Read Uab Meto MIKHA 3 Bible Online

MIKHA 3 - Uab Meto bible

MIKHA 3

¹Amnen nai, hoi ana' plenat Israel! So namneo hi he mihin sa' es namneo ma namnono,

²mes him nek nanan alekot, ma amlomi bulalu. Him pu' mani Au to sin pasu nok ahon-honis ma hi minisi' nesa' na'ko sin nuifin.

³Hi miah Au to. Him pisu sin pasu ma hi miskuku sin nuifin. Him ketu sin onle hi minutu sisi he mitam neu tasu in nanan.

⁴Of antia in tabu hi of amhunun ma amtoti babat neu UISNENO mes In of ka natae fa. In of ka nen fa hi onen totis sin, natuin hi mo'e milali maufinu.

⁵Ale Mafefa knino sin anfuli Au to ma antek alekot neu atoni-atoni le anfen sin noni, mes namusu nok ma nanebet atoni-atoni le kan fen fa sin noni. UISNENO nakua a'an neu Mafefa knino nane nak,

⁶“Hoi Mafefa knino, ho tabu ma ho eti nane anhaumak he namsopu; ho manas hen tesan. Hi of ka mipeni amteni fa mnitas le naton Au salit-salit sin. Hi of ka nabe'i fa hem etun ma miton sa'-sa' es anten.”

⁷Atoni-atoni le an etun ma naton neu monit anbi neno amnemat of namaebok natuin sin tonas nane luman ma sona kun. Sin alsin of namneku natuin Uisneno ka natae fa sin.

⁸Mes neu au aok le i, UISNENO natua nalali kau neki In Smanan knino ma In kuasat. In anfe neu kau hinet ma lasi amnonot, ma In namepan kau neu he nati' uton sanat-sanat le atoni Israel anmo'e nalali.

⁹Amnen au molok-molok le i, hoi ana' aplenat Israel le amnek nanan amnonot ma miklelo amneot nane.

¹⁰Hi mifena Yerusalem, Uisneno In kot, le anfatan ma antu'in anbi malolot ma lasi susu'.

¹¹Ana' aplenat anbi kot in nanan naplenat he nati' napeni noni poh fefaf, Ana' fuat knino sin nanoina plenat UISNENO he nati' napeni upa', ma Mafefa knino sin antoti lekat lulut Uisneno he napeni noni — nalali te sin natenab nak UISNENO anpesi nok sin. Sin namolok nak, “UISNENO anhake anbi hit atnanak; ma asnama of kan toman kit fa.”

¹²Natuin ho maufinu le nane, Sion of mate'un onle lene, Yerusalem of anfani fatu atupuk, ma tubu Ume UISNENO of anfani nasi kisan.