Read Uab Meto ZAKHARIA 3 Bible Online

ZAKHARIA 3 - Uab Meto bible

ZAKHARIA 3

¹Anbi mnitas mese anteni, UISNENO naton neu kau Ana' Fuat Knino Amnanut Nai Yosua anbi Ahake UISNENO In matan. Anbi Nai Yosua in aon bian Nitu ma naloitan nalali hen mo'e lasi nok in.

²Ahake UISNENO nak neu Nitu nak, “So nati' UISNENO ankas ko hoi Nitu! So nati' UISNENO le anek nalali Yerusalem ankas ko. Atoni le i onle hau nuta le anhel napoitan na'ko ai.”

³Nai Yosua anhake anbi nane ma anpake blua alahit.

⁴Nalali te Ahake neno nane nak neu ale atuntakus anbi neno tunan nak, “Ampolin blua pake alahit na'ko atoni le i.” Ma in nak neu Nai Yosua nak, “Au polin ulali ho sanat, es nane te of Au fe neu ko blua pake fe'u.”

⁵In naplenat ale in atuntakus sin he nati' napakeb pilu fe'u anbi Nai Yosua. Sin natuin ma nalali te sin nablua in neki blua pake fe'u ma Ahake UISNENO anpanat sin.

⁶Nalali te Ahake neno nane natiab fef ba'an UISNENO neu Nai Yosua nak,

⁷“Leka ho mutuin Au plenat sin ma ho muno'u Au mepu le Au fe ulali neu ko, es nane te nabe'i hom fani atopus piut anbi Au Ume in nanan ma muloitan in tetu. Au of asimo ale ho onen totis sin, onle Au nen ulali onen totis na'ko ale Ahake neno le anhaumak nok Kau.

⁸Amnen nai hoi Ana' Fuat Knino Amnanut Nai Yosua, ma neu hi amsa ana' fuat-ana' fuat le amfani in soba, hi ala ki amfani taka na'ko monit alekot anbi neno amnemat. Anbi tabu nane of Au lenu Au ate le antek in nak ‘Sunif’.

⁹Au tao ani fatu mese le masusuf hitu le of Au lun ani eki tuis-tuis anbi Nai Yosua in matan. Anbi neno mese in nanan of Au polin ani pah le i sin sanat.

¹⁰Leka in neno antia, atoni mese-mese of anho nan in aon bian he nati' nem ma antamis halan ma ua leko anbi lene tua min kase sin atnanan ma anbi ho hau bubuk sin.”