Read Uab Meto BILANGAN 27 Bible Online

BILANGAN 27 - Uab Meto bible

BILANGAN 27

¹Nai Zelafehad anmu'i anfeto nim, esle' bi Mahla, bi Noa, bi Hogla, bi Milka ma bi Tirza. Nai Zelafehad in amaf es Nai Hefer, Nai Hefer in amaf es Nai Gilead. Nai Gilead amaf es Nai Makhir, Nai Makhir amaf es Nai Manasye, ma Nai Manasye amaf es Nai Yusuf.

²Nai Zelafehad in anfeto nim en nane sin anao neu Nai Musa, ma Ana' fuat knino Nai Eleazar ma ale anakaf ma to ok-oke le fe sin nabua anhaumak eno Um-ume UISNENO. Sin nak neu Nai Musa nak,

³“Hai ama anmate anbi mnela snaen ma in kan mu'i fa anmone. In ka atuin Nai Korah fa le anlaban UISNENO. Hai ama nane in anmate natuin in sanat kun.

⁴Mes nansa' in kanan namneku na'ko nonot bian al natuin in kan mu'i fa sanut mofut anmone? Amfe neu kai pah bela mnasi bua'-bua' nok hai ama in biaf ma in benuf sin.”

⁵Oke te Nai Musa natiaba sin lasi nane neu UISNENO,

⁶ma UISNENO nakua a'an neu Nai Musa nak,

⁷“Sa' le Nai Zelafehad in anfeto sin namolok nane namneo. Es nane te amfe neu sin pah bale bela mnasi bua'-bua' nok sin biaf ma sin benuf sin na'ko sin amaf. Ma Nai Zelafehad in pa' nane mutnanib neu in anfeto sin.

⁸Muton neu to Israel mak leka atoni mese anmate ma in kan mu'i fa anmone, onane te in pah bale mnasi mes natnanib neu in anfeto sin.

⁹Leka in kan mu'i fa anfeto, in pah bela mnasi nane natnanib neu in naimone.

¹⁰Leka in kan mu'i fa tataf naimone, in pah bela mnasi nane neu in amaf tataf ai in olif sin.

¹¹Leka in kan mu'i fa tataf ai olif, ma in amaf amsa kan mu'i fa tataf ai olif, pah bela mnasi nane neu in biaf in benuf le anhaumak nokan ume mese he nati' in anpal nani.” Ale lekat lulut nane mes atoni Israel natuin nani on lekat lulut plenat UISNENO nao nok Nai Musa.

¹²UISNENO nakua a'an neu Nai Musa nak, “Amsae nai meu Tubu Abarim, ma na'ko nane amkiso nai pah le of Au fe ani neu atoni Israel.

¹³Leka hom kiso mulali te, of ho mate on ho tataf Nai Harun,

¹⁴natuin anbi mnela snaen Zin hi nua ki amlaban Au plenat. Leka anbi Meriba to ok-oke na'munu ma naakan Kau, hi kam lomi fa he miton Au kuasat anbi sin human sin matan matom nok oe nane.” (Lasi nane anbol anbi oe mata Meriba anbi Kades, anbi mnela snaen Zin.)

¹⁵Oke te Nai Musa in onen toti nak,

¹⁶“Koi, UISNENO, le Ho es amfe monit neu ale amonit, au toti, ambeti es nai le nabe'i antopu nonot i;

¹⁷atoni mese le nabe'i anfani nakaf amakenat anbi tabu sin anmakenan. Kais mufetin Ho nonot i on bibi kase le katit fa atukus.”

¹⁸UISNENO nakua a'an neu Nai Musa nak, “Mo'en Nai Yosua Nai Nun anmone. In atoni ahinet mese. Amtao ho nimam anbi in anakan.

¹⁹Amlenu in anhake anbi Ana' fuat knino Nai Eleazar in matan ma anbi nonot ok-oke sin matan. Anbi sin matan ok-oke mes ho amfe plenat mak Nai Yosua nane in es anseka ko.

²⁰Muna'at neu in ho kuasat bian, he nati' nonot Israel namtausan in.

²¹Nai Yosua mes antoti fainekat na'ko Ana' fuat knino Nai Eleazar, ma Nai Eleazar mes natoti Au lomik nok anpake Urim ma Tumim. Nok lanan nane Nai Eleazar antopu Nai Yosua ma nonot to Israel anbi ale lasi le sin naeku ma natef nokan.”

²²Nai Musa antao natuin onle UISNENO anfe plenat neu in. In anlenu Nai Yosua anhake anbi Ana' fuat knino Nai Eleazar in matan ma nonot ok-oke sin matan.

²³Oke in antao in animan anbi Nai Yosua in anakan ma anfe plenat neu to nak Nai Yosua anseka in, onle UISNENO nakua a'an neu in.