Read Uab Meto LUKAS 12 Bible Online

LUKAS 12 - Uab Meto bible

LUKAS 12

¹Fun pah namfau te nifun-nifun, sin anhake funam natef, talan te anmateli haen es nok es. Oket Yesus na'uab nahunu neu In asimo lasi sin nak, “Panat nai hi aom na'ko lalu haef atoni Farisi, esle' lasi asafanu.

²Fun katit fa sa' esle' ankub nani le kan fei nani fa ma katit fa sa' le nakolo nani le ka natonon fa.

³Es nane sa' le hi mi'uab bi mesokan of manena bi meusine, ma sa' le miseo bi lukem bi ke'an nanan of anetun nani na'ko ume in penen.”

⁴“Au ak ki, hoi Au bae, kais mimtausan sin le namate aof nane, mes namuni sin ka nabe'i fa hen mo'e sa' nesi anteni.

⁵Mes Au he ulile ki sekau le hi he mimtausan. Mimtausan nai In le namate ki, In anmu'i kuasat hen polin natam ki bi ai. Namneo Au ak ki mimtausan nai In!

⁶Ati ka nasosa fa kolo ane nim upan loit nua? Onane amsa kolo mese ka manikan fa bi Uisneno,

⁷tebes hi nakfunu amsa ansoi nain sin. Es nane te kais mimtau, fun hi upam nesi ale kolo ane nane sin.”

⁸“Ma Au ak ki: Sekau in nateb Kau bi mansian in matan, Anmone Pah To of nateb nani amsa bi Ahake Uisneno sin matan.

⁹Ma sekau natotan Kau bi mansian in matan of natotan in amsa bi ahake Uisneno sin matan.

¹⁰Sekau le antek nale'un Anmone Pah To, in sanat masako; mes sekau le antek nale'un Smanan Knino, in sanat ka masako fa.

¹¹Ma leka sin neki neu ume buat ma neu nakaf-nakaf, ma ana' plenat ma akuasat sin, kais mi'unu hi nekam he mitae onme ai he mi'uab mak sa'.

¹²Bi leku nane Smanan Knino of nanoina ki sa' le he mitae mani.”

¹³Ma atoni es na'ko atoni amfaut na'uab neu Yesus nak, “Anoni, mak au tata hen bati bale mnasi nok kau.”

¹⁴Mes Yesus nak neu in, “Bae, sekau es nait kau hen fani alef lasi ai atoni atnana neu ki ka?”

¹⁵Ma In na'uab anteni neu sin, “Panat nai ma ampao hi aom na'ko lasi sinmakat, fun atoni le in maus nathoe, in monin ka na'bon'in fa neu in mu'in nane.”

¹⁶Nalali te In na'uab neu sin lasi leta mese nak, “Atoni amu'it mese le anmu'i nain ma'afa ma napoitan afan naek.

¹⁷In natenab bi nekan nak: Au he mo'e sa' ka, fun au ka mu'if bale he upan au nain in afan.

¹⁸Ma in nak: Au he mo'e on i; Au he pukai ale Au lopo sin ma uhakeb fe'u le naek nesin ma au upan ale ane ma ale au maus anbi nane.

¹⁹Nalali te au ak neu au smanak: Smanaf, ho maus anaek, le natupu nani neu ton-ton amnemat. Musnas nai, muah ma minu nai ma mumlil nai!

²⁰Mes Uisneno nakua a'an neu in nak: Hoi amonot, bi fai i amsa mes naiti ho smanam le anbi ko, ma sa' le ho muloitan nane of neu sekau ka?

²¹Lasi antom neu atoni le nabua maus neu in aon, mes in kan mu'if sa' bi Uisneno In human.”

²²Yesus nak neu In asimo lasi sin, “Es nane Au ak ki, kais mi'unu neu hi monim, of hi he miah sa', ma kais mi'unu neu hi aom, of hi hem pake sa'.

²³Hi monim nesin mnahat ma hi aom nane nesin bael pake.

²⁴Him kiso mit ale kol ka'le kan sen ma kan seki fa ma kan mu'i fa ume ma lopo, mes Uisneno anhao nain sin. Fun hi monim nesin ale kolo nane sin!

²⁵Sekau le anbi ki le in nekan na'unu, nabe'i antalu in monin, mnanun niman li'an mese ka?

²⁶Ati hi ka mibe'i he mo'e lasi an-ana, nansa' hi mi'unu neu lasi bian?

²⁷Kiso mit uk-uki in sufan, le ka nasun fa abas ma kan tenu fa, mes Au ak ki: Nai Salomo nok ale in mu'in in pake ka namas fa on tuna' nane in sufan.

²⁸Hun anbi mnela le neno i anmoni ma noka anpolin bi ai, Uisneno naloitan nani, nes-nesi neu ki, hoi atoni nek an-ana ki!

²⁹Kais hi mitenab ma mi'unu neu he miah sa' ma minu sa' ma kais hi nekam naklati.

³⁰Ale uf-uf pah pinan, le ka nahin Uisneno, sin es nami ale lasi nane. Mes hi Ama nahin, hi minuka ale lasi i.

³¹Mami nai In plenat, ale sa' nane of In nabalab nani neu ki.

³²Kais mimtau, pukan an-ana ki, fun hi Ama natenab leko hen fe ki plenat neno tunan.

³³Misosa mani ale hi mu'im ma amfe mani neu amamu'it sin. Moe nai neu hi aom alu noni le ka namle'u nit, esle maus bi neno tunan le ka oke nitaf, le abakat ka nem paumak ma ap-apu ka neku nani fa.

³⁴Fun hi maus anbi me te, hi nekam amsa anbi nane.”

³⁵“So hi tnanam mafutu piut ma hi paku anpin piut.

³⁶Ma him fani on atoni le anpao in usi leka anfani nem na'ko tolas mafe fe'u, leka in nem ma anleku eno, nasoitan nani lab-lab neu in.

³⁷Alekot neu ate le sin usin nem napeni sin anpao. Au ak ki: Of in anfutu in atnanan ma natokob sin bi mei, nalali te in nem ma antuthae sin.

³⁸Ma leka in nem bi fai batis ka ai mes hen meu ka, ma napeni sin anmo'e onane, alekot neu sin.

³⁹Mes mihin nai: Leka ume tuaf nahin leku me abakat he nem, of in kan paleo fa in ume hen pukai nani.

⁴⁰Hi amsa ampao nai, fun Anmone Pah To of In koenon nem bi leku le hi ka mitenab mani fa.”

⁴¹Nai Petrus nak, “Usi, Hom tek lasi leta i neu kai ka, ai neu to ok-oke?”

⁴²Usi In natae nak, “Apao ume akiat ma ahinet es sekau le in usi of nahakeb nani hen fani nakaf neu ale ate sin hen fen sin mnahat bi leku le'at ka?

⁴³Alekot ate le napeni nan anmo'e onane leka in usi nem.

⁴⁴Au ak ki, tebes of usi nane naiti nani hen fani apao maus.

⁴⁵Mes leka ate nane atoni abulalut ma in natenab bi in nekan nak: Au usi oni ka nemaf, oke te in tepo ale ate atoni ma ale ate bife sin, ma nah ma ninu ma anmafu nok,

⁴⁶ate nane in usif of nem bi neno le in ka natenab nani ma bi leku le in ka nahin nani fa, of namate in ma anmo'e papmese on atoni ka akiat.

⁴⁷Fun ate le nahin in usi in lomin ma in kan pao fa ma kan mo'e natuin in lomin of ansimo tepos anaek.

⁴⁸Mes ate le ka nahin fa in usi lomin ma anmo'e sa' le mes he napeni tepos of napeni tepos an-ana. Fun anfe naek neu sekau, of antoti nafani naek amsa, ma nana'at naek neu sekau of antoti nafani bi in nesin teni.”

⁴⁹“Au aum he polin ai neu pah pinan ma Au ufneka bait ai nane anpin nalali!

⁵⁰Au of sutai hamu'it naek ma Au nekak anmalel, leka lasi nane fe ka nateabon.

⁵¹Ati hi mitenab mak Au aum he eki halan pah neu pah pinan ka? Kahaf, Au ak ki, ka lasi halan fa, mes lasi suli.

⁵²Fun na'ko tomas i, of anmu'i lasi suli na'ko atoni nim bi ume mese, tenu nok nua ma nua nok tenu.

⁵³Of sin nasulin amaf nok in anmone ma anmone nok in amaf, ainaf nok in anfeto ma anfeto nok in ainaf, babaf nok in nanef ma nanef nok in babaf.”

⁵⁴Yesus nak anteni neu to amfaun, “Leka hi mit nope ansae bi neno tes, onane hi mak: Ulan he nem ma namneo onane.

⁵⁵Ma leka hi mit anin anfu na'ko neno tes hi mak: Manas of nakiti, ma anbol onane.

⁵⁶Hi asafanut pah pinan ma neno i hi mitenab mihin, nansa' hi ka mitenab mihin fa batan i ka?

⁵⁷Ma nansa' hi ka mifek mihin fa lasi amneot?

⁵⁸Leka hom nao mok atoni le anmatoe nok ko neu anaet sin so ho maim lalan he muleko mokan bi lalan atnanan, he nati' kais in hel neki ko neu alef lasi ma alef lasi nana'at ko neu in sukin ma in sukin nana'at nani ko neu apao pa'an.

⁵⁹Au ak ko: Of ho kam poi mitaf talan te hom baen mufek ho tusa sin.”