Read Uab Meto BILANGAN 6 Bible Online

BILANGAN 6 - Uab Meto bible

BILANGAN 6

¹UISNENO anlenu Nai Musa

²anfe lekat lulut le i atoni Israel. Leka atoni mese ai bife mese le anmanta'en hen beti natet'on kun neu UISNENO on atoni mese le nanaat in monin kun,

³ka nabe'i fa he ninu tua mina mtasa ma tua amafut. In ka nabe'i fa he ninu tua mafu sa' am sa' le anmo'e na'ko tua min kase in fuan ai hau fua bian. In ka nabe'i fa he nah tua min kase in fuan le alekot ai le anmeto, ai sa'-sa' le na'ko hau tua min kase; in fuan nanan ai in tunan makuke ka nabe'i fa hen in nah.

⁵Anbi tabu in fe nanaoba in lasi manta'en in ka nabe'i fa hen ketu ma anlefi in nakfunu ai an eu in nakfunu. Anbi tabu le nane in nakfunu ma in konon, mes nakaena sin hen moni namnanu. In mafut nok in lasi manta'en talante tabu in nasopu tabu in beti nateta in aon neu UISNENO.

⁶In nakfunu nane anfani ataka nak in beti nateta in aon neu UISNENO. Leka fe in lasi manta'en nane nanaobon in ka nabe'i fa nalahi in aon; in ka nabe'i fa hen haumak amates aon nitun, maski nak nane in amaf aon nitun, ai ainaf, ai in olif tataf sin.

⁸Leka fe in anfani atoni le anbeti nateta in aon neu UISNENO, in le nane al atoni neu UISNENO kun.

⁹Leka nakfunu atoni mese le anbeti nateta in aon kun neu UISNENO anfani nalahi natuin in haumak atoni le anmate nok askeken, in mes anpao fe neno hitu in a'lon; oke te in mes an eu in nakfunu ma in konon, oke te in anfani naknino.

¹⁰Antam neno fanu te in mes neki kol ot kase nua ai kol otos neu Ana' fuat knino anbi Um-ume UISNENO in eno.

¹¹Kolo mese Ana' fuat knino mes natulu nani neu fua tulu sako sanat, ma es anteni neu fua tulu mnotu neu he naneku in lahi ai in amle'ut. Anbi neno nane amsa in mes anbeti nateta nafani in nakfunu neu UISNENO,

¹²ma nafe'un lasi nana'at in aon on atoni le anbeti nateta kun in aon neu UISNENO. Tabu le anfini ma ankono nalali kan so'i fa anteni natuin in anfani lahi ai amle'ut nalali. On fua tulu seka lukit in mes natulu bibi kase mese le in uan fe ton mese.

¹³Leka tabu lasi manta'en atoni mese le anbeti nateta in aon kun neu UISNENO namsopu, mes anmo'e luli besa i. Mes neki atoni nane neu Um-ume UISNENO in eno,

¹⁴neki nok mu'it tenu le kan mu'i fa in amle'un: bibi kase keso ana mese in uan ton mese neu fua tulu mnotu, bibi kase ainaf mese uan ton mese neu fua tulu sako sanat, ma bibi kase keso mese neu fua tulu halan.

¹⁵In amsa natulu utunu' poni mese le anmo'e kan pake fa lalu haef, esle' utunu' akbubu le anmo'e na'ko ut anselo nok mina bub fua mina. Naik na'ko nane in amsa mes natulu bukae ma fua tulu mninut.

¹⁶Ana' fuat knino mes neki ale nane ok-oke neu UISNENO In human In matan, oke te natulu fua tulu sako sanat ma fua tulu mnotu.

¹⁷Bua'-bua' nok utunu' poni mese nane, in mes natulu bibi kase keso nane neu UISNENO on fua tulu halan. Onane amsa fua tulu bukae ma fua tulu mninut nane mes natulu nani sin neu UISNENO.

¹⁸Atoni le anbeti nateta in aon kun neu UISNENO nane mes in an eu in nakfunu anbi Um-ume UISNENO enon ma anpolin natam sin neu ai nanan bale fua tulu halan nane fe mamnotu.

¹⁹Oke te, kalu bibi kase keso nane in pusun matan nahan nalali, Ana' fuat knino mes naiti ma nateke bua'-bua' nok utunu' akbubu mese ma kokis manihis mese na'ko poni mese, neu atoni le anbeti nateta in aon kun neu UISNENO.

²⁰Oke te Ana' fuat knino mes nalile bukae nane on tulu le anbeti nateta nani neu UISNENO; nane pa' ma nama' Ana' fuat knino, oke te abasan ma pusun na'ko bibi kase keso le natuin lekat lulut anfani pa' ma nama' Ana' fuat knino. Oke onane te, atoni nane le anbeti nateta in aon kun neu UISNENO in nabe'i ninu tua mina mtasa.

²¹Nane lekat lulut neu atoni le in anbeti nateta in aon kun neu UISNENO, mes kalu atoni le anbeti nateta in aon kun neu UISNENO, tulu nane nesi na'ko lekat lulut le in manta'en, in mes nanokab nani in lasi manta'en nane nok alekot.

²²UISNENO anlenu nai Musa

²³natiaba neu Nai Harun ma in anah-anah sin nak sin mes antek a'at i anbi tabu sin anfe tetus neu to Israel:

²⁴So nati' UISNENO anfe ki tetus ma anpanat ma anpao ki.

²⁵So nati' UISNENO In nek leko neu ki ma In nek mamun neu ki.

²⁶So nati' UISNENO In nek ma namnau ki ma anfe neu ki halan nekaf.

²⁷Ma UISNENO nakua a'an nak, “Leka sin antek Au kanak on tetus neu to Israel, of Au fe tetus neu sin.”