Read Uab Meto BILANGAN 32 Bible Online

BILANGAN 32 - Uab Meto bible

BILANGAN 32

¹Uf-uf Nai Ruben ma Nai Gad sin anmu'in mu'it amfau le'uf. Leka sin nit pah Yaezer leok le'uf ma pah Gilead neu mu'it,

²sin anao neu Nai Musa, Ana' fuat knino Nai Eleazar ma anakaf-anakaf bian anteni na'ko Israel. Sin nak,

³“Pah kot-kot Atarot, Dibon, Yaezer, Nimra, Hesybon, Eleale, Sebam, Nebo ma Beon le Israel sin antoko nalali natuin UISNENO anbab sin, bale nane leok le'uf kun neu mu'it. Ma natuin hai mu'it amfau le'uf,

⁵hai amtoti he nati' pah i amfe neu kai anfani hai ini. Kais amlenu kai he mitnani meu Noe Yordan aon bian.”

⁶Nai Musa nate nak, “Nansa' him lomi he mitua anbi i ma atoni-atoni na'ko hi nonot sin anao he anmakenan?

⁷Nansa' hi anmo'e nonot Israel namtau hen lak Noe Yordan ma antam neu pah le UISNENO anfe neu sin?

⁸Hi amaf sin anmo'e onane amsa, leka au sonu sin na'ko Kades-Barnea sin anao hen nono pah nane.

⁹Sin antia nalali Anonof Eskol ma sin nit nalali amsa pah nane. Mes leka sin anfani nem, sin anmo'e to Israel namtau hen tam neu pah le UISNENO anfe nani neu sin.

¹⁰Ma UISNENO nato' anbi tabu nane talante In nakua a'an nak, ‘Atoni-atoni nane sin ka na'ki neu Kau fa. Es nane te Au sup nak na'ko sin le sin ton bo'nua nekin sae anbi tabu le sin nasaitan Mesir, katit fa esle' of hen tam neu pah le Au ba'an ulali neu Nai Abraham, Nai Ishak ma Nai Yakub.’

¹²Ale atoni nane sin napeni kasat al Nai Kaleb Nai Yefune anmone, atoni Kenas, ma Nai Yosua Nai Nun anmone, natuin sin nua sin na'ki nabala neu UISNENO.

¹³UISNENO nato'an to Israel talante In nafetin sin anao neu me-me anbi mnela snaen nan ton bo'ha talante ale batan le anlaban nalali In le nane sin anmate ok-oke.

¹⁴Ma tabu le i, hi amlaban onle hi amaf sin! Hi namneo-namneo atoni-atoni pukan asanat mese le hi anmo'e to'as UISNENO anpin anfin-anfin anteni neu to Israel!

¹⁵Leka hi amkoti UISNENO, to le i ok-oke In of nafetin sin a'lo le'uf anteni anbi mnela snaen, ma hi es meki amle'ut neu sin!”

¹⁶Oke te atoni-atoni na'ko Nai Ruben ma Nai Gad nane sin anhaumak Nai Musa ma sin nak, “Leko hai mihakeb mihunun o'of-o'of mabaki lape neu hai bibi kase sin, ma kot-kot mabaki lape neu hai fe ma hai anah sin.

¹⁷Hai of miloitan ma mibalab he nok manoe hai amnao he maken bua'-bua' mok hai olif tataf sin. Hai of amtomat ambi makenat nane ma meki sin antam neu pah le anfani sin ini. Fe hai amaken onane hai fe ma hai anah sin nabe'i natua anbi i, anbi kot-kot mabaki lape sin, sin antainine na'ko makenat tuafen pah i.

¹⁸Hai of kam fani aim fe meu hai ume leka atoni Israel ok-oke sin fe kan mu'in fa pah le anfani sin ini.

¹⁹Hai kam lomi fa hem simo akle'o na'ko sin pah anbi Noe Yordan in aon bian, natuin hai amsimo milali hai pa' anbi i, anbi Noe Yordan in aon neno saen.”

²⁰Nai Musa natae sin nak, “Leka namneo-namneo hi amlomi he miloitan ma mibalab he amaken neu UISNENO,

²¹ma hi al-al ki le anbi bi ki le nabe'i anmaken anlak Noe Yordan, ma UISNENO In na' ma antopu ki he hi amken musu-musu sin talantia UISNENO anli'u sin,

²²talante pah nane nausi neu In, nabe'i hi amfani, ma hi mifetnom na'ko hi sutais neu UISNENO ma neu hi olif tataf sin, ma UISNENO of anfe pah anbi aon neno saen i anfani hi ini.

²³Mes mimnau, leke hi ka minokab fa hi lasi manta'en, hi misanab neu UISNENO ma of ankas ki natuin hi sanat nane.

²⁴Amnao nai mihakeb nai kot-kot ma o'of-o'of neu hi bibi kase, ma kais amnikan minokab sa' le hi manta'en milali nane!”

²⁵Oke te atoni-atoni Nai Gad ma atoni-atoni Nai Ruben sin nak, “Usif, hai of amtao ma anmo'e sa' le Usif ho muplenat.

²⁶Hai fe hai anah ma hai mu'it bijae ma hai bibi kase of namaika anbi i, anbi kot-kot Gilead.

²⁷Mes hai le i hai miloitan ma mibalab he hai amnao he amaken natuin UISNENO In ana' ma antopu kai. Hai of amlak Noe Yordan ma amaken onle Usif ho muton mulali.”

²⁸Ma Nai Musa anfe plenat i neu Ana' fuat knino Nai Eleazar, Nai Yosua ma anakaf-anakaf Israel nak,

²⁹“Leka atoni-atoni Gad ma atoni-atoni Nai Ruben sin natuin plenat UISNENO ma sin anlak Noe Yordan he sin anmakenan, ma leka natuin sin anbab ki ma hi mis ma misik man pah nane, pah Gilead mes hi amfe neu sin anfani sin ini.

³⁰Mes leka sin kan lak fa Noe Yordan he sin anmaken bua'-bua' nok ki, sin mes ansimo pa' na'ko pah bale bela mnasi anbi pah Kanaan, papmese on hi amsa.”

³¹Oke te atoni-atoni Nai Gad ma atoni-atoni Nai Ruben sin natae nak, “Usif, hai of minaoba sa' le UISNENO naplenat.

³²Natuin UISNENO In na' ma antopu kai of hai amlak meu pah Kanaan ma hai amnao he maken, mes nati' pah anbi Noe Yordan aon neno saen in nabala anfani hai ini.”

³³Oke te Nai Musa nana'at neu uf-uf Nai Gad ma Nai Ruben ma uf Nai Manasye aon bian pah Sihon ok-oke, kesel Amori, ma pah Og, kesel Basan, ma ale kot ma pah le anhaumak anbi nane.

³⁴Uf Nai Gad sin nafena nafani kot Dibon, Atarot, Aroer,

³⁵Atarot-Sofan, Yaezer, Yogbeha,

³⁶Bet-Nimra, ma Bet-Haran on kot-kot mabaki lape ma on bale o'of-o'of bibi kase.

³⁷Uf Nai Ruben nafena nafani kot-kot Hesybon, Eleale, Kiryataim,

³⁸Nebo, Baal-Meon, ma Sebam. Kot-kot le sin nahakeb nafani nane sin anseka sin kankenu.

³⁹Uf Nai Makhir, Nai Manasye anmone, antam ma anken pah Gilead, oke te nasik ma anli'u atoni-atoni Amori anbi nane.

⁴⁰Es nane te Nai Musa anfe pah Gilead nane neu Nai Makhir in ume nanan sin, ma sin natua nabala ani nane.

⁴¹Nai Yair na'ko uf Nai Manasye, antam ma anmaken ma nasik nan kuan fauk-fauk, oke te in nakanab sin nak “Kuan-kuan Yair!”

⁴²Nai Nobah antam ma anmaken ma nasik nan Kenat nok kuan fauk-fauk le anhaumak anbi nane, oke te in nakanab sin nak Nobah, natuin in kanan kun.