Read Uab Meto ULANGAN 12 Bible Online

ULANGAN 12 - Uab Meto bible

ULANGAN 12

¹“Le i ale plenat le mes hi mituin mani anbi hi monim ok-oke anbi pah le UISNENO, hi be'i hi na'i sin Uisneno anfe nani neu ki.

²Leka hi amtam milali ambi pah nane hi mes miskuku mile'un mani ale bale luli besa anbi tubu-tubu mnanu sin tunkenu, anbi ale nuaf ma anbi ale hau naek sin mafon, bale uf le natua anbi nane naluli nabes neu ale sin uisneno teta.

³Ampukai mani ale sin baki fuat ma miskuku mani ale sin ni fatu le sin antek nak le'u. Motu mani ale ataka-ataka Asyera, ma miskuku mile'un ale sin le'u mahuma, talantia sin of ka naluli nabes anteni fa neu ale uisneno teta anbi bale-bale nane.

⁴Anbi tabu hi miluli mibes neu hi UISNENO, kaisa amkiso mituin taos mo'et atoni-atoni nane naluli nabes neu ale sin uisneno teta.

⁵Na'ko ale bale uf-uf Israel ok-oke, hi UISNENO of anbeti bale mese he nati' hi nonot nabe'i sin nem neu In human ma naluli nabes neu In.

⁶Neu bale nane hi mes meki hi fua tulu mnotu ma ale fua tulu bain, hi fua tulu bati bo' ma ale fua tulu tnatas bian, fua tulu hi fef ba'an, fua tulu hi nek alomit ma bijae tipu ma bibi ma bibi kase le nahonis nahunun sin.

⁷Anbi neno nane amsa, anbi hi UISNENO In human, hi bua'-bua' mok hi ume nanan sin mes hi miah ma mimlil neu hi mepu-mepu sin napoitan fuan natuin hi UISNENO. anfe tetus neu ki.

⁸Leka tabu nane in nem antia, kais hi anmo'e amteni onle i. Talantia neno le i hi miluli mibes natuin hi nekam in alomin kun,

⁹natuin hi fe kam tam fa meu pah le hi UISNENO anfe neu ki, bale nabe'i hi misnas nok aomina.

¹⁰Leka hi amlak Noe Yordan, hi UISNENO In of anbab ki he hi amtoko ma mitua pah anbi noe nane in ninen. In of naneo ma nahafo ki na'ko ale musu, ma hi of amoni nok aomina ma tainine.

¹¹Namuni te hi UISNENO of anbeti bale mese le of hi miluli mibes neu In. Neu bale nane hi mes amnao meune meki ale sa' le au uplenat ani neu ki, esle' fua tulu mnotu ma ale fua tulu bian, fua tulu bati bo' ma fua tulu tnatas le hi ambeti mani le hi amba'an neu UISNENO.

¹²Mimlil nai anbi hi UISNENO In human bua'-bua' mok hi anah sin, hi ate-ate sin ma atoni-atoni Lewi le sin natua anbi hi kot-kot sin, natuin atoni Lewi sin ka napeni fa nain anbi hi pah.

¹³Ka nabe'i fa hi mitulu hi fua tulu sin anbi bale-bale le hi ambeti amese kim,

¹⁴mes alkun anbi bale le UISNENO anbeti nani. Alkun anbi bale nane hi mes mitulu hi fua tulu mnotu ma anmo'e lasi-lasi bian le au uplenat neu ki.

¹⁵Mes hi nabe'i mipeni sona he amlolo hi mu'it ma miah in sisi anbi bale me le hi mitua. Hi nabe'i miah fauk-fauk le hi UISNENO anfe neu ki. Atoni mese-mese, leko le aknino ai alahit ka, nabe'i sin nah sisi nane, onle nabe'i hi miah sisi lus ana' ka ai sisi lus anaek.

¹⁶Al in na' ka nabe'i fa he hi miah, hi mes am opan mani neu nain on oe.

¹⁷Anbi bale le hi mitua ambine ka nabe'i fa he hi miah fua tulu bati bo' mese na'ko hi ane kase, hi tua mina mtasa, hi mina bub fua mina, hi bijae ai hi bibi ma hi bibi kase le nahonis nahunun sin, fua tulu ambaen hi han manba'an ai hi fua tulu nek alomit ai fua tulu bian.

¹⁸Hi ma hi anah sin, bua'-bua' mok hi ate-ate sin ma atoni-atoni Lewi le natua hi kot, mes hi miah fua tulu nane anbi hi UISNENO In human, anbi bale le hi UISNENO anbeti nani. Ma anbi bale nane hi mes mimlil natuin ale hi mepu.

¹⁹Ampanat nai he nati' kais hi mifetin uf Lewi mapolin leka hi fe amoni ambi pah nane.

²⁰Leka hi UISNENO anmenuab hi pah in nakat-nakat sin onle In anba'an, hi nabe'i miah sisi natuin hi nekam in alomin kun.

²¹Leka bale le hi UISNENO anbeti na'lo lo le'uf na'ko hi bale, nabe'i hi amlolo bijae mese, ai bibi kase, ai bibi le UISNENO anfe neu ki, ma hi miah in sisi anbi hi bale nok hi nekam in alomin kun, onle au uton ulali neu ki.

²²Atoni mese-mese, leko le aknino ai le alahit, nabe'i sin nah sisi nane, onle nabe'i hi miah sisi lus anaet ai sisi lus ana'.

²³Mes sisi le fe anmu'i in na' ka nabe'i fa he hi miah, natuin smanaf anbi na' in nanan ma ka nabe'i fa he hi miah smanaf bua'-bua' nok in nesan.

²⁴Ka nabe'i fa hi miah in na', so mes hi am opan mani neu nain onle oe.

²⁵Leka hi mituin plenat nane, UISNENO of anmalin, ma hi mok hi sufam of hi mipeni aomina.

²⁶Ale fua tulu tnatas le hi amba'an milali neu UISNENO, hi mes meki mani neu bale le UISNENO anbeti nani.

²⁷Fua tulu mnotu ma fua tulu le hi miah in sisi mes hi mitulu mani anbi baki tulu UISNENO ma in na' nane am op mani neu baki fua tulu in tunan.

²⁸Ampanat nai nok leko ale sa' le au uplenat ulali neu ki, onane te hi amtao ma anmo'e alekot ma anmatom nok hi UISNENO. In alomin, talantia hi ma hi sufam napeni alekot ma aomina talantia nabal-bal.”

²⁹“Hi UISNENO of nale'un uf-uf le natua anbi pah nane, talantia nabe'i hi amtoko ma mitua mani.

³⁰Leka nale'un nalali uf-uf nane, ampantom lek-leko he nati' kais him kiso mituin sin talantia hi miluli mibes neu uisneno teta bian, natuin taos mo'et nane neki nem neu ki lasi amle'ut.

³¹Taos mo'et uf-uf nane le sin naluli nabes neu sin uisneno teta, kais him kiso mituin sin he miluli mibes neu hi UISNENO, natuin sin naluli nabes nok nanaoba taos mo'et amle'ut le UISNENO an unto'an neune. Natuin sin anmone ma sin anfeto sin notu nani sin anbi baki fuat on fua tulu neu uisneno teta.

³²Amtao ma anmo'e nai ale sa' le au uplenat ulali neu ki; kais hi amsato ai mibati.