Read Uab Meto NAHUM 2 Bible Online

NAHUM 2 - Uab Meto bible

NAHUM 2

¹Hoi Niniwe, amnen nai! Le he nale'un ko in nem nalali! Ampanat ho kot-kot aninit sin! Ampanat lanan sin! Muloitan nai he nati' amaken.

²(Namneo, UISNENO of naloitan Israel in alekot, he nati' anfani on afi anbi ahun-hunut nahun na'ko in musu-musu sin an aten nani in.)

³Ben aninit na'ko musu le in koton amtasa, ma in bale pake nane one na'. Musu naloitan nalali he nati' anlaban. In aklet in besi sin nalim, onle ai. Ale in bikase sin an oka letin.

⁴Anbi lanan, aklet-aklet nane anao mat nok manoe. Sin anmali'un es nok es anbi nai mnela. Atkisot onle paku le anpin, sin anmanoe onle limat.

⁵Ale meo nakaf anboin sin ma antomat; sin nao nok aspaet le hen maken. Sin nao nok manapat neu baki lape anbi kot, besi he naskuku sin nahakeb nani.

⁶Ale noe in oe mata' sin natfai nalali, es nanet hanaf naskeken ale abit sonaf in nanan!

⁷Anheke nan kato, abha'et sin nanoi ma ankae, sin ansanane onle ko ot kase, ma anke sin a'basan natuin nanukbok.

⁸To ana anbi Niniwe nasitbok, onle oe ansai na'ko nifu le anpe'. Anmu'i han hunu nak, “Misnas, misnas!” mes ka tit fa es hen fani nem.

⁹Misik man ale mnatu ma noni muti! Amaus anbi kot le i in nanan namneo nathoe!

¹⁰Naskuku nalali Niniwe, namne ma mois. Nekaf anmaisana natuin amtaus. Tuk an ole ma na'tai. Ale atoni sin human anmutik.

¹¹Tabu le i kot nane es me ka? Kot le on nuat bale meo asu natua anbine? Bale meo asu anhao in ana sin, bale meo asu mone ma ainaf anao neune, bale tainine neu in ana sin?

¹²Afi anbi ahunut meo asu anheke in musu anbine, ma anpisu neu in ainaf ma in ana sin. In nahenu in kuna neki in sisi heke.

¹³“Au le i ho musu,” UISNENO Akuasat Afinit nakua a'an. “Ale ho aklet sin of Au otu ani sin ok-oke. Ale ho solalus sin of anmate anbi makenat in nanan, ma of Au aiti ale sa' le ho maiti mulali na'ko atoni bian. Atoni-atoni malenu nane of sin totis ka masimo fa.”