Read Uab Meto HABAKUK 3 Bible Online

HABAKUK 3 - Uab Meto bible

HABAKUK 3

¹Le in onen totis na'ko Mafefa Knino Nai Habakuk:

²Koi UISNENO, au nen neu ale Ho mo'et, es nane te nek amnebet nahenu anbi au nekak. So nati' mo'et anaek nane Ho muton amteni, ma muton anbi hai neno monit le i. So nati' Hom nek kai maski nak Ho muto'an kai.

³Ho Uisneno Aknino Afin-finit munoebom aum mu'ko Teman, Ho aum mu'ko tubu-tubu Paran. Neno atnanan nahenu nok Ho apinat; pah pinan nahenu nok sit pules neu Ko.

⁴Ho aum anbi pina le antana, ma meusine nane anpoi na'ko Ho nukum, anbi nane Ho mutolo' Ho kuasat.

⁵Ho musanut menas anao nahunun Ko ma maten natuin Ko anbi Ho kotim.

⁶Leka Ho musnas, pah pinan anlilitai; leka Ho mail, pah pinan naskek. Tubu-tubu le anhake na'ko koba anpe' pisa-pisa, netu-netu ahun-hunut na'pal anbi netu-netu le nane Hom nao mutuin sin anbi un-unun.

⁷Au it amtaus antoman to Kusyan, ma atoni Midian sin na'tai.

⁸Koi UISNENO, Ho muto' natuin tasi ka? Noe-noe nane ai es anmo'e Ho nekam anmaputu? Hom sae meu nope anfani bikase ma aklet makenat, leka Hom fe mnisat neu Ho to.

⁹Ho muloitan mulali Ho klaot, ma Ho muloitan mulali Ho a'anef he nati' mufetin. Nalali te pah pinan le i Ho mupe' anfani noe-noe.

¹⁰Ale tubu-tubu na'beko leka ankiso Ko; na'ko neno tunan ulan ansanu onle maopan. Oe anbi afu pinan in hanan na'lu', in okin anunuon ma anpesnon.

¹¹Ho as'anef sin liman naen nok manoe, Ho suni sin anpin nalim-nalim, es nane te manas ma funan nasnas anbi sin balan.

¹²Nok nek to'as Hom fun mutef pah pinan; nok nek maputu Hom hali ale uf-uf.

¹³Hom nao mat nok manoe le mupoitan Ho to ma he mufetin Ho kesel le Hom beti mulali. Hom tepo mutseleb atopus atoni abulalut, he muneku mufinib atoni le natuin in.

¹⁴Ho as'anef sin napau napisu atopus na'ko meo pa'e le anlaban tabu le in solalus sin nem ma sin matanin onle nautus, he nasitab kai. Sin anmani nok malinat onle atoni le nok amnes-amnes nasusu' ma namusi atoni anukat.

¹⁵Hom hali oe tasi naek meki Ho bikase ma tasi fulen muti.

¹⁶Au nen lasi nane, au nekak na'tai' ma au luluk anpipis. Au fani a olet alima'et ma ka mu'i fa be'it matani, anbi me le au nao utuin au haek an ek'on. Au of a'pao nok amneot kasat Uisneno neu ale atoni amakenat.

¹⁷Maski nak hau bubuk kan mu'i fa in fuan, ma tua min kase kan mu'i fa in oen, maski nak hau bub fua mina kan mu'i fa in nesan ma aen kase anbi lene neki nek a olet, maski nak bibi kase sin anmate oke ma mu'it in pa'an kan mu'i fa in nesan,

¹⁸au of umlil piut, natuin UISNENO au afetin.

¹⁹Hom fe kau be'it matani onle lus in haen, Hom tuntaku au haek. Hom topu kau he nati' au moni nok amneot, maski nak au nao utuin tubu-tubu sin.