Read Uab Meto NAHUM 1 Bible Online

NAHUM 1 - Uab Meto bible

NAHUM 1

¹Le i fef ba'an Uisneno neu Niniwe. Fef ba'an nane natonon anbi mnitas neu Nai Nahum, Mafefa knino mese le nem na'ko Elkos.

²UISNENO nane kan mu'i fa In aletan, atoni le anlaban In namneo of napeni kasat. Nok nek to'as ma maunu naek, In of anseunbanin nek nanan neu sin.

³Namneo UISNENO, ka nato' fa labah; mes In akuasat kun amsa talantia sekau le anmo'e elet ma tanhais mes ka nafetnon fa na'ko kasat. UISNENO anao nok me, anbi nane anmu'i nautus; anbi me le In anhalin In haen, anbi nane afu skuku anfani nope.

⁴In ankas tasi ma nameto nani, In nameti ale noe sin oe. Tubu Karmel ma mnela-mnela anbi Basan nane anmois ma ale tuna anbi Libanon nane anmaknene.

⁵Tubu-tubu sin na'tai anbi In human In matan ma ale netu-netu sin anmaisana oke. Pah pinan na'tai leka UISNENO natbol, pah pinan ma ale atuas anlilitai.

⁶Sekau es anhake nalabalah leka UISNENO nato'? Kan mu'i fa es he nafetnon na'ko In to'as ma In maunu? In nasanut In nek to'as onle ai anpin ma fatu naskuku ma anfani afu anbi In human In matan.

⁷UISNENO nane alekot kun, In naneo ma nahafo In to leka sin nanukbok, In anpanat atoni le naneo ma nahaofton anbi In.

⁸In naskuku In musu-musu sin onle noe sako naek ansai. Sin le anlomi hen laban In, In nasanut neu sin maten ma amle'ut.

⁹Tenab sa' le ho mo'e he hem laban UISNENO, namneo of naeku nok in amle'un. In of kan seunbanin fa In nek to'as nane neu In musu-musu sin talantia hae nua.

¹⁰Of notu ko onle aen ta'u ametos onle nasi kisan le anmatalu es nok es.

¹¹Na'ko ko, hoi Niniwe, atoni mese nok in salit maufinu sin mes anbol. In anmo'e tenab ma salit he nati' an laban UISNENO.

¹²Es nanet UISNENO nakua a'an neu Israel In to nak, “Maski nak atoni-atoni Asyur nane sin abe'it ma amatanit ma sin ain namfau, mes of naskuku ma naneku nani sin. Hoi Au to, Au mo'e ki talantia him tam anbi nukat, mes Au of ka mo'e teni fa onane.

¹³Tabu le i of Au usopu ani kuasat Asyur neu ki, ma of Au ufek kolen besi le anfutu ki.”

¹⁴Le i fekat UISNENO neu pah Asyur, “Sin of kan mu'i anteni fa sufa ka'uf neu he nanaob anteni sin pah. Sin fatu le'u ma hau le'u mahuma le anbi ume le'u in nanan, of Au uskuku ani sin. Nopu maten neu uf Asyur Au uloitan ani, natuin ka nabe'i fa he nati' sin anmoni anteni!”

¹⁵Amkiso nai, atoni malelu mese nem anao natuin tubu-tubu, in neki beno alekot, beno mnisat. Hoi uf Yehuda, munaeb ho neno naek ma ambaen ho tulu manta'en neu Uisneno. Amaufinut sin of ka naplenat anteni fa ho pah. Natuin sin naskuku nalali ok-oke.