Read Uab Meto HAGAI 1 Bible Online

HAGAI 1 - Uab Meto bible

HAGAI 1

¹Kesel Nai Darius naplenat Persia anbi ton nua in nanan, anbi fun ne' antam neno mese, UISNENO namolok nanet natuin Mafefa Knino Nai Hagai. UISNENO In han ba'an nane nalulu neu Nai Zerubabel Nai Sealtiel in anah anfani Gubernur Yehuda, ma neu Ana' Fuat Knino Anaek Nai Yosua Nai Yozadak in anah.

²UISNENO Akuasat Afinit nakua a'an neu Nai Hagai nak, “Uf le i namolok nak in tabu fe kan tia fa neu he nati' nafena nafani Au Ume.”

³Namuni te nanet natuin Mafefa Knino Nai Hagai, UISNENO nakua a'an neu In to nak,

⁴“Hoi Au to, in tabu antia nalali neu ki ka he hi mitua anbi ume le naleok ma namep, mes Au Ume nane anfani fatu-fatu atupuk?

⁵Ait, hom tae mit ho monim anmes!

⁶Him kifun milali fini namfau, mes him seki kle'o ha. Him mu'i kim amnahat, mes ka nanoka fa neu he nati' hi mimsenab hi taim. Hi mu'i kim tua min kase, mes ka nanoka fa neu he nati' hi mihenu hi salit. Hi mu'i kim blua pake, mes ka nanoka fa neu he nati' anhaputu hi aom. Ma baen le ameput sin ansimo ka nanoka fa neu he nati' antalu anteni sin monin.

⁷Ai hi kam be' fa ka, nansa' es lasi nane anbol onane?

⁸Tabu le i amsa, amsae nai neu netu-netu ma am ote hau, ma mifena Au Ume nai; Au of umlil ma hi of mibes neu Kau nok lanan le anmatom. Ait, him tae amteni hi aom!

⁹Hi mifnek he mipeni mnahat nok athoes, mes hi mipeni kle'o ha; hi meki in anfani, mes Au fulak ani hi mnahat, talantia anin natpeneb nani. Nansa' es Au mo'e lasi le nane? In han taes esle': Natuin Au Ume nane fe anfani fatu-fatu atupuk, mes hi al-al ki mifena hi ume mese-mese.

¹⁰Es nane te Au ka usanut fa ulan talantia kan mu'i fa hau sena le nabe'i hen moni.

¹¹Ai usanut ulali ametos neu afu ma netu-netu, neu lene-lene aen kase, ma neu lene-lene tua min kase, ma lene-lene bub fua mina, ma neu hau sena-hau sena anbi afu in fafon le i, ma neu mansian amsa, ma mu'it ma neu ale sa' le hi mepu mani.

¹²Namuni onane te Nai Zerubabel ma Nai Yosua ma ale to Israel anfun natef le anfani nem nalali na'ko bale mapolin anbi Babel, sin natuin uab molok Nai Hagai, atoni malenu na'ko UISNENO. Sin anmo'e sa' le UISNENO naplenat nani neu sin, natuin namtau neu UISNENO.

¹³Oke te Nai Hagai natiab neu to fef ba'an UISNENO nak UISNENO anmanta'en nalali neu he naneo ma nahafo sin.

¹⁴Onle nane UISNENO nafena Kumlol Nai Zerubabel in nekan, Ana' fuat knino Amnanut Nai Yosua in nekan ma ale atoni le anfani nem nalali na'ko bale mapolin sin nekan, he nati' sin alsin anmepu ma nafena Ume UISNENO Akuasat Afinit, sin Uisneno.

¹⁵Sin na'uba mepu anbi fun ne' antam neno bo'nuam ha, tabu Kesel Nai Darius naplenat nan ton nua.