Read Uab Meto MIKHA 1 Bible Online

MIKHA 1 - Uab Meto bible

MIKHA 1

¹Nai Mikha na'ko kot a'baut mese in kanan Moresyet. Anbi tabu Kesel Nai Yotam, Nai Ahas ma Nai Hizkia naplenat pah Yehuda anmasenu ma anmaseka, Nai Mikha ansimo fef ba'an UISNENO antom Samaria ma Yerusalem.

²Amnen nai, hoi uf-uf! Ampanat nai, hoi ale atokos anfun natef pah pinan ok-oke! UISNENO Anesit Afinit nanoebon nem anfani on saksi ma anlaban ki ok-oke! Mitnin nai In nakua a'an na'ko In Ume knino anbi neno tunan.

³In ansanu nem na'ko In Ume knino ma naoin-oin son anbi tubu-tubu anbi pah pinan sin tunan.

⁴Tubu-tubu natkua anbi In haen nanan onle nini' anbi ai in nanan le anpin; in afu nane anmo'es ma ansai neu nonof sin, onle oe le ansai na'ko netu-netu sin fafon neu pinan.

⁵Ale lasi nane of anbol natuin atoni-atoni Israel sin sanat ma anlaban Uisneno. Sekau ka es anmo'e Israel sin anmo'e sanat? Ai ka sin kot ainaf es Samaria? Sekau ka es anmo'e Yehuda nabes neu uisneno teta? Ai ka Yerusalem anmes fa?

⁶Es nanet UISNENO nakua a'an nak, “Of Au mo'e Samaria anfani fatu atupu anbi mnela, ma bale he nati' ansen tua min kase. Kot nane in atkuas of Au polin neu nonof, ma of Au upoitan ani in tu'in-tu'in sin.

⁷In fatu le'u ma hau le'u le maupa of Au uskuku ani sin, ma amaus-amaus le anfe nani neu bife-bife le anmepu anbi ume le'u of mamnotu, ma ale in fatu le'u ma hau le'u of male'un. Bale-bale nane anfani sin luli besa neu uisneno teta le anfe amliat neu pah. Tabu le i bale-bale nane of musu sin naiti ma neki anfani fuat neu sin uisneno teta.”

⁸Es nanet au, Nai Mikha, au nekak antu', ma ansanane. Au u'oinsok mes ka pake fa bale pake ma pen haef he nati' au uton au nek tu'as nane anaek kun. Of au konon onle asu fui ma anbai onle kolo paha snaen.

⁹Natuin Samaria sin papa' of ka naleko fa, ma Yehuda antam anbi monit le namnes onen amsa. Snama antam antia nalali Yerusalem, eno naek na'ko au pah ma au nifu.

¹⁰Kais mitonan hit musu-musu sin anbi Gat neu hit asnama; kais mifetin sin hen kiso hit kaet kulut. Hoi atokos Bet-Le-Afra, amliloe anbi afu in nanan hen fani taka' neu hi nek ole!

¹¹Hi atokos bit Safir, amnao nai neu bale mapolin, ma kais meki bale pake ma so amnek maebom! Atoni-atoni Zaanan of ka nabe'i fa hen poi na'ko sin kot. Atokos abit Bet-Haezel sin sakoit naton neu ki nak anbi bale nane kan mu'i fa bale neot ma hafot.

¹²Asnama le UISNENO nasanut nane nem antia nalali eno naek Yerusalem in matan! Es le nane, atoni Marot of ka napeni fa tuntakus.

¹³Hi atokos abit Lakhis, amfutun bikase nai anbi aklet makenat! Him lomi he mo'e mituin sanat-sanat le atoni Israel anmo'e nani talantia Yerusalem nok nasanab amsa.

¹⁴Tabu le i, hoi atoni Yehuda hi of mineku mani kot. Moresyet-Gat. Kesel-kesel Israel of ka napeni anteni fa tuntakus na'ko kot Akhzib.

¹⁵Hoi atoni Maresya, UISNENO of nana'at ki neu musu in niman le naplenat hi kot. Atopus-atopus Israel le anmu'i kuasat of na'tolo' anbi nuat-nuat anbi Adulam.

¹⁶Hoi atoni Yehuda, amketu hi nakfunu anfani taka' neu hi nek tu'as neu hi anah sin le him nek mani sin. Am eu hi nakam talantia mois monas onle kolo amnah punu', natuin hi anah sin neki sin nao neu bale mapolin.