Read Uab Meto ZAKHARIA 12 Bible Online

ZAKHARIA 12 - Uab Meto bible

ZAKHARIA 12

¹Le i UISNENO In fef ba'an neu Israel. UISNENO le anlek ma anlulu nani neno tunan, ma anmoe nani pah pinan ma le anfe snasaf neu mansian, nakuan a'an nak,

²“Au of ufani Yerusalem anfani klas mninut le matua nok tua min kase; pah-pah le anhaumak of ninu nani ma nani'bon on atoni amafut. Ma leka musu sin anfun nan Yerusalem, ma kot-kot anbi pah Yehuda le fe anbin of anfun nan sin.

³Mes leka neno antia, of Au moe Yerusalem onle fatu amafenat, uf me le ansu' he nati' naiti in of namle'u. Ale uf anbi pah pinan of nabuabok ma anmaken nok Yerusalem.

⁴Anbi neno le nane of Au moe usunu ale bikase ma of Au moe in asaet sin namaunu, of Au panat to Yehuda, mes ale musu sin bikase of Au ufolob sin matan.

⁵Oke te ale to Yehuda sin of namolok anbi sin nekan nak, ‘UISNENO Akuasat Afin-finit es anfe be'it matani neu In to le namaika anbi Yerusalem.’

⁶Anbi neno nane to Yehuda of Au ufani sin onle ai anbi hau mnotu le matupuk ai paku apinat anbi ane ta'u in nanan; sin of nale'un ale uf-uf le anfun natef in. Mes to anbi Yerusalem of namaika nabala nok tainine anbi kot in nanan.

⁷Au, UISNENO, anbi ahunut of Au fe mnisat neu solalus Yehuda, he nati' lasi tola le Nai Daud in sufan ansimo ma to Yerusalem ka nesin fa lasi tola le to Yehuda bian sin ansimo.

⁸Anbi neno nane of Au panat to Yerusalem; ma le an ole nesi anbi sin atnanan of napeni be'it matani on Nai Daud. Nai Daud in sufan of antopu sin namnes onle Au ahake neno, ma namnes onle Au amsa.

⁹Anbi neno nane of Au ule'un uf mese-mese le ansu' hen maken nok Yerusalem.

¹⁰Namuni onane te Nai Daud in sufan ma to Yerusalem of Au tao nekaf le anlomi makoe ma anlomi onen totis. Of sin ankiso in le sin napapa' ma ankae ma ankul neune, onle atoni le ankae ma ankul neu in anmone bi'an le anmate. Of sin ankae ma ankul nok nu'ut, onle atoni le naneku nalali in anmone anaet.

¹¹Anbi neno le nane of anmu'i kaet kulut anaek anbi Yerusalem onle kaet kulut neu Hadad-Rimon anbi Nonof Megido.

¹²Oke te ume mese-mese anbi pah le nane of ankae ma ankul anmes-meskun; ume na'ko Nai Daud in sufan, ume na'ko Nai Natan in sufan, ume na'ko Nai Lewi in sufan, ume na'ko Nai Simei in sufan, ma ale ume bian anteni. Ume mese-mese of ankae ma ankul anmes, ma atoni-atoni na'ko ume mese-mese of anbatison na'ko ale bife ma ankae ma ankul.”