Read Uab Meto MIKHA 2 Bible Online

MIKHA 2 - Uab Meto bible

MIKHA 2

¹Amle'ut neu atoni le natenab maufinu leka in antup anbi in hala tupa anbi fai, ma nanaoba nani anbi nok-noka natuin sin anmu'it be'it matani neu he nati' anmo'e nani.

²Leka sin anlomi lene mese, sin of nasik nani. Leka sin anlomi ume mese, sin of antam ma natua nani in. Leko amaus ma leko tuaf sin of kan moni fa nok tainine.

³Es nanet UISNENO nakua a'an nak, “Of Au usanut asnama neu ki, talantia of hi ka mifetnom fa mi'kone. Anbi tabu amle'ut nane of hi ka mioinsom fa nok neka naeb anteni.

⁴Hi monim nane of atoni anpake on molok akle'at, ma sin anmo'e sit kaet kulut le i, ‘UISNENO antet nan hai pah le i ma anfe nani neu atoni le natam kai anbi pa'an. In naskuku ma naklati nalali kai.’ ”

⁵Es nanet leka antia in eti ma in tabu pah le i of anfe nani neu to UISNENO, ma na'ko kai es of kan simo fa in pa'.

⁶Atoni-atoni nabeno Uisneno In a'an neu kau nak, “Kais mubeno Uisneno In a'an neu kai. Kais mubeno ale lasi nane. Hai of ka mimaebom fa.

⁷Kais ho mutenab mak UISNENO ansukat nalali In to Israel! UISNENO of kan mo'e fa lasi-lasi nane. In nek anone nane of ka namneku fa. Ai In ka nauab fa nok nek mahoe neu atoni le anmo'e amneot?”

⁸UISNENO natae nak, “Hi es amken Au to onle musu. Atoni anfani nem na'ko makenat nok nek afnekan he nati' naben tainine anbi in ume nanan, mes anbi nane him pao neu he nati' misik man in ume.

⁹Bife-bife na'ko Au to sin atnanan him li'u sin na'ko sin ume le sin anek nani, ma hi misik man tetus le Au fe ani neu sin anah-anah sin.

¹⁰Amfen nai ma amnao nai; kan mu'i fa tainine anteni anbi bale i. Natuin hi sanat-sanat sin asnama le nahakataun nane ansanu anbi bale le i.

¹¹Him lomi neu Mafefa knino le napoibom ma anfuli ki ma aton nak of hi mu'i tua min kase ma mninut amafut le nathoe.”

¹²UISNENO nakua anteni In a'an nak, “Hoi to Israel in nesin! Of Au nibun ubuab ki ma umeseb ki onle bibi kase le anfani nem neu in o'of. Onle mnela hufui le nahenu nok bibi kase, onane amsa ho pah of nahenu nok tuaf namfau.

¹³Of Au fai lanan ma upoitan ki na'ko bale mapolin. Of hi miskuku eno-eno naek ma of hi mifetnom. Au, mes kuk hi UISNENO, Au fani hi Kesel, ma of Au topu upoitan ki.”