Read Uab Meto ZEFANYA 2 Bible Online

ZEFANYA 2 - Uab Meto bible

ZEFANYA 2

¹Hoi uf le kan mae nahin fa, anbe' nai

²nahun na'ko hi maknene ma ameto onle tuna! Mimnau nai nahun na'ko neno UISNENO to'as nane antia ma maunu UISNENO le anpin nane antoman ki.

³Amli' mo'e baniom meu UISNENO, hoi ale atoni nek amnebet anbi pah le i, ma ale atoni-atoni le natuin In plenat-plenat sin. Anmo'e mituin UISNENO In salit, munebet ho monim anbi In matan. Sekau es nahin, hi of mifetnom na'ko kasat anbi Neno UISNENO naton In nek to'as.

⁴Anbi kot Gaza kan mu'i fa es le he napeni honis. Askelon of luman ma kan mu'i fa atuas anbine. Atokos anbi Asdod of anli'u sin anbi makenat le naskeken sin anbi manas namtetu ma atkos anbi Ekron of anlenu sin anao na'ko sin kot.

⁵Sukat neu ki, hoi atoni Filistin, uf le namaika anbi tasi in ninen. UISNENO naloitan nalali kasat neu ki, In of nale'un ki, ma na'ko ki of kan mu'i fa es he nafetnon.

⁶Ho pah anhaumak tasi of anfani hufui; atukus sin ume ma po'an neu bibi kase of nafena anbine.

⁷Atokos anbi Yehuda le nafetnon, of antoko natau ho pah le nane. Sin of natuk sin mu'it anbi pah le nane, ma anbi fai sin of antup anbi ume-ume atoni Askelon. Natuin UISNENO, sin Uisneno es naneo ma nahafo anteni sin ma anfe neu sin athoes.

⁸UISNENO Akuasat Afinit nakua a'an nak, “Au nen ulali uf-uf Moab ma Amon nasi'u ma nanebet Au to. Sin nauab he nasik Au to sin pah.

⁹Natuin Au Uisneno amonit, Uisneno uf Israel, Au of uneku Moab ma Amon onle Sodom ma Gomora. Pah-pah anne of nahenu nok nope oe masi ma fatu tupu le kisan of anmoni anbine. Au to in nesin le nafetnon of nasik nan in to, ma nasik nan sin pah.”

¹⁰Of ankas atokos Moab ma Amon natuin sin neka moko ma sin neka naeb, ma natuin sin nasi'u nalali to UISNENO Akuasat Afinit amsa.

¹¹UISNENO of anmo'e sin namtau. In of naskuku uisneno teta anbi pah pinan. Es nane te uf-uf nabes neu UISNENO, es-es anbi in pah anmes kun.

¹²UISNENO of nasanut kasat neu atokos Sudan amsa.

¹³Nalali onane te nok kuasat UISNENO In of naskuku Asyur. In of nalumab kot Niniwe ma anfani mnela le luman kun.

¹⁴Anbi nane pukan mu'it ma ale mu'it huma-huma of antup ma nasnas. Kolo atois of nakun anbi fatu matupuk nane ma le anbai-anbai na'ko eno ana sin. Kolo ka' of ankakoe natuin eno in sutai'. Hau aijob le anpake nafena kot nane of naiti nani.

¹⁵Lasi le nane of anbol anbi kot le nahenu nok malinat ma le natenab nak in aon anmoni nok tainine. In atokos sin natenab nak sin kot le nane kot le anaek anesi anbi pah pinan. Kot le nane namneo luman kun, ma kan mu'it fa amaika anbin alkun mu'i fui es nakun anbine! Atoni mese-mese le nao natuin kot le nane of naskek ma namtau.