Read Uab Meto BILANGAN 31 Bible Online

BILANGAN 31 - Uab Meto bible

BILANGAN 31

²“Anmo'e seunbanit neu atoni Midian natuin sa' le sin anmo'e nalali neu to Israel. Oke onane te of ho mate.”

³Oke te Nai Musa nak neu to Israel nak, “Miloitan nai he nati' hi amaken; hi mes amlaban atoni Midian he minaoba kasat UISNENO neu sin.

⁴Na'ko uf mese-mese to Israel, hi mes miloitan solalus atoni nifun mese he nao mat he anmaken.”

⁵Onane te uf mese-mese na'ko to Israel sin anbeti atoni nifun mese, amfaun ok-oke atoni nifun bo'es am nua le naloitan he anmakenan.

⁶Nai Musa anlenu sin he anmakenan bua'-bua' nok Nai Pinehas Ana' fuat knino Nai Eleazar anmone. Nai Pinehas in neki ale bale knino ma to'is-to'is he anfe ataka-ataka.

⁷Matom nok plenat UISNENO neu Nai Musa, atoni Israel sin anmaken nok atoni Midian ma namate ale sin atoni mone sin,

⁸nok kesel Midian sin nim, esle' Nai Ewi, Nai Rekem, Nai Zur, Nai Hur ma Nai Reba. Nai Bileam Nai Beor anmone, namate amsa.

⁹Atoni-atoni Israel sin anheke ale bife ma li'ana Midian, ma nasik nan ale sin mu'it ma ale sin amaus ok-oke.

¹⁰Ale sin kot ma ale sin um-ume notu nani sin amsa.

¹¹Oke te atoni-atoni Israel sin naiti ale osaf le sin nasik, esle' ale sa' le sin anheke nan sin ma ale mu'it sin,

¹²oke te sin neki neu Nai Musa ma Ana' fuat knino Nai Eleazar ma neu to Israel ok-oke. Anbi nane sin fe nasnas anbi mnela Moab, anbi Noe Yordan ninen, anhaumak kot Yerikho.

¹³Oke te Nai Musa, Ana' fuat knino Nai Eleazar ma ale anakaf bian na'ko to Israel sin anpoi na'ko um-ume hen senu solalus Israel.

¹⁴Nai Musa nato'an ale solalus nakaf amnanut, ale solalus nakaf ma nakaf apalat le fe sin anfani nem na'ko makenat.

¹⁵Nai Musa nak neu sin nak, “Nansa' hi mifetin ale bife nane sin anmoni?

¹⁶Ait bife-bife nane sin es ka natuin fa Nai Bileam fainekat, talante sin anfuli to Israel anbi Peor he nasaitan UISNENO? Ma lasi nane es neki lasi amle'ut neu to UISNENO.

¹⁷Es nane te mimate nai ale li'anmone sin ma ale bife le ka ao temef fa anteni.

¹⁸Mes ale bife le fe ao temef nabe'i hi maiti neu ki.

¹⁹Ma hi al-al ki le mimate milali atoni ai le him le'o amates aon nitu mes hi mimaika anbi um-ume kotin neno hitu in a'lon. Anbi neno tenu ma neno hitu hi ma ale bife-bife le him heke man sin nane minaoba luli besa miknino aom.

²⁰Ale blua pake mese-mese ma sa' am sa' na'ko pasu, bibi in funun ai hau, mes miknino sin amsa.”

²¹Ma Ana' fuat knino Nai Eleazar nak neu atoni-atoni le fe sin anfani nem na'ko makenat nane nak, “I lekat lulut le UISNENO anfe nani neu Nai Musa.

²²Ale sa' le ai ka notu nabe'i, esle' mnatu, noni muti, noni molo, besi, atnopas muti ma tnopas metan, mes naknino sin, antao sin neu ai nanan. Oke te ale blua nane mes naknino sin amsa nok oe luli besa knino he nati' ka malahi anteni fa. Ale blua bian le ka nalan nabe'i fa ai mes naknino sin nok oe luli besa knino.

²³

²⁴Anbi neno hitu hi mes amfase hi bale pake, ma nok nane te hi ka milahi amteni fa, ma nabe'i hi amtam meu um-ume snasat nanan.”

²⁵UISNENO nakua a'an neu Nai Musa nak,

²⁶“Ho ma Ana' fuat knino Nai Eleazar, mok ale anakaf bian na'ko to Israel, mes amso'i osaf le hi misik man sin, nok ale atoni le him heke man sin ma mu'it sin.

²⁷Osaf le hi misik man sin nane mes him bati nua le amfaune papmese; aon bian neu ale solalus le sin nao nok ki ma anmaken, ma aon bian anteni neu to ok-oke.

²⁸Ma le him beti miteta hem fe neu Kau, UISNENO, na'ko pa' ale solalus sin ini nane ho maiti man mese na'ko natun nim mese-mese — leko na'ko atoni le him heke man sin, ai na'ko bijae, bikase luke mnanu, bibi kase ma bibi.

²⁹Mina'at sin neu Ana' fuat knino Nai Eleazar anfani on fua tulu le anbeti nateta neu Kau, UISNENO.

³⁰Na'ko pa' le anfe neu to Israel, ho mes maiti man mese na'ko bo'nim nane mese-mese, leko na'ko atoni-atoni le him heke man sin, ai na'ko bijae, bikase luke mnanu, bibi kase ma bibi. Mina'at ale nane ok-oke neu atoni Lewi le anmepu anbi Au um-ume.”

³¹Nai Musa ma Ana' fuat knino Nai Eleazar sin anmo'e onle UISNENO naplenat nani.

³²Naik na'ko sa' le solalus sin naiti nalali neu sin, osaf le sin nasik nan amfaun ok-oke: bibi kase ma bibi 675.000, bijae 72.000, bikase luke mnanu 61.000, ma li'anfeto ao temaf 32.000.

³³

³⁴

³⁵

³⁶Na'ko osaf aon bian le nane anfe sin neu ale solalus le maso'it on i: bibi kase ma bibi 337.500, ma na'ko tulu le nane anbeti naikan neu UISNENO bibi kase ma bibi 675; bijae 36.000, ma le anbeti nateta naikan neu UISNENO bijae 72; ma bikase luke mnanu 30.500, ma le anbeti naikan neu UISNENO bikase luke mnanu 61; li'anfeto ao temef 16.000, ma le anbeti nateta neu UISNENO li'anfeto ao temef 32.

³⁷

³⁸

³⁹

⁴⁰

⁴¹Oke te Nai Musa nana'at tulu le anbeti nateta nane neu Ana' fuat knino Nai Eleazar he natulu neu UISNENO, onle UISNENO naplenat nani.

⁴²Pa' neu to papmese nok pa' neu solalus sin; bibi kase ma bibi 337.500, bijae 36.000, bikase luke mnanu 30.500, ma li'anfeto ao temef 16.000

⁴³

⁴⁴

⁴⁵

⁴⁶

⁴⁷Onle UISNENO naplenat nani, Nai Musa naiti nan mese na'ko atoni bo'nim le anheke nan sin ma mu'it, oke te in nana'at sin neu atoni-atoni Lewi le sin anmepu anbi Um-ume UISNENO.

⁴⁸Nalali te ale solalus anakaf le sin na' solalus Israel, sin nem neu Nai Musa

⁴⁹ma sin nak, “Usi, haim so'i milali hai solalus sin le haim na' sin. Sin amfaukenu nabala, katit fa es amsa le he namneku.

⁵⁰Es nane te hai meki ale bale pake noas mnatu, niti nimaf, niti haef, kleli, falo ma a heke le mese-mese in naiti nalali. Ale i ok-oke hai mina'at mani neu UISNENO anfani hai fua tulu, he nati' In naneo ma nahfo kai piut.”

⁵¹Oke te Nai Musa ma Ana' fuat knino Nai Eleazar ansimo mnatu le nane, al-al sin namasbon anbi bale pake noas.

⁵²Fua tulu na'ko ale solalus anakaf nane mafenan ala kle'ot kilo natun nua.

⁵³Mes ale solalus nane mese-mese sin naiti osaf bale sikat neu sin aokenu.

⁵⁴Nai Musa ma Ana' fuat knino Nai Eleazar sin neki mnatu nane neu Um-ume UISNENO he nati' UISNENO naneo ma nahafo to Israel.