Read Uab Meto BILANGAN 5 Bible Online

BILANGAN 5 - Uab Meto bible

BILANGAN 5

¹UISNENO nakua a'an neu Nai Musa nak,

²“Amfe plenat le i neu atoni Israel: Ale atoni le namen men poko amle'ut, ai menas anbi honin, ai le anle'o nitu, mes napoitan sin na'ko um-ume Israel.

³Mes amlenu sin he nao, he nati' kais nale'un Um-ume le Au utua bine ok Au nonot.”

⁴Atoni Israel nanaoba plenat nane ma napoitan nani ale atoni le napeni menas onle nane na'ko um-ume.

⁵UISNENO anfe neu Nai Musa

⁶lekat lulut i neu atoni Israel: Leka atoni mese ka na'ki fa neu UISNENO natuin anmo'e sanat neu atoni bian,

⁷atoni nane mes an au in sanat ma anbaen tusa ok-oke, ansato nok lekat batis bo'nua, neu atoni le in nsanab nalali neune.

⁸Mes kalu atoni le in nasanab neune anmate nalalien ma kan mu'i fa asal nonot le anhaumak nokan, onane te soi tusa nane mes anfe neu UISNENO, ma anfani pa' ma nama' Ana' fuat knino. Soi tusa nane kan tam fa nok bibi kase keso neu luli besa sako sanat neu atoni le nasanab nane.

⁹Na'ko ale sa' le atoni Israel natulu neu UISNENO, tulu le anbeti nateta nane anfani pa' ma nama' Ana' fuat knino le ansimo tulu nane.

¹⁰Sa' le atoni mese natulu neu UISNENO, anfani pa' ma nama' neu atoni nane kun. Al ha sa' le in nana'at neu Ana' fuat knino anfani pa' ma nama' Ana' fuat knino nane kun.

¹¹UISNENO anlenu Nai Musa

¹²anfe lekat lulut i neu atoni Israel. Oni anbol te atoni mese naktino in fenai. In natenab nak in fenai nane ka na'ki fa neu in ma nale'un in aon natuin in antup nabua nok atoni bian ma antao ma anmo'e lasi nane nok atol-tolo'; ma kan mu'i fa asaksit, ma kan heke nan fa in nok amneot. Ai, oni anbol te atoni mese naktino in fenai, mes in fenai kan beo fa.

¹⁵Anbi lasi nono nua en nane atoni nane mes neki in fenai neu Ana' fuat knino. In amsa neki tulu le in nabalab, esle' ut ane kase kilo mese. Ut nane ka nabe'i fa hen selo nok mina bub fua mina ai anselo nok atu fomeni, natuin anfani tulu tnatas nek aktinos ma nabalab nani neu taka' anmu'i nek aktinos mone antom in fenai.

¹⁶Ana' fuat knino mes anlenu bife nane nao mat neu baki tulu matan ma anhake anbaina neu UISNENO.

¹⁷Oke te Ana' fuat knino mes naiti nan mako' tepas mese ma antesi oe knino akle'o neu mako' nane in nanan. Nalali te in mes naiti nan afu akle'o na'ko Um-ume UISNENO nanan ma natam nani neu oe nane in nanan.

¹⁸Oke in mes ansefi bife nane in nakfunu sin, ma antao ut tulu tnatas nek aktinos nane neu in niman nanan, mes Ana' fuat knino in nekinon kun in na' oe menu le neki kasat.

¹⁹Oke te Ana' fuat knino mes antek supat ma antoti bife nane he natuin. Ana' fuat knino mes nak, “Kalu ho ka mapaisa fa, ho mes kam toman fa kasat le oe i in neki.

²⁰Mes kalu ho mapaisa mulali,

²¹so nati' UISNENO anmo'e ho kanam anfani supat kasat anbi ho nonot. So nati' In anmo'e ho pusum un anmeti ma ho taim ansae.

²²Oe le neki kasat i of antam neu ho taim nanan ma anmo'e ma ansae ma nameti ho pusum un.” Bife nane mes natae nak, “Au lomi; so nati' UISNENO anmo'e onane.”

²³Oke te Ana' fuat knino mes antui kasat nane neu sulat manunu ma nose nani neki oe menu nane.

²⁴Ana' fuat knino nane anlenu bife nane he ninu oe menu le neki kasat. Leka ninu oe nane, oe nane anmo'e ma in naben menas.

²⁵Ana' fuat knino mes naiti tulu tnatas ut nane, ma nalile anbi UISNENO matan, oke te neki neu baki tulu.

²⁶Oke te mes in naiti nan ut nima mese on ataka nak ut nane natulu natnat nalali, oke te notu nani anbi baki tulu fafon. Oke te nainut nani oe nane neu bife nane.

²⁷Kalu onle bife nane in anmapaisa nalali, oe nane anmo'e in talante in naben menas anae le'uf; in tain ansae ma in pusun anmeti. In kanan of anfani supat kasat anbi in nonot.

²⁸Mes kalu onle in ka nasanab fa, in kan toman fa kasat ma in fe nabe'i nahoni.

²⁹Onle nane in lekat lulut leka bife mese in mone naktino ma natenab nak in fenai anmo'e lasi le'uf ma nale'un in aon. Atoni nane mes neki in fenai bi UISNENO In matan ma Ana' fuat knino mes antao ma anmo'e lekat lulut nane neune.

³¹Atoni nane nafetnon na'ko sanat, mes in fenai, kalu namneo in nasanab, mes in ansutai in amnekin.