Read Uab Meto BILANGAN 8 Bible Online

BILANGAN 8 - Uab Meto bible

BILANGAN 8

¹UISNENO nakua a'an neu Nai Musa nak,

²“Mutonan Nai Harun mak anbi tabu in antao paku hitu en nane neu paku nane in haen, in mes antao nalek-leko onle nane talante in pinan antana paku nane in haen antom matan.”

³Nai Harun antao natuin sa' le UISNENO anfe plenat neune. In antao paku-paku nane anbaina neu paku haef nane.

⁴Bale pake nane, talante in fafon ma tuna-tuna le anpake neune anmo'e na'ko mnatu matutu, natuin aletaf le UISNENO nalile nani neu Nai Musa.

⁵UISNENO nakua a'an neu Nai Musa nak,

⁶“Ambeti maikan atoni-atoni Lewi na'ko atoni Israel bian ma anmo'e luli besa knino neu sin

⁷nok taos mo'et i: ampisil oe neu sin anfani luli besa naknino'on ma amlenu sin an eu sin aon ok-oke ma anfase sin blua pake. Nok le nane te sin naknino'on.

⁸Oke te amlenu sin naiti bijae keso mese ateta nok fua tulu bukae na'ko ut maselo mina anfani fua tulu sako sanat.

⁹Oke te amnibun nonot Israel ok-oke ma amlenu atoni Lewi sin anhake anbi Au Um-ume in matan.

¹⁰Nonot Israel mes antao sin niman neu atoni Lewi sin anakan,

¹¹oke te Nai Harun natulu atoni-atoni Lewi nane on tulu tnatas le anbeti nateta sin na'ko atoni Israel neu Kau, he nati' sin nabe'i nanaoba Au luli besa.

¹²Oke te atoni Lewi mes antao sin niman neu bijae keso nua en nane sin anakan; es mes natulu neu fua tulu sako sanat, ma es anteni neu fua tulu mnotu. Nok luli besa nane naknino atoni Lewi sin.

¹³Ambeti miteta atoni-atoni Lewi sin neu Kau ma amlenu sin antuthae Nai Harun ma in anah-anah sin.

¹⁴Nok luli besa nane him beti miteta atoni-atoni Lewi na'ko atoni Israel bian, he nati' sin anfani Au ini.

¹⁵Leka ho munaoba mulali lasi luli besa nana'at atoni-atoni Lewi nane, sin mu'i kuasat hen mepu anbi Au Um-ume nanan.

¹⁶Au mo'e ulali sin anseka ale li'anmone unu Israel; es nane te sin le nane anbeti nateta sin neu Kau.

¹⁷Anbi tabu Au umate ale li'anmone unu anbi Mesir, anmone unu na'ko ale ume toko Israel ma ale mu'it le nahonis nahunun sin Au mo'e anfani Au in-ini kun.

¹⁸Tabu le i on anfani aseka ale li'anmone unu Israel, Au aiti atoni-atoni Lewi,

¹⁹ma atoni-atoni Lewi nane Au una'at sin neu Nai Harun ma in anah-anah sin, he nati' nabe'i sin anmepu neu atoni Israel anbi Au Um-ume nanan, onane amsa he nati' sin antoti Kau he Au sako sanat nonot Israel he anti nonot nane ka napeni fa amle'ut leka sin nem anhaumak nis neu bale knino le nane.”

²⁰Es nane te Nai Musa, Nai Harun ma ale nonot Israel ok-oke natulu atoni Lewi neu UISNENO, onle UISNENO anfe plenat neu Nai Musa.

²¹Atoni-atoni Lewi nane sin anmo' luli besa naknino aon ma anfase sin blua pake, oke te Nai Harun natulu sin on tulu tnatas le anbeti nateta sin neu UISNENO. In anmo' amsa luli besa neu naknino sin.

²²Atoni Israel antao ma anmo' ale sa' le UISNENO naplenat nani neu Nai Musa antom atoni Lewi. Nok nane te atoni Lewi napeni kuasat hen mepu anbi Um-ume UISNENO anbi Nai Harun ma in anah sin kuasat ma sin aplenat.

²³UISNENO nakua a'an neu Nai Musa nak,

²⁴“Ale atoni Lewi le sin ton bo'nua am nim nekin sae, mes nanaoba sin mepu anbi Au Um-ume nanan,

²⁵ma leka in ton bo'nim mes nafetin in na'ko in mepu.

²⁶Oke onane te nabe'i in antuntaku atoni Lewi bian le anmepu anbi Au Um-ume, mes in ka nabe'i anteni fa he napeni mepu le na'ki nabala. Onle nane taos mo'et le anlek ma anlulu mepu neu atoni-atoni Lewi.”