Read Uab Meto ULANGAN 1 Bible Online

ULANGAN 1 - Uab Meto bible

ULANGAN 1

¹Sulat i nahenu nok uab a'at le Nai Musa natiaba neu to Israel leka sin anbi mnela snaen anbi Anonof Yordan. Anonof nane anbi neno saen Noe Yordan, anhaumak kot Suf, mabaina nok kot Paran, mabaina nok kot-kot Tofel, Laban, Hazerot ma Di-Zahab. (

²Na'ko Tubu Sinai talantia Kades-Barnea nao natuin Edom, lanan nane in a'lon neno bo'ha mese.)

³Anbi fun bo'es am mese antam neno mese antam ton bo'ha leka sin nasaitan Mesir, Nai Musa natiaba neu to nane ale sa' le UISNENO naplenat he naton nani neu sin.

⁴Lasi nane anbol leka Nai Musa nis ma anbe'u Nai Sihon, kesel atoni Amori, le naplenat anbi kot Hesybon, ma Nai Og, kesel Basan, le naplenat anbi kot-kot Asytarot ma Edrei.

⁵Es nane te, anbi Noe Yordan aon neno saen anbi pah Moab, on hae ahunut Nai Musa naketi lekat lulut ma plenat-plenat UISNENO. Nai Musa nak,

⁶“Leka hit atbi Tubu Sinai, hit UISNENO nakua a'an nak, ‘Hi mimaika alu leuf anbi tubu i.

⁷Es nane te tabu le i ampukai hi um-ume nai ma amnao nai meu pah neten atoni Amori ma neu ale bale ok-oke le anhaumak anbi nane, esle' Anonof Yordan, pah le anmu'i nuaf ma mnela, bale anbi aon bian a'ne'u ma Tasi Tnana in ninen. Amnao nai ma amtoko anbi pah Kanaan ma Nuaf Libanon talantia noe naek Efrat.

⁸Au, UISNENO, manba'an ulali pah nane ok-oke neu hi na'if Nai Abraham, Nai Ishak ma Nai Yakub ma sin sufan. Es nane te amnao nai amtoko mi tau pah nane nai.’ ”

⁹Nai Musa nak neu to nane nak, “Anbi tabu hit atbi Tubu Sinai, au umolok neu ki ak: Lasi sutais neu he uplenat ki nane mafen le'uf neu kau. Au ka ube'i fa he unaoba a'mes,

¹⁰natuin hi UISNENO antao ma anmo'e nalali hi amfaumen ansato namfau on afkun-afkun anbi neno atnanan.

¹¹So nati' UISNENO, hi na'if sin Uisneno ansato piut hi amfaum hae nifun mese anteni, ma anmo'e ki on nonot le nahenu nok alekot onle In anba'an nalali!

¹²Mes leka me nabe'i ka au he loi lasi sutais mafena neu he uleko ale hi lasi ka?

¹³Ambeti nai na'ko uf mese-mese atoni nek ahinet, nek akeot ma nahenu nok nek ahinet, he nati' au aiti sin he naplenat ki.

¹⁴Au molok nane him simo nok alekot.

¹⁵Es nane te anbi ale anakaf le hi ambeti sin, atoni fauk-fauk le nek ahinet ma nek akeot ma nek mahine au aiti sin ma usaeba sin he sin anfani anakaf neu ki. Fauk-fauk au aiti sin anfani anakaf neu atoni nifun mese, ma bian neu atoni natun mese, bian neu atoni bo'nim ma bian neu atoni bo'mese. Au amsa usaeba ale anakaf bian heu he nanono hi uf-uf sin.

¹⁶Anbi tabu nane au lenu sin on i: Amkiso nai lasi matoes ma mabanat le anbol anbi hi nonot. Mifek lasi nok amneot, leko anbi lasi le anmalut nok atoni anbi hi nonot ai nok atoni anao amnemat le natua nok ki.

¹⁷Leka hi mifek lasi kais anmafen ao biaf; atoni mese-mese mes hi mifek sin lasi papmese ok-oke, ka nok ambeti atoni sekau. Kaisa mimtau neu sekau amsa, natuin lasi atfeka le hi maiti nem na'ko Uisneno. Leka lasi mese mafen le'uf neu ki, meki lasi nane nem neu kau, he nati' au ufek ani.

¹⁸Anbi tabu nane amsa au fe neu ki fainekat-fainekat neu ale lasi bian le mes hi anmo'e.”

¹⁹“Oke te anmatom nok hit UISNENO In aplenat hit tasaitan Tubu Sinai ma atnao tatuin mnela snaen le menuan ma at ali pah nuaf atoni Amori. Anbi tabu hit tam atia Kades-Barnea,

²⁰au nak: Tabu i hi aim amtia milali ambi pah nuaf atoni Amori, pah le hit UISNENO ma hit naif sin Uisneno le anfe nani neu kit. Amkiso nai, pah nane naufon anbi hi humam ma hi matam. Amnao nai he amtoko anbi pah nane onle UISNENO naplenat nani. Kaisa hi nekam naoni ai mimtau.

²²Mes hi aim meu kau ma hi mak, ‘Leko anesi hit atlenu atoni fauk-fauk he nao nahunun kit he nati' sin natnu' pah nane he nati' sin nabe'i naton neu kit lanan me le mes hit atnao tatuin ma onme ka of hit he tam teu kot-kot nane.’

²³Lasi nane au simo, es nane te au beti atoni bo'es am nua, atoni mese na'ko uf mese-mese.

²⁴Sin antam pah nuaf nane Anonof Eskol, oke te sin anfun ma natef nani.

²⁵Nalali te sin anfani nem neu kit neki hau fua le sin napeni anbi nane ma sin naton nak pah le of hit UISNENO In anfe neu kit nane maafa anae le'uf.

²⁶Mes him laban hi UISNENO In aplenat ma hi kam lomi fa hem taman pah nane.

²⁷Hi mimunu mak on i, ‘UISNENO In nato'an kit. Es nane te In neki kit atpoi ta'ko Mesir he nati' nana'at kit neu atoni Amori sin niman nanan he nati' sin namate kit.

²⁸Es nane te maota sa' ka neu hit het nao teu nane? Atoni-atoni le hit atsonu sin anao neu nane anmo'e kit hit tamtau nok lasi le sin naton nak atoni pah nane nabe'i nesin kit ma matani nesin na'ko kit, ma nak sin natua anbi kot-kot le in baki lape nane namnanu namnes nok neno tnanan. Sin nit atoni le sin aokenu anae le'uf onle otu anbi nane!’

²⁹Mes au nak: Kaisa mimtausan atoni-atoni nane.

³⁰Hi UISNENO of In na' ma antopu ki ma anmabe'u anseka ki onle hi amsaksi milali anbi Mesir

³¹ma anbi mnela snaen, ma anbi mnela hufui. Hi mit neu onme UISNENO In neki ki nok aomina anbi lanan nane in a'lon talantia bale i on amaf mese nasnono ma naskau in anah.

³²Mes maski au umolok ulali onane amsa, hi fe kam lomi fa amsa miteb neu hi UISNENO,

³³le In anao nahunun ki anbi hi human ma hi matam he nami bale snasat neu ki. In naton lanan neu ki anbi fai anbi ni ai, ma anbi manas anbi ni nope.”

³⁴“UISNENO In anen han sakoit oke te In nato': In ansup nak,

³⁵‘Katit fa atoni mese amsa na'ko batan amle'ut le i of hen tam neu pah maafa le Au manba'an neu hi na'if sin.

³⁶Al Nai Kaleb, Nai Yefune anmone of antam neune, natuin in na'ki nabala neu kau. Neu Nai Kaleb ma in sufan sin of Au fe pah le in anteli nalali nane.’

³⁷Hi amsa amtao ma anmo'e UISNENO nato'an kau ma nakua a'an nak, ‘Musa, ho amsa of ho kam tam fa meu pah nane.

³⁸Mes mumepan ho atuntakus in nekan, Nai Yosua Nai Nun anmone. In es of ana' ma antopu Israel he nasik nan pah nane.’

³⁹Oke te UISNENO nakua a'an neu kit ok-oke nak, ‘Hi anah-anah sin le fe sin an-ana le sin kan beti nahin fa alekot na'ko amle'ut, anah-anah le natuin hi uab nak of hi musu-musu sin nasik nani sin, neu sin le nane of Au fe ani pah nane, ma sin of antoko anbine.

⁴⁰Mes hi, amfani nai meu mnela hufui amnao mituin lanan le an ali Tasi Akaba.’

⁴¹Hi mitae mak, ‘Musa, hai misanab milali neu UISNENO. Mes tabu i haim lomi he amnao he maken onle, hit UISNENO naplenat.’ Oke te mese-mese anbi ki hi miloitan ma mibalab he makenan, nok tenab mak atam ma atken pah nuaf nane lasi ana'.

⁴²Mes UISNENO nakua a'an neu kau nak, ‘Kais ho mufetin sin hen makenan, natuin of Au ka ok fa sin, musu of anbe'u sin.’

⁴³Au utiaba neu ki sa' le UISNENO naton, mes hi kam sian mani fa. Hi amlaban plenat UISNENO, ma nok neka moko' hi amnao meu pah nuaf nane.

⁴⁴Oke te atoni Amori le sin natua pah nuaf nane sin anpoi ma anlaban ki. Sin amfauken amfau le'uf, onle oni amfaun. Sin nali'u ki antia Horma, oke te sin nis ma anbe'u ki anbi pah nuaf Edom.

⁴⁵Nalali te hi amfani aim ma amhunun ma amkoa neu UISNENO amtoti tuntakus, mes In kan lomi fa he nen ai kan kiso ki fa.”

⁴⁶“Oke onane te hit tamaika atbi Kades a'lo le'ut.