Read Uab Meto MIKHA 6 Bible Online

MIKHA 6 - Uab Meto bible

MIKHA 6

¹Amnen nai lasi uf le UISNENO nalulu neu Israel. Amfen nai, koi UISNENO, ma mutiab nai Ho lasi uf! Maut he nati' tubu nu'af sin anen sa' le he Ho mumolok mani.

²Hoi tubu-tubu, hoi pah in sukit, amnen nai UISNENO In lasi uf! In anmu'i lasi nok In to ma In of antoti han taes na'ko sin.

³UISNENO nakua a'an nak, “Hoi Au to, sa' es Au moe ulali neu ki? Au ususab ki anbi lasi sa' ka? Mitae Kau nai!

⁴Au upoitan ulali ki na'ko pah Mesir, ma Au ufetin ki na'ko lasi aten; Au lenu uali Nai Musa ma Nai Harun ma bi Miryam he nati' antopu ki.

⁵Au to ki, mimnau sa' le Nai Balak kesel Moab ansali nani neu ki, ma sa' le Nai Bileam Nai Beor in anah natae nani in. Mimnau sa' es anbol anbi lanan anbi um-ume Sitim ma Gilgal sin atnanan. Kalu hi mimnau lasi nane, of hi mihin neu sa' le Au moe ulali he nati' ufetin ki.”

⁶Sa' es of hit tatulu tani neu UISNENO, hit Uisneno abit neno tunan, leka hit tam ma tabes neu In? Mes hit he teki bijae tipu alekot ka he nati' hit tatulu anfani fua mnotu neu In?

⁷Of UISNENO In nekan anmalin ka kalu hit teki neune bibi kase nifun-nifun ai mina bub fua mina le nathoe? Ai mes hit he tatulu neu In hit anmone unu anfani sako sanat neu hit sanat-sanat sin ka?

⁸Ka onan fa! UISNENO naton nalali neu kit sa' es naleko. Le In antoti na'ko kit esle' so hit atmoe nok amnonot, tanaoba lasi manekat, ma atmoni nok nek amnebet he mese kit tok hit Uisneno.

⁹Nek ahinet amneot esle' tamtausan UISNENO. In ansakoi neu atokos anbi kot in nanan nak, “Amnen nai, hoi hi le mibua anbi kot in nanan!

¹⁰Anbi atoni-atoni amaufinut sin ume hit tapeni bnak le sin napeni neki fulit ma poi. Sin anpake tnais le an aklapa, mo'et mes le Au ka lomi fa. Atoni le anmoe lasi nane of Au kas in.

¹¹Au moe onme ka he nati' Au sako atoni le anpake tnais nok poi nane sin sanat?

¹²Atoni-atoni amu'it anbi hi kot in nanan nasusu' atoni amamu'it, ma hi mipoibom ok-oke.

¹³Tabu le of Au tepo ma uskuku ki natuin hi sanat-sanat sin.

¹⁴Hi of miah, mes mes hi ka mimsen fa — mes of hi mimnah piut. Hi of maiti hi bale-bale sin, mes of hi ka mitiab fa sin. Sa' es hi mitiab of Au uskuku ani anbi makenat in nanan.

¹⁵Of him kifun ane kase, mes of hi kam ketu fa in nesan. Hi of amoe mina na'ko bub fua mina in fuan, mes of hi kam pake fa in mina. Hi of am anbi tua min kase, mes of hi ka minu mani fa.

¹⁶Ale lasi-lasi nane anbol natuin hi mituin mo'et-mo'et maufinu na'ko Kesel Nai Omri ma in anah, esle' Kesel Nai Ahab. Hi mituin sin monit. Es nanet, of Au uskuku ki, ma ale uf-uf of naakan ma nasi'u ki.”