Read Uab Meto BILANGAN 34 Bible Online

BILANGAN 34 - Uab Meto bible

BILANGAN 34

¹UISNENO anfe neu Nai Musa

²plenat-plenat le i neu Israel nak, “Ka lo fa anteni hi amtam meu pah Kanaan, pah le Au fe neu ki anfani bale bela mnasi. Nakat-nakat hi pah nane esle' i.

³Anbi bian a'ne'u nakat nane na'ko mnela snaen Zin nao nok Edom. Anbi neno saen nakat nane na'ko bian a'ne'u Tasi Maten,

⁴anbeo nao nok neno kabenana ne'u an ali Lanan Akrabim ma nao anfini neu Zin antia Kades-Barnea anbi bian a'ne'u. Na'ko nane anbeo neu neno tesan antia Hazar-Adar, ma anfini neu Azmon.

⁵Na'ko nane anbeo neu nonof anbi nakat Mesir ma namsopu anbi Tasi Tnana.

⁶Tasi Tnana anfani on nakat neu hi pah anbi neno tesan.

⁷Anbi bian a'li, nakat nane na'ko Tasi Tnana an ali Tubu Hor

⁸ma na'ko nane nao neu Lanan Hamat, oke te anfini neu Zedad,

⁹ma nao neu Zifron ma namsopu anbi Hazar-Enan.

¹⁰Anbi neno saen, nakat nane na'ko Hazar-Enan nao neu Sefam.

¹¹Ma na'ko nane ansanu neu Ribla ani Ain aon neno saen, oke te anfini neu neten-neten anbi mnela neno saen Nifu Galilea,

¹²oke te anao neu bian a'ne'u Noe Yordan nona antia Tasi Maten. Nane hi pah natuin nakat-nakat le anfun natef nani.”

¹³Nai Musa nak neu to Israel nak, “Nane pah le of hi amsimo nok lanan amhel sulat, pah le natuin plenat UISNENO mes him bati neu uf nonot Israel sin sio ma batis.

¹⁴Uf-uf na'ko Nai Ruben ma Nai Gad ma bian na'ko uf Nai Manasye sin napeni nalali sin pa', ma pah nane amsa anbati nalali neu sin ume nanan sin.

¹⁵Sin pah bale bela mnasi nane anbi Noe Yordan ninen neno saen, anhaumak kot Yerikho.”

¹⁶UISNENO nakua a'an neu Nai Musa nak,

¹⁷“Le mes hen bati pah nane neu ki es Ana' fuat knino Nai Eleazar, ma Nai Yosua Nai Nun anmone.

¹⁸Amlek amsa anakaf mese na'ko uf mese-mese hen sin anbab Nai Eleazar ma Nai Yosua he anbati pah nane.”

¹⁹Kanaf atoni-atoni nane esle': [Uf] — [Anakaf] Yuda — Nai Kaleb Nai Yefune anmone Simeon — Nai Samuel Nai Amihud anmone Benyamin — Nai Elidad Nai Kislon anmone Dan — Nai Buki Nai Yogli anmone Manasye — Nai Haniel Nai Efod anmone Efraim — Nai Kemuel Nai Siftan anmone Zebulon — Nai Nai Elisafan Nai Parnah anmone Isakhar — Nai Paltiel Nai Azan anmone Asyer — Nai Ahihud Nai Selomi anmone Naftali — Nai Pedael Nai Amihud anmone

²⁹Nane atoni-atoni le UISNENO naplenat sin he anbati pah bale bela neu to Israel anbi pah Kanaan.