Read Uab Meto NAHUM 3 Bible Online

NAHUM 3 - Uab Meto bible

NAHUM 3

¹Amle'ut neu kot le i le nahenu nok poi ma malolot; le nahenu nok blua masikat ai mateta.

²Amnen nai ue biso nane in amisun ma besi in akilon, bikase hopu in akuen ma aklet in a'lun.

³Solalus asae bikase anmaken nok makoet, suni nasna ma auni nalim. Kat so'i tabe'i fa aif na'ko atoni amates, sin nitun na'tupu', talantia atoni nastun.

⁴Uisneno anfe kasat neu Niniwe amapaisa nane. In masan nane nahelan. In anfe le'u neu uf namfau, in anfuli sin anbi in molok hanoet.

⁵UISNENO Akuasat Afinit nakua a'an nak, “Hoi Niniwe, of Au hamu'i ko! Ho bale pake of Au kasu ani anbi uf-uf sin matan, talantia sin nit ho aom.

⁶Of Au mo'e ko onle blua le neki hainisit, ma Au poli ko eki ma'lafu; ma of Au mo'e ko anfani meu mataf.

⁷Le ankiso nit ko of na'lobon na'ko ko ma namolok nak, ‘Niniwe anfani fatu atupuk! Sekau es nekan anle'u nok in? Ka tit fa es he nati' anhalin in.’ ”

⁸Hoi Niniwe, ho ka muleko amnesin fa Tebe, kot ainaf Mesir? Tebe amsa anbi noe in ninen le naneo in anfani on baki lape. Namneo, Noe Nil nane anfani kot neu in.

⁹Tebe nane naplenat Sudan ma Mesir, ma in kuasat nane kan mu'i fa in ekan in tu'an; Libia ma Put nane namesbok nok in.

¹⁰Maski nak onane, atokos anbi Tebe anheke sin ma neki sin neu bale mapolin. Anbi ale lanan sin sebin, in anah-anah sin matepo talantia anmate. Anfutu in anaet sin neki kolen besi ma anbati sin neu aheket-aheket sin.

¹¹Hai Niniwe, ho matam of anfani natuin lasi mafu. Ho of mami lanan he mufetnom na'ko ho musu-musu sin.

¹²Ho kot sin of anfani hau bubuk le nahenu nok fuaf-fuaf amnatus. Leka anbeko hau le nane, in fuan sin of anmofu neu atoni-atoni le anlomi he nah sin fefan.

¹³Ale ho meo pa'e sin of sin ole onle bife ma ho pah nane of ka napeni fa matani hen mabunabas nok musu. Ai of nuto nani ho eno naek sin falo'.

¹⁴Muhenu oe anfani loitan balab anbi tabu anfun natef ko, ma mumepan ho kot-kot sin! Amhali klofo he nati' amoe fatu-fatu amtas, ma mupan in blua mo'ek sin.

¹⁵Sa' le ho mo'e amsa, of son-sona kun, natuin of hom putu mate ai amate anbi makenat in nanan. Of ho mumneku onle lamat antoman lene in nesan. Hom pe' ma mufua onle lamat.

¹⁶Ho a'sosa sin namfau anesin afkun-afkun anbi neno atnanan! Mes tabu le i sin of namneku, onle lamat anfani in ninen ma natpen nao namneku.

¹⁷Ho anaet ma ana' aplenat sin onle pukan lamat le nahaofton anbi ale baki lape anbi tabu manikin. Mes leka manas ansae, sin of natpene ma nao namneku; kan mu'i fa atoni mese he nahin neu bale me sin anao.

¹⁸Hoi kesel pah Asyur! Ale ho Kumlol anbi pah anmate nalali, ma ale ho Bupati sin antup talantia nabal-bal. Ho to sin nasitbok anbi tubu-tubu, ma kan mu'i fa atoni mese he neki nafani sin anfani nem.

¹⁹Ho ilo' nane kan mu'i fa in palolin, ma ho papa' sin ka maleko fa. Ale atoni le sin nen tonas matom nok naskuku ko of napasa' nimaf nok malinat. Natuin ale atoni antam anbi nukat natuin ho maufinu le ka namsopu nit fa nane.