Read Uab Meto MALEAKHI 3 Bible Online

MALEAKHI 3 - Uab Meto bible

MALEAKHI 3

¹UISNENO Akuasat Afinit natae nak, “Of Au sonu Au haef he nati' naloitan lanan neu Kau. Ma nok askeken Au, UISNENO le hi mami, of nem neu Au Ume. Au haef le him lomi nane of in nem ma ankakan Au fef bela.”

²Mes sekau es of anhake na'ki anbi Neno UISNENO nanoebon nem ma In nalile In aon? Natuin In onle ai atoni apakae niti molo, ma onle sabun na'ko atoni afase blua.

³In nem on alef lasi, onle atoni hen boe ma naknino noni muti. Onle apakae noni molo le naknino mnatu ma noni muti, onle nane atoni malenu UISNENO nane of naknino ale Ana' fuat knino he nati' sin natulu ale fua tulu nok lanan le UISNENO anlomi nani.

⁴Ma onle afi batan ahunut, UISNENO ansimo In to Yehuda ma Yerusalem sin fua tulu le sin natulu neu In.

⁵UISNENO Akuasat Afinit nakua a'an nak, “Of Au aum neu ki he nati' lefi hi lasi. Of Au fani saksi neu ale mnane, atoni-atoni amapaisa, le ansaksi nok poi, le anbaen atoni ameput ka nok fa amneot, le anhamu'i ale bife banu, li'anmanat, ma atoni anao amnemat, ma neu ale atoni le ka nabes fa neu Kau.”

⁶“Au le i Uisneno kau, ma Au ka ubaina fa. Es nane te hi, Nai Yakub in sufan, of hi ka mimle'u fa.

⁷Onle anbi ahunut hi na'if sin, hi alki anbe'o milali mi'ko Au plenat-plenat sin ma hi ka minaoba fa sin nok aki'at. Amfani aim nai meu Kau, he nati' Au amsa aum neu ki. Mes hi mitoti mak, ‘Sa' es of hai he mo'e mani he nati' haim fani meu Ko?’

⁸Tabu le i Au utoti neu ki: Nabe'i ka mansian anfuli Uisneno? Namneo kahaf. Mes him fuli Kau amsa. Hi mitoti mak, ‘Onme ka?’ Au utae ki ak: Anbi lasi baen batis bo'mese ma amfe fua tulu.

⁹Ale uf anfuli Kau, es nane te hi alki of amtoman kasat.

¹⁰Meki ale ho batis bo'mese neu Au Ume he nati' mnahat nathoe anbi nane. Amsu' Kau nai, ma of hi mit nak Au fai eno-eno neno tunan ma fe neu ki ale sa' alekot nok athoes.

¹¹Of Au ka ufetin fa snama he nale'un hi pah in afan; hi tuna min kase sin fuan of anmafen.

¹²Es nane te ale uf of antek alekot neu ki, natuin hi pah anfani alekot he nati' natua anbin.”

¹³UISNENO nakua a'an nak, “Namneo hi molok sin nakle'at Kau. Mes hi mitoti mak, ‘Hai mimolok sa' neu Ko?’

¹⁴Hi mimolok mak, ‘Hit taluli ma tabes neu Uisneno son-sona kun. In otan sa' ka hit tanaoba sutais neu UISNENO Akuasat Afinit, ai talile neu hit atofok natuin hit sanat?

¹⁵Hit atmes hit tit ale atoni neka naeb nane sin anmoni nok alekot. Atoni amaufinut ka alfa anmoni nok athoes, mes kalu sin ansu' Uisneno In neka none nok sin mo'et amle'ut, sin nafetnok amsa.’ ”

¹⁶Oke te atoni-atoni le namtausan UISNENO namolok es nok es. UISNENO In nen ma ansimo sin molok. Atoni-atoni le antola In ma namtausan In, antui sin kanan anbi sulat le naloitan anbi In matan.

¹⁷UISNENO Akuasat Afinit nakua a'an nak, “Sin of anfani Au to. Anbi neno Au ulil'ok, sin of anfani Au in-ini. Of Au nek sin, onle amaf mese in nek in anah sin le anmepu neu In.

¹⁸Au to of nit anteni monit le nasuli na'ko atoni nek alekot ma atoni amle'ut, atoni le naluli ma nabes neu Kau ma atoni le ka naluli ma ka nabes fa neu Kau.”