anpoi na'ko Mesir, on bijae fui in anmabe'u neu sin. Musu na'ko uf-uf of in an olo nan sin, sin nuifen of In naklati nani sin, ma sin as'anef sin of In na'ipu nani sin.

⁹Uf nane on meu asu keso ma meo asu ainaf, in nem ma in antup. Sekau es nabe'i he nafena in? So nati' atoni le anfe tetus neu ko so nati' in amsa napeni tetus, ma atoni le ansukat ko in amsa napeni sukat.”

¹⁰Nok to'as Nai Balak in nabubu in niman kalulun sin ma in nak neu Nai Bileam nak, “Au boin ko hem sukat au musu-musu sin, mes hom fe tetus neu sin antia hae tenu.

¹¹Hom nao nai anbi tabu le i, amfani nai meu ho ume! Au ba'an neu ko upa', mes UISNENO ka nafetin ko fa he hom simo upa' nane.”

¹²Nai Bileam natae nak, “Ait au ka uton ulali fa neu Usi ho haef sin ak

¹³maski au Usi anfe kau noni muti ma mnatu le anbi au Usi in sonaf, ai ka nabe'i fa he tanhai plenat UISNENO ma mo'e sa' es natuin au nekak in alomin? Au al nabe'i u'uab sa' le UISNENO anlenu he au umolok.”

¹⁴Nai Bileam nak neu Nai Balak nak, “Tabu le i au he nao fani neu au nonot. Mes fe au ka nao fa, leko au uton neu ko Usi antom sa' le nonot Israel of anmo'e neu Usi ho to anbi neno amnemat.”

¹⁵Oke te Nai Bileam in namolok nak, “Le i a'at Nai Bileam, Nai Beor anmone; uab a'at atoni mamata mese

¹⁶le in nen nalali a'an Uisneno, ma le nabe'i nahin Amnanut Afin-finit; le nit amnitas na'ko Akuasat Afin-finit le in antup mes nok matan natfai.

¹⁷Au it in, mes ka tabu i fa; au it in, mes na'ko lo. Kesel mese nem na'ko Israel, of in nem on afkun apinat. Ale uisfen Moab in of naskuku nani sin uf Nai Set in of naskuku nani sin.

¹⁸Pah Edom of in musu sin antoko nani, mes Israel anmo'e lasi matani.

¹⁹Of anbol na'ko Nai Yakub ana' aplenat mese, le nale'un in musu-musu sin.”

²⁰Nalali te anbi mnitas nane Nai Bileam in nit atoni-atoni Amalek. Es nane te in na'uab beno i, “Na'ko ale uf anbi pah pinan, Amalek esle' in amu'i kuasat anesi matani. Mes uf nane namuni te, of namneku talante nabal-bal.”

²¹Anbi mnitas nane Nai Bileam in nit Nai Kain in sufan, oke te in na'uab beno i, “Ho bale maika namneo matani ma namep, on kol kuna anbi tubu fatu in tunan.

²²Mes hi, atoni Keni, of nale'un ki, ka lo fa anteni Asyur of naiti neki ki onle nis ma anbe'u ki anbi makenat.”

²³Nalali te Nai Bileam in na'uab beno i amsa, “Amle'ut! Sekau es anmoni, leka Uisneno anmo'e lasi nane?

²⁴Mes na'ko Siprus of abnao makenat mese in nem, sin of nis ma anbe'u Asyur ma Heber, nalali te abnao makenat nane of in namle'u.”

²⁵Oke te Nai Bileam naloitan ma nabalab he nao anfani kun neu in bale, ma Nai Balak in anao kun amsa.