Read Uab Meto ZEFANYA 1 Bible Online

ZEFANYA 1 - Uab Meto bible

ZEFANYA 1

¹Nai Zefanya nane Nai Kusyi in anah. In pi'ot sanut mofut na'ko pin neu fafon esle' Nai Kusyi, Nai Gedalya, Nai Amazia ma Kesel Nai Hizkia. Le i fef ba'an UISNENO neu Nai Zefanya anbi tabu Kesel Nai Yosia le Nai Amon in anah naplenat Yehuda.

²UISNENO nakua In a'an nak, “Au of ule'un ale sa' anbi pah pinan;

³ale mansian ma mu'it, ale kolo ma ika sin antam amsa. Au of umate atoni amaufinut. Ale to mansian of Au ule'un, kan mu'i fa atoni mese le Au he ufetin hen moni. Au, UISNENO, es umolok ulali.

⁴Au of a'kas atokos anbi Yerusalem ma Yehuda anfun natef. Of Au uneku ani luli besa neu Baal in nesin na'ko sin bale nane. Ana' fuat-ana' fuat le antuthae Baal nane of manikan anfin kun.

⁵Of Au pitil uknino sekau ma sekau le ansae neu ume in penen he nabes neu manas, funan ma afkun-afkun. Of Au uneku ani sin le nabes neu Kau ma le ansup nok aki'at neu Kau, mes le ansup amsa natuin kanaf uisneno teta Milkom.

⁶Au of ule'un sin le ka nem fa neu Kau ai kan toti fa topus ma le nasaitan nalali Kau ma kan lomi fa he natuin Kau.”

⁷Neno UISNENO in tabu nane anhaumak nalali, anbi neno nane Uisneno of anmo'e nani, es nane te so him ta' anbi In matan. UISNENO naloitan neu he nati' anlolo In to onle fua tulu ma In anhone nalali musu-musu Yehuda.

⁸“Anbi neno malolot nane,” UISNENO nakua a'an nak, “Au of a'kas ale anaet sin, ale naimnuke, ma ale atoni le natuin luli besa atoni anao mnemat.

⁹Of Au kas ale atoni le naluli nabes onle atoni le ka nahin Kau fa, ma le nabak, ma namate, he natua in usin in ume neki blua-blua masikat.”

¹⁰“Anbi neno nane,” onle nane UISNENO nakua a'an nak, “kaet kulut of manena anbi Eno Naek Ika. Kaet kulut nane of manena na'ko kuan fe'u, ma slutuf anaek nem na'ko tubu-tubu sin.

¹¹Amkae ma amkul nai anbi tabu him nen lasi le nane, hoi amaika abit kot aon bian pinan, natuin ale a'sosa ma atoni-atoni le nati' i in noni ma anfe nani anmate nalali!

¹²Anbi tabu nane of Au aiti nopo', ma pukai kot Yerusalem. Of Au kas tuafen le monin fe na oni ma na losib sin aon anmes, ma natenab nak Au, UISNENO le ka mo'e it fa on i ai on nane.

¹³Sin amauf of nasik nani ma sin ume-ume sin of naskuku nani sin. Sin of nafena nafani ume, mes of ka namaika fa anbine. Sin of anmepu lene tua min kase, mes sin of ka ninu fa sin tua min kase in oen.”

¹⁴Neno lef lasi UISNENO anhaumak nalali, namneo, anhaumak nis, ma of anbol lab-labah. Neno le nane nahenu nok nu'ut, meo pa'e abe'it ma amatanit amsa sin of nanoi natuin nekan an ole!

¹⁵Neno nane neno to'as ma maunu, susal ma nukat, neno atkuas ma askuku, neno mesokan ma namsab, neno le nahakataun ma nahenu nok nope.

¹⁶Anbi neno teme nane of atnen to'is in hanan ma a'baf makenat na'ko ale meo pa'e le nale'un kot-kot baik lape ma ale faut elak amnanut.

¹⁷UISNENO nakua a'an nak, “Au of usanut snama namfau neu to mansian, talantia sin nabkai onle atoni afolot. Sin nasanab nalali neu Kau, ma tabuna' le i sin ansai onle oe, ma sin nitun nafo anbi afu in fafon.”

¹⁸Anbi neno anaet le nane UISNENO of naton In nek to'as, es nane te sin amnatu ma noni muti of kan fen fa sin a'honis. Pah pinan anfun natef of naskuku natuin In ai to'as nane es notu nani. Nok askeken of naiti ale smanaf anbi pah pinan le i.