Read Uab Meto BILANGAN 4 Bible Online

BILANGAN 4 - Uab Meto bible

BILANGAN 4

¹UISNENO anlenu Nai Musa ma Nai Harun,

²he nanaoba so'i smanaf neu atoni-atoni Lewi ma nonot Kehat natuin sin na'ko ume mese-mese,

³oke te antui ale smanaf atoni le uan bo'tenu antia bo'nim, le nabe'i nanaoba mepu sutais anbi Um-ume UISNENO.

⁴Sin mepu esle' nabalab bale'-bale' le aknino le'uf kun.

⁵UISNENO anfe neu Nai Musa lekat lulut le i: Kalu in tabu ante hen pukai um-ume, Nai Harun ma in anah-anah sin mes antam neu Um-ume UISNENO, ma nasanut pilu ekat le anbi Peti Fef bela in matan, ma an amu Peti nane neki pilu nane.

⁶Oke te, sin mes an amu anteni neki pasu malule no' mese, nalali te nauf pilu bilu no' mese anbi in fafon, oke te antao hao loi' Peti nane.

⁷Sin mes nauf pilu mate no' mese anbi mei in fafon bale' utunu' bukae neu UISNENO, ma anbi mei nane in fafon sin mes nateke pika, mako' bale atu fomeni, mako' tulu tnatas ma kusi neu tulu tnatas tua mina mtasa. Utunu' bukae mes nabalab ma anmu'i piut anbi mei nane.

⁸Sin mes antobe ale nane ok-oke neki pilu no' mese, oke te na'ben pasu malule no' mese anbi in fafon, ma antao hau loi' mei nane.

⁹Sin mes naiti nan pilu mate no' mese ma an amu paku haen ma ale paku-paku sin, bale' neu he naknino paku in abas ma in bale' natnalu ma ale bale' mina bub fua mina.

¹⁰Paku in haen ma ale in bale' sin mes an amu neki pasu malule no' mese ma antao nani neu nepat in fafon.

¹¹Nalali te sin mes na'ben pilu mate no' mese anbi baki tulu na'ko mnatu nane in fafon, ma antobe in neki pasu malule no' mese, ma antao hau loi' baki tulu nane.

¹²Ale bale' le anpake sin anbi Ke'an Knino mes sin naiti ma an amu neki pilu mate no' mese. Oke te sin mes antobe nani neki pasu malule no' mese, ma antao nani neu nepat in fafon.

¹³Sin mes naknino baki tulu nane na'ko afu, ma na'ben pilu kanalu no' mese, anbi in fafon.

¹⁴Ma anbi in fafon nane sin mes antao nani ale bale' le anpake anbi tuthaes anbi baki tulu nane; bale ai flae, kato', bale oe meu humaf. Oke te sin mes antobe nani ok-oke neki pasu malule no' mese ma antao in neu nepat.

¹⁵UISNENO nakua a'an neu Nai Musa ma Nai Harun nak, “Anbi tabu him pukai um-ume, Nai Harun nok in anah-anah sin mes antam neu Au Um-ume, ma an amu ale bale' ok-oke ma ale bale' le anbi nane. Ma namuni na'ko nane te, atoni-atoni Kehat sin nabe'i nem hen loi. Mes sin ka nabe'i fa he nit, ai anhaumak, ai anle'o bale'-bale' nane natuin anbeti nateta nani neu Kau. Kalu sin antao ma anmo'e amsa, sin of anmate. Es nane te, he nati' atoni-atoni Kehat nane kais manose na'ko uf Lewi, Nai Harun ma in anah-anah sin mes anfe neu sin mese-mese sa' le mes sin he neki. Nane mepu atoni Kehat anbi tabu natnanib Au Um-ume. Nai Eleazar, Nai Harun anmone, in ansutai ale mepu neu Au Um-ume ok-oke, paku mina, atu fomeni, fua tulu ane kase he nabalab bukae piut, mina luli besa ma ale sa' ok-oke le anbi Au Um-ume nane.”

²¹UISNENO anlenu Nai Musa

²²he nanaoba so'i smanaf neu atoni Lewi na'ko nonot Nai Gerson natuin ume mese-mese.

²³Nai Musa mes antui kanaf ale atoni le uan ton bo' tenu antia ton bo'nim le mes nabe'i nanaoba mepu sutais anbi Um-ume UISNENO.

²⁴Anfe neu sin sutais hen loi bale'-bale' i:

²⁵Pilu tobes anbi Um-ume nane fafon nok in toben anbi nanan ma anbi kotin na'ko pasu malule, pilu anbi Um-ume enon,

²⁶pilu-pilu mnanu ma ale sin atoni-atoni sin neu po'an anfun natef nan Um-ume ma baki tulu, pilu anbi eno po'an, ma ale bale' ok-oke le anpake sin hen tao ale bale' nane. Sin ansutai ale mepu le anmalut nok bale'-bale' nane.

²⁷Nai Musa ma Nai Harun mes anpanat he nati' mepu le nana'at neu atoni-atoni Nai Gerson nane sin nanaoba nani, ma ale bale' le hen loi neki, maut hen loi neki.

²⁸Nane mepu atoni-atoni Nai Gerson anbi Um-ume; ale mepu nane mes sin nanaoba nani Nai Itamar Nai Harun anmone in kuasat ma aplenat.

²⁹UISNENO anlenu Nai Musa he nanaoba so'i smanaf neu atoni Lewi na'ko nonot Nai Merari natuin ume mese-mese.

³⁰Nai Musa mes antui smanaf atoni le uan ton bo'tenu antia bo'nim le nabe'i nanaoba mepu anbi Um-ume UISNENO.

³¹Anfe neu sin mepu he nati' neki Um-ume nane in aon, ale in anonof sin, ale in ni sin ma in kapenit sin.

³²Onane amsa ale ni in po'an anfun natef Um-ume nane ma ale in tani-tani sin nok ale bale' le anpake he nahakeb nani. Atoni mese-mese natetab nani he neki bale' le natetab neune.

³³Nane ale mepu neu atoni Merari; ale sin mepu anbi Um-ume UISNENO mes sin nanaoba nani anbi Nai Itamar Nai Harun anmone in kuasat ma in aplenat.

³⁴Matom nok plenat UISNENO, Nai Musa ma Nai Harun ma ale nakaf na'ko nonot nanaoba so'i smanaf na'ko nonot tenu anbi uf Lewi esle' Kehat, Gerson ma Merari. Sin nanaoba so'i smanaf nane na'ko ume neu ume mese-mese. Sin antui kanaf ale atoni le uan ton bo'tenu antia ton bo'nim le nabe'i nanaoba mepu anbi Um-ume UISNENO. In fuan esle' i: [Nonot] — [Atoni amfaun] Kehat — 2.750 Gerson — 2.630 Merari — 3.200 — Ok-oke: 8.580

⁴⁹Natuin plenat UISNENO nao nok Nai Musa, antui atoni mese-mese in kanan ma anfe neune mepu sutais le mes in hen tuthae ai sa' le mes in hen sutai nani.