Read Uab Meto BILANGAN 29 Bible Online

BILANGAN 29 - Uab Meto bible

BILANGAN 29

¹Anbi neno ahunut fun hitu hi mes anmo'e buat he miluli mibes, ma ka nabe'i fa he hi mepu, mepu mafena. Anbi neno nane hi to'is-to'is sin mes hi mihanab sin.

²Hi mitulu neu UISNENO fua tulu bijae keso tipu mese, bibi ankase keso in nam ton mese, mese-mese le kan mu'i fa in amle'un. Fua tulu nane in fon nalomit UISNENO In nekan.

³Hi mitulu amsa fua tulu bukae le natetab nani, ut maselo nok mina bub fua mina: ut kilo tenu neu bijae keso, ut kilo nua neu bibi kase keso,

⁴ma ut kilo mese neu bibi kase ana mese-mese.

⁵Hi mitulu bibi keso mese amsa neu fua tulu sako sanat. Nok lasi nane te hi minaoba luli besa sako sanat neu to.

⁶Fua tulu-fua tulu nane anfani on amsato ma ambab fua tulu mnotu le natulu nani bua'-bua' nok fua tulu bukae, anbi neno ahunut anbi funan mese-mese. Nane amsa anfani on amsato ma ambab fua tulu mnotu neno-neno le hi mitulu mani bua'-bua' nok fua tulu bukae ma fua tulu tua mina mtasa. fua tulu nane in fon anhalin UISNENO In nekan.

⁷Anbi neno bo'mese fun hitu hi mes anmo'e buat he miluli ma mibes. Anbi neno nane hi mes minahom ma ka nabe'i fa he hi mepu.

⁸Hi mitulu neu UISNENO fua tulu mnotu bijae keso tipu mese, bibi kase keso mese ma bibi kase keso ana hitu uan ton mese, mese-mese le kan mu'i fa in amle'un. Fua tulu nane in fon anhalin UISNENO In nekan.

⁹Hi mitulu nai fua tulu bukae le natetab nani, ut maselo nok mina bub fua mina: ut kilo tenu neu bijae keso, ut kilo nua neu bibi kase keso,

¹⁰ma ut kilo mese neu bibi kase keso ana mese-mese.

¹¹Hi mitulu bibi kase keso mese amsa neu luli besa sako sanat neu to, naik na'ko fua tulu sako sanat ma fua tulu mnotu nok fua tulu bukae ma fua tulu tua mina mtasa le natulu anbi neno nane.

¹²Anbi neno bo'es am nim fun hitu hi mes anmo'e buat he miluli mibes ma ka nabe'i fa he hi mepu, mepu mafena. Anbi neno hitu in a'lon hi mes anmo'e tolas he mitola UISNENO.

¹³Anbi neno ahunut mitulu neu UISNENO fua tulu mnotu bijae keso tipu bo'es am tenu, bibi kase keso tipu nua, ma bibi kase ana bo'es am ha uan ton mese, es-es kan mu'i fa in amle'un. Fua tulu nane in fon anhalin UISNENO In nekan.

¹⁴Hi mitulu amsa fua tulu bukae le natetan nani esle' ut maselo nok mina bub fua mina: kilo tenu neu bijae keso mese-mese, kilo nua neu bibi kase keso mese-mese,

¹⁵ma kilo mese neu bibi kase keso ana mese-mese. Bua'-bua' nok fua tulu bukae nane hi mitulu amsa fua tulu tua mina mtasa le hi miloitan mani.

¹⁶Onane amsa hi mitulu nai bibi keso mese neu fua tulu sako sanat. Fua tulu nane on amsato ma ambab fua tulu mnotu neno-neno nok fua tulu bukae ma fua tulu tua mina mtasa.

¹⁷Anbi neno nua hi mitulu nai bijae keso tipu bo'es am nua, bibi kase keso nua, ma bibi kase keso ana bo'es am ha uan ton mese, es-es kan mu'i fa in amle'un.

¹⁸Hi mitulu bua'-bua' nok fua tulu bian nane ok-oke onle hi miloitan neu neno ahunut.

²⁰Anbi neno tenu hi mitulu bijae keso tipu bo'es am mese, bibi kase keso nua, ma bibi kase keso ana bo'es am ha uan ton mese, es-es kan mu'i fa in amle'un.

²¹Hi mitulu bua'-bua' nok fua tulu bian nane onle hi miloitan neu neno ahunut.

²³Anbi neno ha hi mitulu bijae keso tipu bo'mese, bibi kase keso nua, ma bibi kase keso ana bo'es am ha uan ton mese, es-es kan mu'i fa in amle'un.

²⁴Bua'-bua' nok nane hi mitulu amsa ale fua tulu bian onle hi mitulu neu neno ahunut.

²⁶Anbi neno nima hi mitulu bijae keso tipu sio, bibi kase keso nua, ma bibi kase keso ana bo'es am ha uan ton mese, es-es le kan mu'i fa in amle'un.

²⁷Bua'-bua' nok nane hi mitulu amsa ale fua tulu bian onle hi miloitan neu neno ahunut.

²⁹Anbi neno ne hi mitulu bijae keso tipu fanu, bibi kase keso nua, ma bibi kase keso ana bo'es am ha uan ton mese, es-es le kan mu'i fa in amle'un.

³⁰Bua'-bua' nok nane hi mitulu amsa ale fua tulu bian onle hi miloitan neu neno ahunut.

³²Anbi neno hitu hi mitulu bijae keso tipu hitu, bibi kase keso nua ma bibi kase keso ana bo' es am ha uan ton mese, es-es kan mu'i fa in amle'un.

³³Bua'-bua' nok nane hi mitulu amsa ale fua tulu bian onle hi miloitan neu neno ahunut.

³⁵Anbi neno fanu hi mes anmo'e buat he miluli mibes ma ka nabe'i fa hi mepu, mepu mafena.

³⁶Hi mitulu neu UISNENO fua tulu mnotu bijae keso tipu mese, bibi kase keso mese, ma bibi kase keso hitu uan ton mese, es-es kan mu'i fa in amle'un. Fua tulu nane in fon anhalin UISNENO In nekan.

³⁷Bua'-bua' nok nane hi mitulu amsa ale fua tulu bian onle hi miloitan neu neno ahunut.

³⁹Nane lekat lulut antom fua tulu mnotu, fua tulu bukae, fua tulu tua mina mtasa, ma fua tulu halan le mes hi mitulu neu UISNENO anbi neno-neno naek le natetab nalali sin. Fua tulu-fua tulu nane on amsato ma ambab neu ale fua tulu le hi mitulu mani hem baen hi lasi manta'en ai hi fua tulu nek alomit kun.

⁴⁰Nai Musa natiaba neu to Israel ale sa' le UISNENO naplenat nani neu in.