Read Uab Meto ZAKHARIA 1 Bible Online

ZAKHARIA 1 - Uab Meto bible

ZAKHARIA 1

¹Anbi fun fanu Kesel Nai Darius naplenat Persia nan ton nua, UISNENO natiab In fef ba'an le i neu kau, Mafefa Knino Nai Zakharia le Nai Berekya in anah ma Nai Ido in upuf.

²UISNENO naplenat kau he nati' umolok onle i neu In to, “Anbi neno afinit Au, UISNENO Akuasat Afin-finit Au uto'an hi na'if sin.

³Mes tabu le i Au ak neu ki: Amfani aim neu Kau, he nati' Au fani eti eu ki amsa.

⁴Kais on hi na'if sin. Anbi ahun-hunut ale Mafefa knino naton Au fef bela neu sin he nati' kais sin anmo'e anteni maufinu ma anmo'e sanat. Mes sin kan filoli fa ma kan lomi fa he natuin kau.

⁵Hi na'if sin ma Mafefa knino sin le nane tabu le i es kin me ka? Sin ka eski ne fa anteni.

⁶Nanete natuin ale Au Mafefa knino, ma Au ate-ate sin le nane, Au utiab plenat-plenat ma Au mnaut-mnaut sin neu hi na'if sin. Mes sin kan panat sin fa talantia sin ansutai in amnekin. Es nane te sin antofok ma sin antebes nak Au, UISNENO Akuasat Afin-finit, Au kas ulali sin namnes nok sin sanat ma namnes nok Au lekat.”

⁷Anbi fun Syebat, esle' fun bo'es am mese antam neno bo'nua am ha tabu Kesel Nai Darius naplenat nan ton nua UISNENO natiab In fef ba'an neu kau. Anbi mnitas nane anbi fai,

⁸au it ahake UISNENO ansae neu bikase me' mese. In nasnas anbi nonof mese anbi hau-hau murad sin atnanan. Bikase fauk-fauk anhake anteni anbi in kotin, anmu'i le me', anmu'i molo amtasa ma anmu'i le muti.

⁹Au utan neu In ak, “Koi Usif, ale bikase nane in otan sa' ka?” In natae nak, “Of Au uton in otan neu ko.

¹⁰UISNENO ansonu sin he nati' antae pah pinan.”

¹¹Ale bikase nane naton neu ahake neno nak, “Haim fun mitef milali pah pinan, mes pah pinan le i namne ma alekot kun.”

¹²Nalali te ahake neno namolok nak, “UISNENO Akuasat Afin-finit, Ho muto'an Yerusalem ma kot-kot Yehuda anbi ton bo'hitu nanan. Ho muto'an amteni sin antia me ka ma of Ho kam nose fa sin sanat ka?”

¹³UISNENO natae ahake neno nane neki molok-molok halinat,

¹⁴ma ahake neno nane anlenu kau he utiab sa' le UISNENO Akuasat Afin-finit naton nalali neu kau nak, “Au nek ma panat sin kot Yerusalem, Au kot le aknino.

¹⁵Mes Au uto'an uf-uf le sin anmoni nok tainine ma malinat. Natuin leka Au eka Au to'as neu Au to, uf-uf nane sin anhafen anteni Au to sin nu'ut.

¹⁶Tabu le i Au fani neu Yerusalem he nati' Au sako sin sanat. Au Ume mes nahakeb nafani ma kot Yerusalem nane of naloitan nani.”

¹⁷Ahake nane anlenu kau he utiab fef ba'an le i amsa ak, “UISNENO Akuasat Afin-finit anmanta'en nak In kot sin of anmoni nok athoes ma haef mese anteni In of antuntaku Yerusalem ma antebes In anfani in-ini kun.”

¹⁸Anbi mnitas bian anteni in nanan, au it sunaf ha na'ko bijae.

¹⁹Au utan neu ahake neno le namolok nalali neu kau ak, “Sunaf-sunaf nane in oten sa' ka? In natae nak, “Sunaf-sunaf le nane anfani taka ana' plenat-ana' plenat abe'it le nasitab to Yehuda, Israel ma Yerusalem.”

²⁰Oke te UISNENO naton neu kau atoni apakae besi ha le neki biso.

²¹Au utan ak, “Sin nem nane salit sa' ka?” In natae nak, “Hen hakatau ma natselab uf-uf le naskuku nalali Yehuda ma le nasitab nalali In to.”