Read Uab Meto ULANGAN 10 Bible Online

ULANGAN 10 - Uab Meto bible

ULANGAN 10

¹“Namuni te UISNENO nakua a'an neu kau nak, ‘Musa, amsapi fatu bena nua onle ahunut, ma anmo'e amsa peti hau mese neu in balan, oke te ho aum nai meu Kau anbi tubu in tunan.

²Au of atui ani neu fatu-fatu nane a'an le papmese onle neu fatu le ho mupe' mulali; nalali te fatu-fatu nane ho mutam sin neu peti nane in nanan.’

³Oke te au anmo'e peti na'ko hau akasia ma au a'pah fatu bena nua onle ahunut ma au eki sin neu tubu tunan.

⁴Anbi fatu nane UISNENO antui Plenat Bo'mese papmese onle ahunut, esle' plenat-plenat le In anfe nani neu ki, leka In nakua a'an na'ko ai in nanan anbi neno hi amnibun mibuabom anbi tubu haen. Nalali onane te UISNENO anfe fatu matui nane neu kau

⁵ma au sanu a'fani na'ko tubu. Oke te anmatom nok UISNENO In aplenat, fatu nua en nane au utam sin neu peti nane in nanan le au anmo'e ulali — ma na'ko neno nane talantia neno i fatu matui nua en nane fe esan anbi nane.” (

⁶Namuni te atoni Israel sin anfen na'ko ale oe mata atoni Yaakan, ma sin anao neu Mosera. Anbi nane Nai Harun in anmate ma sin ansub in. Nai Eleazar in anmone anseka in on Ana' fuat knino.

⁷Na'ko nane sin anao neu Gudgod, oke te sin anao piut neu Yotbata, pah le anmu'i oe anaek.

⁸Anbi tabu nane UISNENO anbeti nateta nani uf Lewi he anpanat ma anloi Peti Fef Bela ma antuthae UISNENO, ma natiaba tetus anbi In kanan. Nane sin mepu sutais talantia neno i.

⁹Es nane te uf Lewi kan simo fa nain bale bela uf-uf bian, natuin UISNENO In kun anfani pa' ma nama' neu sin, hi UISNENO nakua nalali In a'an neu sin.)

¹⁰“Neno bo'ha ma fai bo'ha in a'lon au umaika bi tubu tunan onle au anmo'e ulali anbi hae ahunut. Hae mese anteni In anen kau, ma In anlomi neu he ka nale'un ki fa.

¹¹Oke te In anlenu kau he na' ma topu ki he nati' nabe'i hi ampal ma amu'i pah le In anba'an nalali neu hi na'if sin.”

¹²“Anbi tabu le i, au bia ki ok-oke, ampanat nai sa' le hi UISNENO antoti na'ko ki: Mimtau ma misman neu hi UISNENO ma amtao mituin ale In aplenat sin. Amnek ma mimnau In ma miluli mibes neu In nok hi smanam ok-oke ma hi monim ok-oke.

¹³Mituin nai UISNENO In aplenat sin le neno i au utiaba sin neu ki he nati' hi mipeni alekot.

¹⁴Hi UISNENO In anmu'i neno tunan In amnanun kuni peni; pah pinan amsa ini kun nok ale in nesan ok-oke.

¹⁵Mes UISNENO In manekan anae le'uf neu hi na'if sin, talantia na'ko ale uf In. Es anbeti ki, ma talantia neno i amsa hi In to le mabeti.

¹⁶Es nane te naubon na'ko neno i hi mes mituin UISNENO ma kais hi minak fatu amteni.

¹⁷Hi UISNENO kun neu ale uisneno teta ma In kuasat anesin ale kuasat. In Uisneno anaet kun ma akuasat kun le mes he tatuin In aplenat sin. In kan lomi fa hen pesi fa es ma kan lomi fa hen simo noni mate.

¹⁸In anpesi li'anmanat sin ma bife banu sin he nati' sin napeni lasi amneot le natua nabua nok hit nonot ma anfe neu sin amnahat ma blua pake.

¹⁹Onane te hi amsa mes milile ma miton hi manekam neu atoni-atoni anao amnamat nane, natuin afi ahunut hi amsa atoni anao amnemat anbi pah Mesir.

²⁰Mimtausan hi UISNENO ma miluli mibes alkun neu In. So nati' hi mi'ki piut neu In ma amsup nai anbi In kanan.

²¹Ampules ma miliatas In kanan natuin hi UISNENO es In. Nok hi matam kim hi mit milali In taos In mo'et le anaek ma matani le In antao ma anmo'e neu ki.

²²Leka hi be'i ma hi na'i sin anao neu Mesir, sin amfaukenu alkun atoni bo'hitu. Mes hi UISNENO In antao ma anmo'e hi amfaumenu talantia hi mimfau onle afkun-afkun neno tnanan.”