Read Uab Meto ULANGAN 11 Bible Online

ULANGAN 11 - Uab Meto bible

ULANGAN 11

¹“Amnek mimnau hi UISNENO, ma mituin ale In aplenat sin.

²Mimnau nai anbi neno le i sa' le hi mihin antom UISNENO na'ko hi monim. Hi anah-anah sin ka nahin fa lasi nane. Hi es amsaksi milali hi UISNENO In anaet kun, In abe'in kun, In kuasat kun,

³ma ale lasi mkakan le In anmo'e. Hi mit milali ale sa' le In anmo'e neu Kesel Mesir ma in pah ok-oke.

⁴Hi mit neu onme UISNENO nale'un to meo Mesir bua'-bua' nok ale in bikase ma in aklet makenat sin. In nalema namate sin ok-oke anbi Tasi Gelagah leka sin fe anli'u ki.

⁵Hi mihin sa' le UISNENO anmo'e neu ki anbi mnela snaen nahun na'ko hi fe ka aim amtia fa bale i.

⁶Hi amsa mimnau sa' le UISNENO anmo'e neu Nai Datan ma Nai Abiram, Nai Eliab in anah sin na'ko uf Nai Ruben. Anbi hi humam ma hi matam ok-oke, pah pinan namkak oke te an olo nan sin nok sin ume nanan sin, sin um-ume, ale sin ate ma sin mu'it ok-oke.

⁷Namneo, hi mit milali nok hi matam ale lasi sanmakat le UISNENO anmo'e nalali.”

⁸“Mituin nai ale plenat le au utiaba neu ki anbi neno i, onane te nabe'i hi amlak noe ma amtam meu pah le ka lo fa anteni hi mitua mani.

⁹Ma hi of amoni lo anbi pah amu'it ma maafa, le UISNENO anba'an nalali neu hi na'i ma hi be'i sin ma neu sin sufan.

¹⁰Pah le of hi mitua mani ka onfa pah Mesir, bale ahunut le afi hi mitua ambine. Anbi nane mes hi amepu nok matani he mitam oe neu hi lene sin anbi tabu hi amsen fini.

¹¹Mes pah le of hi amtam meune pah nane anmu'i nuaf ma nonof; pah nane ulan anpofi piut.

¹²Hi UISNENO anpanat ma anpao pah nane ma In ankiso ma In nail nani na'ko ton anfatnon talantia ton in amsopun.

¹³Es nane te mituin nai ale plenat le au utiaba neu ki anbi neno i; amnek ma mimnau hi UISNENO ma miluli mibes meu In nok hi asmanam ma hi monim ok-oke.

¹⁴Leka hi anmo'e onane, onane te UISNENO of nasanut ulan neu hi pah na'ko ton anfanton talantia ton in amsopun, leka hi amseki ma monu milali, ma leka hi hem sen. Hi of amu'i ane kase le nanokbon, tua mina mtasa ma mina bub fua mina,

¹⁵ma hun neu hi mu'it sin. Ale amnahat le him lomi of naloitnon ma nabalnon neu ki.

¹⁶Kais him lomi he naskotun ki ma na'lo baki na'ko UISNENO he miluli mibes ma am aetnom neu ale uisneno teta bian.

¹⁷Kais him tanhai plenat nane, UISNENO of nato'an ki. In of ka nasanut fa ulan; hi pah of anmeto anmate talantia ale sa' le hi amsen of kan fe ki fa in afan. Ma anbi tabu tuka ma pala' of hi amate ambi pah alekot le UISNENO anfe neu ki.

¹⁸Mimnau ma ampanat plenat-plenat nane. Amfutun anbi hi nimam ma amfutun anbi hi ilam he mimnau sin piut-piut.

¹⁹Minoina sin neu hi anah-anah sin. Hi miuab neu sin anbi hi ume nanan ma anbi mone, anbi tabu hi misnas ma anbi tabu hi amepu.

²⁰Amtui sin anbi hi ume nesun ma anbi hi eno naek.

²¹Onane te hi ma hi anah-anah sin of hi mipeni ua mnanu anbi pah le hi UISNENO anba'an nalali neu ki. Leka neno tunan fe an obe pah pinan, hi of mitua pah nane piut amsa.

²²Mituin nai nok aki'at ale plenat le au utiaba neu ki: Amnek mimnau hi UISNENO, amtao ma anmo'e ale sa' le In naplenat neu ki, ma nati' hi mi'ki piut neu In.

²³UISNENO of anli'u ale uf nane na'ko hi humam ma hi matam, ma hi of mitua pah uf-uf nane sin ini le anaek anesin ki ma le nabe'i anesin ki.

²⁴Ale pah le hi haem benan anteli anbine, of anfani hi ini. Hi pah nane in naufon na'ko mnela snaen anbi bian a'ne'u talantia Nuaf Libanon anbi bian a'li, ma na'ko Noe Efrat neno saen talantia Tasi Tnana neno tesan.

²⁵Anbi pah nane ok-oke hi UISNENO of antao ma anmo'e atoni-atoni nane namtausan ki onle In anba'an nalali, talantia atoni mese amsa ka nabe'i fa hen eka ma ankabata ki.

²⁶Neno i nabe'i hi ambeti nai he tetus ai he kasat.

²⁷Hi of mipeni tetus leka hi mimtausan hi UISNENO In aplenat sin, le neno i au utiaba neu ki.

²⁸Mes hi of mipeni kasat leka hi ka mituin fa hi UISNENO. In plenat-plenat sin, mes hi meki amfani ma miluli mibes neu ale uisneno teta bian le hi fe ka miluli mibes mitfa neu sin.

²⁹Leka hi UISNENO neki ki atam meu pah le of hi mitua mani, tetus nane mes hi amtek ma mitiaba mani na'ko Tubu Gerizim ma kasat nane mes hi amtek ma mitiaba mani na'ko Tubu Ebal. (

³⁰Tubu nua en nane anbi Noe Yordan aon neno tesan anbi pah atoni Kanaan le natua anbi Nonof Yordan, anbaina neu neno tesan ka na'lo fa na'ko ale hau uf bale luli besa anbi More anhaumak kot Gilgal.)

³¹Ka lo fa anteni hi of amlak Noe Yordan ma mitua pah le hi UISNENO anfe neu ki. Leka hi misik man pah nane ma mitua anbi nane,

³²hi mes he mituin ale plenat le au utiaba ulali neu ki anbi neno i.”