Read Uab Meto BILANGAN 30 Bible Online

BILANGAN 30 - Uab Meto bible

BILANGAN 30

¹Nai Musa anfe lekat lulut i neu ale anakaf uf-uf to Israel.

²Leka atoni mese in naiti lasi mata'en nok supat neu UISNENO, talante in anfutun in aon neu lasi manta'en mese, in mes anmo'e sa' le in anmanta'en nane, ma ka nabe'i fa nasuan in uab nane.

³Leka anfeto munif mese le natua anbi in amaf ume in naiti lasi manta'en neu UISNENO, ma anfutun in aon neu lasi manta'en mese, ma in amaf in nekan kan ma'fen fa anbi tabu in nen lasi nane, onane te anfeto munif nane mes nanokab ale in lasi manta'en nane.

⁵Mes anbi tabu sin anen lasi nane in amaf nekan anma'fen, onane te anfeto munif nane in kan futnon fa neu in lasi manta'en. UISNENO of ansako in sanat, natuin in amaf nakain in.

⁶Leka bife mese le fe kan mamone fa in anfutun in aon neu lasi manta'en mese, oni in natenab nahunun lasi nane, ai alaha onane, in anfutnon neu in lasi manta'en nane. Leka anbi neno namuni in anmamone, in anfutnon piut neu in lasi manta'en nane, leka in mone nekan kan ma'fen fa anbi in anen lasi nane.

⁸Mes leka in mone anbi tabu in anen lasi nane oke te nakain in, onane te in kan futnon fa neu in lasi manta'en nane. UISNENO of ansako in sanat.

⁹Leka bife banu mese ai bife mese le mapolin In mo'e manta'en le anfutun in aon, in anfutnon neu lasi manta'en nane ma mes nanokab nani.

¹⁰Leka bife mese le anmamone nalali anmo'e lasi manta'en le anfutu in aon,

¹¹in mes nanokab ale sa' le in mata'en nalali nane, leka in mone nekan kan ma'fen fa tabu in anen lasi nane.

¹²Mes leka anbi tabu in nen lasi nane in mone nakain in, bife nane in kan futnon fa neu in lasi manta'en. UISNENO of ansako in sanat, natuin in mone nakain in.

¹³In mone anmu'i kuasat he natuin ai ka natuin fa ale lasi manta'en le in fe anmo'e.

¹⁴Mes leka anbi tabu anen lasi nane in mone nekan kan ma'fen fa, bife nane mes nanokab ale in lasi manta'en nane. In mone natuin lasi manta'en nane natuin in nekan kan ma'fen fa anbi tabu in anen.

¹⁵Leka anbi neno namuni in mone nane ka natuin fa lasi manta'en na'ko in fe, onane te in mone nane es mes ansutai lasi nane in amnekin.

¹⁶Nane lekat lulut le UISNENO naplenat nani neu Nai Musa antom lasi manta'en le anfeto munif mese anmo'e le natua anbi in amaf ume, ai neu bife mese le in anmamone nalali.