Read Uab Meto ZAKHARIA 10 Bible Online

ZAKHARIA 10 - Uab Meto bible

ZAKHARIA 10

¹Leka oefat antia, amtoti nai ulan neu UISNENO. UISNENO of anibun nope mafena, ma nasanut ulan anaek talante lene-lene sin no mate ma neki malinat neu ale atoni.

²Atoni-atoni antoti lekat lulut neu ale fatu le'u ma hau le'u ma neu ale mafefa poi, mes han taes-han taes le sin napeni alkun uab luman ma poi. Anmu'i le ansefi mnitas, mes sin etus tonas nane of nasekeb ki, ma halinat le sin anfe nani nane kan mu'i fa in otan. Es nane te to of nasitbok onle bibi kase. Sin nasunu fun kan mu'i fa atopus.

³UISNENO nakua a'an nak, “Au uto' nae le'uf neu ale ana' aplenat le naplenat Au to, ma of Au fen sin kasat. Mes to Yehuda nane Au in-ini, ma Au, UISNENO Akuasat Afinit of Au panat sin. Of Au moe sin anfani bikase abe'it anbi makenat.

⁴Na'ko sin of Au beti ani ana' aplenat, atopus, ma meo pa'e le of naplenat Au to.”

⁵To Yehuda sin of nis onle amakenat-amakenat le antali sin musu-musu sin onle klofo anbi lanan. Sin of anmaken natuin Au, UISNENO tuntaku sin, ma musu nakaf le ansae bikase nane of sin anli'u naaenab sin.

⁶Of Au fe be'it matani neu to Yehuda, ma of Au ufetin Au to Israel. Of Au ufetin sin neu sin pah natuin Au nek sin. Of Au moe sin onle uf le Au ka penan it fa sin. Au le i sin UISNENO, ma of Au nen sin onen totis.

⁷To Israel of anfani meo pa'e amatanit, of sin namlil onle atoni le ninu tua min kase. Sin sufa ka'uf na'ko batan nao neu batan of ka nikan fa lasi mnisat le Au fe ulali. Sin of namlil ma namoke natuin Au taos Au mo'et neu sin.

⁸Au to of Au boin ma nibun anfani mese. Au ufetin sin ma of Au umnauba sin on afi ahunut.

⁹Maski nak Au usitab sin anbi uf-uf sin atnanan, ma sin anah-anah sin amsa ma sin of anfani ok-oke neu sin pah.

¹⁰Of Au ufani sin na'ko Mesir ma Asyur. Ma of Au eki sin neu sin pah anmes kun. Of Au eki sin neu Gilead ma Libanon amsa, talante sin nahenu ale pah.

¹¹Leka sin anlak nani tasi nukat, Au, UISNENO of a biso ale oki talante Noe Nil of anmeti. Uf Asyur le nanaebon nane of Au unebet ani, ma Mesir le abe'it nane in kuasat of namneku.

¹²Au of umepan Au to, sin of na'ki ma naluli nabes neu Kau. Au, UISNENO, ukua ulali Au a'ak onane.”