Read Uab Meto ZAKHARIA 5 Bible Online

ZAKHARIA 5 - Uab Meto bible

ZAKHARIA 5

¹Au panat it ateni, ma anbi haef le i au it ateni sulat le manunu nane natpene anbi neno atnanan.

²Ahake neno nane natan neu sa' esle' au kiso. Au utae ak, “Au it sulat manunu mese le natpesne anbi neno atnanan. In amnanun meter sio ma in menuan meter ha ma stena.”

³Nalali te in namolok neu kau nak, “Sulat manunu nane matui kasat neu pah le i. Anbi ahunut matui nak ale abakat napoitan sin na'ko pah le i. Ma anbi in aon bian matui nak atoni le anmo'e supat nok poi of napoitan nani.

⁴UISNENO Akuasat Afin-finit nakua a'an nak kasat le i of nasanuton neu atoni abakat sin ume ma neu atoni le anmo'e supat nok poi sin ume. Kasat of antoman ume-ume nane piut talantia sin anfani fatu-fatu mapolin.”

⁵Ahake neno nane anbol anteni ma namolok nak, “Amkiso! Anmu'i anteni nem!”

⁶Au utan ak, “Sa' esle' nane?” In natae nak, “A'ki'u mese. Le nane taka neu sanat' na'ko pah le i anfun natef.”

⁷A'ki'u nane in toben na'ko tnopas. Leka au fe kiso in, tobes le nane naaiton ma anbi ki'u le nane in nanan bife mese antok anbine.

⁸Ahake neno nane nak, “Bife le nane anfani taka neu lasi maufinu.” Nalali te nahakeb nafani bife le nane anbi ki'u in nanan ma in antobe ki'u nane.

⁹Au aiti au matak ma kiso anbi fafon ma au it bife nua natpen nem neu kau. Sin anmu'i ninef le namep onle kolo oe in ninen. Sin naiti ki'u nane nalali te sin neki ma sin nao.

¹⁰Au utan neu Ahake neno nane ak, “Sin he neki ki'u nane neu me ka?”

¹¹In natae nak, “Neu Babel, anbi nane in of nafena nuat neu in. Leka in nafena nalali nuat nane, of sin antao nani anbi nane ma sin nabes neu in.”