Read Uab Meto ZEFANYA 3 Bible Online

ZEFANYA 3 - Uab Meto bible

ZEFANYA 3

¹Sukat neu kot Yerusalem, kot amle'ut le anlomi lasi mabanat neu UISNENO ma le nasusu' ma anmusi in to anmes!

²Amle'ut neu kot le kan lomi fa UISNENO, ma UISNENO In amnaut, ma kan lomi fa amsa hen panat In fainekat sin, ma le ka nana'at fa in monin neu UISNENO, ma kan toti fa babat ma tuntakus neu In.

³Ale anaet anbi kot onle meo asu le anbai. In alef lasi sin onle asu fui-asu fui le namnah, sin anpalu nisan talantia nuif mese amsa sin ka nani fa neu noka.

⁴In Mafefa knino kan mu'i fa nek sutais ma sin ka mapalsai fa; ale ana' fuat sin nalahib sin le anbeti nalali neu UISNENO ma naklelo plenat-plenat Uisneno le neki mnisat neu sin aon anmes kun.

⁵Mes UISNENO fe nokan kot le nane, le anmo'e amneot piut ma kan mo'e nit fa le asanat. Anbi ale nok-noka sin, In anfe amnonot neu In to. Mes atoni le ka nahin fa amnonot anbi kot le nane of anmo'e maufinu piut ma ka nahin fa mae.

⁶UISNENO nakua a'an nak, “Au uneku ulali uf namfau; sin kot-kot sin Au uskuku ani sin ma sin baki lape sin ma sin el fatu sin, Au mo'e sin anfani fatu atupuk. Sin kot-kot sin luman ma kan mu'i fa atuas ma in lanan-lanan sin nauba'.

⁷Au utenab, ‘Namneo tabu le i Au to nabes neu Kau ma anpanat Au noina sin. Namneo of sin namnau noina le Au fe ulali neu sin.’ Mes anbi kisot sin nao mat piut anbi maufinut on afi ahunut.

⁸Mes ampantom! Ampao in neno Au of a'fen ma a'fani amnek lasi. Natuin Au ufek ulali he nibun ale uf-uf ma ale pah-pah le usanut neu sin Au to'as ma Au maunu. Pah pinan of namsab, Au ai to'as of neku nani.

⁹Mes anbi amunit Au of uklelo ale uf-uf nane sin nekan, talantia sin an onen alkun neu Kau, ma ka neu fa uisneno teta bian. Uf-uf nane alsin of natuin Kau.

¹⁰Ma na'ko Sudan le na'lo amsa, Au to le nasitbon nane of nem ma natulu fua tulu neu Kau.

¹¹Anbi tabu le nane, hoi Au to, hi kais amnek mae amteni natuin hi am laban milali Kau. Au of a'li'u ale atoni a'moko ma neka naeb ma of hi ka maban mok amteni Kau fa anbi Au netu knino.

¹²Anbi nane of Au ufetin pah mese le in nek amnebet namaika anbine, ma le nafnek neu Au babat ma tuntakus. Nabe'i sin natua anbine.

¹³Atoni Israel sin nesin, of kan mo'e anteni fa maufinu neu sekau amsa, sin of ka namolok fa lasi poi ma kan mo'e fa lasi kake. Of sin moni nok athoes ma malinat, ma ka namtausan fa sekau amsa.”

¹⁴Hoi Israel, mi'ba' nai ma mimlil nai! Hoi Yerusalem, mimlil meki hi nekam oke!

¹⁵Natuin UISNENO nasnasab kasat neu ki; In anli'u nalali ale hi musu sin. UISNENO anmes anfani Kesel Israel le namneo ma nahafo ki. Tabu le i ka nabe'i fa he hi mimtau amteni.

¹⁶Of antia in tabu atoni-atoni of namolok nak, “Hoi Yerusalem, kais mumtau ma amnek oni.

¹⁷Hi UISNENO es naneo ma nahafo ki. Hi mis milali natuin In kuasat. UISNENO namlil ma namoke natuin ki, In anfe ki monit fe'u anbi In manekan.

¹⁸Natuin hi, In ansi nok amlilat onle atoni le fe anmo'e fesat.” UISNENO nakua a'an nak, “Snama le antoman ki Au ufinib ani. Ho mae sin Au nose ani sin.

¹⁹Antia in tabu Au of uskuku ani atoni le nasusu' ma anmusi ko, ma atoni hae a'olet Au ufetin ani; ale atoni mapolin of Au topu an sin anfani nem. Si'ut neu sin Au ubaina ani anfani apinat; anbi me amsa, anbi pah pinan ok-oke, mes napeni kan apinat ma anpules sin.

²⁰In eti ma in tabu of anbol, ho to sin le nasitbok Au eki ufani sin anfani nem. Hi of mateka ki anfun natef pah pinan, ma Au of uloitan ufani hi athoes.” UISNENO es namolok nalali onane.